ۇكىمەت وتىرىسى بارىسىندا پرەمەر-مينيستر ولجاس بەكتەنوۆ وتاندىق فارماتسەۆتيكا سالاسىنا قارجى تارتۋدى ىنتالاندىرۋ ماقساتىندا ينۆەستيتسيالار تۋرالى كەلىسىمدەر جاسالىپ جاتقانىن اتاپ ءوتتى.

دارىلىك زاتتار مەن مەديتسينالىق بۇيىمدار ءوندىرۋ بويىنشا 9 ينۆەستيتسيالىق جوبا قولعا الىندى. دەنساۋلىق ساقتاۋ مينيسترلىگىنە مۇددەلى مەملەكەتتىك ورگاندارمەن بىرلەسىپ، ءۇش اي ىشىندە بارلىق ۇيىمداستىرۋ جۇمىستارىن اياقتاپ، ينۆەستورلارمەن كەلىسىمدەردىڭ جاسالۋىن قامتاماسىز ەتۋ تاپسىرىلدى.

«ءدارى-دارمەككە باعا بەلگىلەۋدىڭ جاڭا تسيفرلىق جۇيەسى فارماتسەۆتيكالىق نارىقتاعى بارلىق قاتىسۋشىلار ءۇشىن بىرىڭعاي ەرەجەلەردى بەكىتتى. بيىل پرەپاراتتارعا باعانى تومەندەتۋدىڭ ارقاسىندا مەملەكەت دارىلەردى ساتىپ الۋدا 36 ملرد تەڭگەدەن استام قارجى ۇنەمدەدى. بۇل قاراجات حالىقتى قوسىمشا ءدارى-دارمەكپەن قامتاماسىز ەتۋگە باعىتتالادى. ساتىپ الۋ باعالارىنىڭ تومەندەۋى وندىرۋشىلەر مەن جەتكىزۋشىلەرگە ۇناي بەرمەيتىنى تۇسىنىكتى. بىراق ءبىز ازاماتتارىمىزدىڭ مۇددەلەرىن باسشىلىققا الۋىمىز كەرەك. دارىلەر ءادىل باعامەن ساتىپ الىنادى. وتاندىق فارماتسەۆتيكالىق وندىرۋشىلەرگە ايتارىم، ءبىز سىزدەردى ءارى قاراي دا قولدايمىز. وعان ەشقانداي كۇمان بولماسىن. بىراق مەملەكەتتىك قولداۋ شارالارى ساپالى مەديتسينالىق ءونىمدى جەتكىزەتىن جانە باعانى جاساندى تۇردە وسىرمەيتىن نارىقتىڭ ادال قاتىسۋشىلارىنا عانا كورسەتىلەدى»، — دەپ اتاپ ءوتتى پرەمەر-مينيستر.

دەنساۋلىق ساقتاۋ ءمينيسترى اقمارال ءالنازاروۆا 2026 جىلعا ارنالعان پرەپاراتتاردى ساتىپ الۋ جاڭارتىلعان جۇيە بويىنشا جۇرگىزىلىپ جاتقانىن ايتتى. ءدارى-دارمەكتەردىڭ كەڭ ءتىزىمىنىڭ قۇنىن تومەندەتۋ ناتيجەسىندە ايتارلىقتاي بيۋدجەتتىك تيىمدىلىككە قول جەتكىزىلگەن. بىرقاتار جوعارى شىعىندى دارىلىك زاتتار بويىنشا باعالار 50%-دان 300%-عا دەيىن تومەندەدى. بۇل، ەڭ الدىمەن، ونكولوگيالىق پرەپاراتتارعا قاتىستى.

مىسالى، يماتينيب ءدارىسى بويىنشا باعا 9450 تەڭگەدەن 2348 تەڭگەگە تومەندەدى، ال بەۆاتسيزۋماب ءدارىسىنىڭ باعاسى 360 مىڭنان 77 مىڭعا دەيىن تومەندەدى.

سونىمەن قاتار ءدارى-دارمەكتەر وزگە دە پروفيلدەر بويىنشا ايتارلىقتاي ارزاندادى. وسىلايشا، انتيبيوتيك تسەفەپيم بويىنشا بيۋدجەتتى ۇنەمدەۋ 174 ملن تەڭگەنى (-40%), ال يممۋنوبيولوگيالىق پرەپارات ەكۋليزۋماب بويىنشا – 424 ملن تەڭگەنى (-18%) قۇرادى.

ەڭ جوعارى بيۋدجەتتىك تيىمدىلىكتى قامتاماسىز ەتەتىن توپ-10 پرەپاراتقا بەۆاتسيزۋماب، يماتينيب، سورافەنيب جانە سۋنيتينيب سياقتى پرەپاراتتار كىردى. سونداي-اق ينسۋلين دەگلۋدەك، مەتوترەكسات، ەلترومبوپاگ، بۋدەسونيد جانە يوپروميد باعاسى ايتارلىقتاي تومەندەدى.

وزگەرىستەر بولشەك ساۋدا نارىعىنا دا اسەر ەتتى. 4 900 ءدارى-دارمەكتىڭ باعاسى قايتا قارالدى. قازان-قاراشا ايلارىندا ءدارىحانالاردىڭ مونيتورينگى تانىمال پرەپاراتتاردىڭ قۇنى ورتا ەسەپپەن 12%-عا تومەندەگەنىن كورسەتتى. مىسالى، «تسەفاپس» پرەپاراتى 31%-عا، «زيتماك» – 20%-عا، ال «رەۆموكسيكام» – 32%-عا ارزاندادى.

دەنساۋلىق ساقتاۋ مينيسترلىگىنىڭ مالىمەتىنشە، نەگىزگى وتاندىق وندىرۋشىلەر جاڭا ەرەجەلەرگە بەيىمدەلىپ، ءدارى-دارمەكتەر جەلىسىنىڭ باعاسىن تومەندەتىپ ۇلگەرگەن. ۇنەمدەلگەن قاراجاتتار ەڭ الدىمەن العاش رەت انىقتالعان پاتسيەنتتەردىڭ قوسىمشا قاجەتتىلىكتەرىن قامتاماسىز ەتۋگە جۇمسالماق. جالپى العاندا، جاڭا باعا بەلگىلەۋ مودەلى تۇراقتى جانە بولجامدى نارىقتى قالىپتاستىرىپ، جەتكىزۋ قاۋىپسىزدىگىن نىعايتادى جانە سىرتقى باعا اۋىتقۋلارىنا تاۋەلدىلىكتى تومەندەتەدى. مينيسترلىك قول جەتكىزىلگەن ناتيجەلەردى بەكىتۋ باعىتىندا جۇمىستى جالعاستىرادى.

Abai.kz