بۇگىن استانادا «دارىن» مەملەكەتتىك جاستار سىيلىعىنىڭ لاۋرەاتتارىن ماراپاتتاۋ ءراسىمى ءوتتى. سىيلىق مادەنيەت، عىلىم، مەديا جانە سپورت سالاسىندا جوعارى جەتىستىكتەرگە جەتكەن 20 جاس دارىنعا تابىستالدى. ولاردىڭ قاتارىندا حالىقارالىق جانە رەسپۋبليكالىق كونكۋرستار، فەستيۆالدەر مەن كورمەلەردىڭ لاۋرەاتتارى، رەسپۋبليكالىق جانە حالىقارالىق دەڭگەيدەگى سپورت جارىستارىنىڭ جۇلدەگەرلەرى مەن جەڭىمپازدارى، قوعامنىڭ دامۋىنا ۇلەس قوسىپ جۇرگەن جاستار بار.

قر مادەنيەت جانە اقپارات ءمينيسترى ايدا بالاەۆا قۇتتىقتاۋ سوزىندە جاستار ساياساتى سالاسىندا جىل ساناپ جاڭا بۋىندى قولداۋعا باعىتتالعان شارالار مەن جوبالار ارتىپ كەلە جاتقانىن اتاپ ءوتتى. پرەزيدەنت باستاماسى ارقىلى جوعارى ءبىلىمنىڭ قولجەتىمدىلىگى ارتىپ، جاس عالىمداردى قولداۋعا ارنالعان گرانت باعدارلامالارى كوبەيدى، ەڭبەك نارىعىندا جاس مامانداردىڭ مۇمكىندىكتەرىن ارتتىراتىن جاڭا جوبالار ىسكە قوسىلدى. كرەاتيۆتى يندۋستريا، تسيفرلىق ەكونوميكا، كاسىپكەرلىك سالاسىندا جاستارعا جول اشاتىن باستامالار دا مەملەكەت تاراپىنان قولداۋ تاۋىپ وتىر.

«مەملەكەت باسشىسى ءاردايىم ءوز سوزدەرىندە جاستارعا قولداۋ ءبىلدىرىپ، ۇلكەن سەنىم ارتىپ كەلەدى. پرەزيدەنتتىڭ ءار جولداۋى، قولعا العان رەفورمالارى مەن باستامالارى – جاستاردىڭ بولاشاعى مەن يگىلىگى ءۇشىن جاسالىپ جاتقان اۋقىمدى وزگەرىستەردىڭ ناقتى كورىنىسى.

بۇل رەفورمالاردىڭ وزەگى – ادىلدىك، زاڭ مەن ءتارتىپ، اشىقتىق پەن جاۋاپكەرشىلىك سەكىلدى قۇندىلىقتارعا نەگىزدەلگەن. اسىرەسە، «زاڭ جانە ءتارتىپ»، «تازا قازاقستان» باستامالارى مەن جاپپاي ۆولونتەرلىك اكتسيالاردى جاستاردىڭ زور جاۋاپكەرشىلىكپەن جانە ۇلكەن ىنتامەن قولداپ كەلە جاتقانى قۋانتادى. بۇل اۋقىمدى باستامالاردىڭ بارلىعى – جاڭا يدەولوگيانىڭ ماڭىزدى بولىگى. ال وسى يدەولوگيانى جۇزەگە اسىراتىن دا، ونى العا جەتەلەيتىن دە – وزدەرىڭىز»، – دەدى مينيستر.

لاۋرەاتتار «عىلىم»، «ەسترادا»، «كلاسسيكالىق مۋزىكا»، «حالىق شىعارماشىلىعى»، «سپورت»، «ديزاين جانە بەينەلەۋ ونەرى»، «جۋرناليستيكا»، «قوعامدىق قىزمەت»، «تەاتر جانە كينو»، «ادەبيەت» نوميناتسيالارى بويىنشا انىقتالدى.

2025 جىلعى جەڭىمپازداردىڭ قاتارىندا تانىمال قازاقستاندىق ءانشى ەڭلىك قۇراربەك (Yenlik), «سلاۆيان بازارى-2024» حالىقارالىق ۆوكالدىق بايقاۋىنىڭ باس جۇلدەگەرى ەرنازار جۇبان، «قايرات» فۋتبول كلۋبىنىڭ شابۋىلشىسى داستان ساتپاەۆ بار.

«دارىن» مەملەكەتتىك جاستار سىيلىعى جىل سايىن تالانتتى جاستاردى مەملەكەتتىك دەڭگەيدە قولداۋ ماقساتىندا تابىستالادى. سىيلىق عىلىمي، شىعارماشىلىق، قوعامدىق قىزمەتتەگى جەتىستىكتەر مەن جوعارى سپورتتىق ناتيجەلەر ءۇشىن بەرىلەدى.

30 جىلدان استام ۋاقىت ىشىندە بۇل سىيلىقتى 360-تان اسا جاس قازاقستاندىق يەلەنگەن. وسىعان دەيىن نۇرلان ونەرباەۆ، باقتيار ارتاەۆ، سەرىك ساپيەۆ، دانيار ەلەۋسىنوۆ، يليا يلين، ولگا شيشيگينا، دەنيس تەن، قىدىرالى بولمانوۆ، «مۋزارت»، «بايتەرەك» توپتارى، سەرىك يبراگيموۆ، ءالي وقاپوۆ، قايرات نۇرتاس، ديماش قۇدايبەرگەن جانە تاعى باسقا كوپتەگەن ونەرپازدار مەن سپورتشىلار ماراپاتتالعان.

Abai.kz