تۇركىستان وبلىسىندا قايعىلى وقيعا ورىن الدى. جەكە تۇرعىن ءۇي ورتەنىپ، 12 ادام قازا تاپتى.

«جەتىساي اۋدانى، العاباس اۋىلىنداعى جەكە تۇرعىن ۇيدەگى ورتتەن 12 ادام، ونىڭ ىشىندە توعىز بالا قازا تاپتى»، - دەپ حابارلايدى تۇركىستان وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى.

«بۇگىن تاڭەرتەڭ تۇركىستان وبلىسى توتەنشە جاعدايلار دەپارتامەنتىنىڭ «101» جەدەل ارەكەت ەتۋ ورتالىعىنا جەتىساي اۋدانى، العاباس اۋىلىنداعى ەكى قاباتتى جەكە تۇرعىن ۇيدە ءورت شىققانى تۋرالى حابار ءتۇستى. وقيعا ورنىنا جەتكەن ءورت ءسوندىرۋ ءبولىمى ءۇيدىڭ تولىعىمەن جالىنعا ورانعانىن انىقتادى. ءورتتى انىقتاۋ جانە ءسوندىرۋ بارىسىندا ەس-ءتۇسسىز جاتقان ءۇش ادام ۇيدەن شىعارىلىپ، جەدەل جاردەم بريگاداسىنا تاپسىرىلدى. ىشىنەن 12 ءولى ادام، ونىڭ ىشىندە توعىز بالا تابىلدى»، - دەلىنگەن رەسمي اقپاراتتا.

كۋاگەرلەردىڭ ايتۋىنشا، وسىنىڭ الدىندا ءۇي يەلەرى شاعىن جيىن وتكىزگەن، سول سەبەپتى ۇيدە بىرنەشە قوناق تۇنەپ قالعان. وبلىستىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابار 101 نومىرىنە تاڭعى ساعاتتاردا تۇسكەن.

ءورتتىڭ جالپى اۋماعى 360 شارشى مەتردى قامتىعان. قازىر وقيعا ورنىندا توتەنشە جاعدايلار قىزمەتى مەن پوليتسيانىڭ ماماندارى جۇمىس ىستەپ جاتىر. ءورتتىڭ شىعۋ سەبەبى انىقتالۋدا.

پرەزيدەنت قاسىم-جومارت توقاەۆ تۇركىستان وبلىسى جەتىساي اۋدانىنداعى جەكە ۇيدە بولعان ءورتتىڭ سالدارىنان كوپتەگەن ادامنىڭ قازا تابۋىنا بايلانىستى كوڭىل ايتتى.

ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى. بۇل تۋرالى قر پرەزيدەنتىنىڭ كەڭەسشىسى-ءباسپاسوز حاتشىسى رۋسلان جەلدىباي جازدى.

Abai.kz