ول 1971 جىلى الماتى قالاسىندا دۇنيەگە كەلدى. مەكتەپ بىتىرگەن سوڭ جۇرەك قالاۋىمەن الماتى قالالىق مەديتسينالىق ۋچيليششەسىنە ءتۇسىپ، فەلدشەر ماماندىعىن مەڭگەردى. وقۋدى اياقتاعاننان كەيىن جاس مامان رەتىندە 4-پودستانتسياعا جۇمىسقا ورنالاسىپ، العاشقى تاجىريبەسىن جيناقتادى. سول ساتتەن باستاپ ءوزىنىڭ بار سانالى عۇمىرىن جەدەل جاردەم قىزمەتىنە ارناپ كەلەدى. بيىل، مىنە، وسى سالاداعى ەڭبەك ءوتىلى 34 جىلعا تولىپ وتىر. بۇل – ۇلكەن تاباندىلىق پەن ادالدىقتىڭ ايقىن كورىنىسى.

مەدەۋ اۋدانىنداعى 4-پودستانتسيادا بريگادالاردى شاقىرۋعا باعىتتاپ، جۇزدەگەن ادامنىڭ تاعدىرىنا اراشا ءتۇسىپ كەلە جاتقان ول، الماتى قالاسىنىڭ ىشكى ساياسات باسقارماسىنىڭ قولداۋىمەن، ءاربىر قوڭىراۋدى ءبىر ادامنىڭ ءۇمىتى دەپ قابىلدايدى. سوڭعى 10 جىلدا ونىڭ ارالاسۋىمەن 1000-نان استام ناۋقاسقا شۇعىل كومەك كورسەتىلىپ، ءومىرىن ساقتاپ قالۋ مۇمكىندىگى بەرىلدى.

جاس كەزىنەن-اق ول ءوز ماماندىعىنا بار ىنتاسىمەن بەرىلىپ، تەك كاسىبيلىگىمەن عانا ەمەس، جاناشىرلىعىمەن دە ەرەكشەلەندى. كەي كەزدەرى كادر تاپشىلىعىنا بايلانىستى ءتۇرلى بولىمشەلەردە جۇمىس ىستەۋگە تۋرا كەلدى. ول زاپراۆكا بولىمىندە دە، ديسپەتچەرلىك ورىندا دا، ءتىپتى اعا فەلدشەردىڭ ورنىندا دا ءوز مىندەتىن ادال اتقاردى. قاي جەردە جۇرسە دە، وزىنە سەنىپ تاپسىرىلعان ىسكە بارىن سالدى.

كومپيۋتەردى ەركىن مەڭگەرگەندىگىنىڭ ارقاسىندا ءبىر كەزەڭدە ديسپەتچەرلىك بولىمگە اۋىستىرىلىپ، سول جەردە دە زور جاۋاپكەرشىلىكپەن ەڭبەك ەتتى. قازىر ول مەدەۋ اۋدانىنداعى 4-پودستانتسياداعى بريگادالاردى باسقارىپ، جىل سايىن 500-دەن استام ادامعا جەدەل جاردەم كورسەتۋگە ۇلەس قوسىپ كەلەدى.

فەلدشەر ماماندىعى – ەرلىككە پارا-پار ءىس. اسىرەسە كۇتپەگەن جاعدايلار ورىن العاندا ادامنىڭ سابىرىن جوعالتپاي، جىلدام ءارى دۇرىس شەشىم قابىلداي ءبىلۋى اسا ماڭىزدى. وكسانا اناتولەۆنا وسىنداي قاسيەتتەرىمەن كوزگە ءتۇسىپ كەلەدى. ونىڭ ەسىندە ەرەكشە ساقتالعان وقيعالاردىڭ ءبىرى – ءىشىنىڭ اۋىرسىنۋىنا شاعىمدانعان ناۋقاسقا بارا جاتقان جولدا اۆتوبۋس ايالداماسىندا بىرنەشە ادامنىڭ كولىك اپاتىنا ۇشىراعانىن كورۋى. ابىر-سابىر بولىپ جاتقان ساتتە ول ساسپاي، بىردەن ەڭ اۋىر جاراقات العاندارعا العاشقى كومەك كورسەتە باستادى. قوسىمشا جەدەل جاردەم بريگادالارى جەتكەنشە، ادامداردىڭ ءومىرىن ساقتاپ قالۋعا بار كۇشىن سالدى. كەيىن عانا ءوز-وزىنە كەلىپ، سول ءساتتىڭ سالماعىن سەزىنگەن. مۇنداي ەرلىكتى ەكىنىڭ ءبىرى جاساي بەرمەيتىنى انىق.

وكسانا اناتولەۆنا – ارىپتەستەرىنىڭ اراسىندا دا زور بەدەلگە يە. ءاردايىم بىلىكتىلىگىن ارتتىرىپ، زاماناۋي تالاپتارعا ساي بولۋعا تىرىسادى. ونىڭ ايتۋىنشا، فەلدشەر ماماندىعى تەك كاسىبي شەبەرلىكتى عانا ەمەس، سونىمەن بىرگە جۇرەك جىلۋىن، مەيىرىمدىلىكتى، توزىمدىلىكتى تالاپ ەتەدى. «ادام ءومىرىن ساقتاپ قالۋدان اسقان ميسسيا جوق» دەگەن ومىرلىك ۇستانىمى ونىڭ بار ەڭبەگىنىڭ ايعاعى.

بۇگىنگى تاڭدا ول – ناعىز تاجىريبەلى مامان، سان جىلدار بويى 1500-دەن استام ادامنىڭ تاعدىرىن ساقتاپ قالعان اق حالاتتى ابزال جان. ونىڭ 34 جىلدىق قاجىرلى ەڭبەگى – ەرلىككە پارا-پار. وسىنداي جانداردىڭ ارقاسىندا قوعامدا ءۇمىت پەن سەنىم جوعالمايدى. ماشورينا وكسانا اناتولەۆنا – جاي عانا فەلدشەر ەمەس، ول – ادام ءومىرىنىڭ شىنايى ساقشىسى.

Abai.kz