پرەمەر-مينيستر ولجاس بەكتەنوۆ مەملەكەت باسشىسىنىڭ «تازا قازاقستان» باستاماسىن جۇزەگە اسىرۋ ماسەلەلەرى جونىندە كەڭەس وتكىزدى. بۇل تۋرالى ۇكىمەتتىڭ ءباسپاسوز قىزمەتى حابارلادى. 

ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ تابيعاتتى قورعاۋ ءىس-شارالارىن جۇرگىزۋ، اعاش وتىرعىزۋ، زاڭسىز قوقىس الاڭدارىن جويۋ، قتق وڭدەۋ جوبالارىن جۇزەگە اسىرۋ تۋرالى بايانداماسى تىڭدالدى. سونداي-اق پرەمەر-ءمينيستردىڭ ورىنباسارى — مادەنيەت جانە اقپارات ءمينيسترى ايدا بالاەۆا، عىلىم جانە جوعارى ءبىلىم ءمينيسترى ساياسات نۇربەك، وقۋ-اعارتۋ ءمينيسترى جۇلدىز سۇلەيمەنوۆا حالىق اراسىندا ەكولوگيالىق مادەنيەتتى قالىپتاستىرۋ ماسەلەلەرى بويىنشا ءسوز سويلەدى.

— پرەزيدەنتىمىزدىڭ «تازا قازاقستان» باستاماسى كەڭ اۋقىمدى جالپىۇلتتىق قوزعالىسقا اينالدى. ماسەلە تەك اعاش وتىرعىزۋ جانە قوقىس تازارتۋ تۋرالى بولىپ وتىرعان جوق. تابيعاتتى قورعاۋ يدەياسىنا بۇكىل قوعامدى بىرىكتىرۋ، جايلى دا تازا قورشاعان ورتا قالىپتاستىرۋ ىسىنە ءاربىر ادامنىڭ بەلسەندى قاتىسۋى — ءبىزدىڭ جۇمىسىمىزدىڭ باستى ناتيجەسى بولۋعا ءتيىس.

تابيعي بايلىقتى ساقتاۋ، اۋا مەن سۋدىڭ تازىلىعىن قامتاماسىز ەتۋ، رەسۋرستاردى ۇتىمدى پايدالانۋ — ءبىزدىڭ الدىمىزدا تۇرعان باسىم مىندەتتەر. مەملەكەت باسشىسىنىڭ باستاماسى ءبىر كۇندىك ناۋقان ەمەس، جاڭا ەكولوگيالىق مادەنيەتتى، سونداي-اق ازاماتتارىمىزدىڭ كۇندەلىكتى ءومىر سالتىن قالىپتاستىرۋعا باعىتتالعان تۇراقتى جۇمىس، — دەپ اتاپ ءوتتى پرەمەر-مينيستر ولجاس بەكتەنوۆ.

«تازا قازاقستان» باعدارلاماسى اياسىندا بيىل رەسپۋبليكا بويىنشا 1 250 ەكولوگيالىق ءىس-شارا وتكىزىلدى، ونىڭ ىشىندە اۋماقتاردى جيناۋ، كوگالداندىرۋ جانە ەكولوگيالىق اعارتۋ جۇمىستارى جۇرگىزىلدى. 2,8 ملن-نان استام اعاش وتىرعىزىلدى، 1 ملن گەكتاردان استام جەر تازارتىلدى، شامامەن 800 مىڭ توننا قالدىق جينالدى. وسىلايشا، «تازا قازاقستان» اكتسياسىنىڭ ناتيجەسىندە كوممۋنالدىق شارۋاشىلىقتىڭ جۇرگىزىلىپ جاتقان قىزمەتىمەن بىرلەسىپ قالالار مەن اۋىلداردا 3,8 ملن اعاش وتىرعىزىلدى. بۇگىنگى تاڭدا 18 ملن-نان استام اعاش وتىرعىزىلدى، بۇل پرەزيدەنتتىڭ 2025 جىلعا دەيىن ەلدى مەكەندەردە 15 ملن كوشەت وتىرعىزۋ مىندەتىنە جاۋاپ بەرەدى.

زاڭسىز قوقىس الاڭدارىن جويۋ جۇمىستارى جالعاسۋدا. قۇقىق قورعاۋ ورگاندارىمەن بىرلەسە 1 300-دەن استام ءموبيلدى توپ جۇمىس ىستەۋدە. بيىل عارىشتىق مونيتورينگ ارقىلى 3 833 پوليگون انىقتالدى، ولاردىڭ 80%-ى جويىلدى. 165 لاۋازىمدى تۇلعا اكىمشىلىك جاۋاپكەرشىلىككە تارتىلىپ، جالپى 12,4 ملن تەڭگە كولەمىندە ايىپپۇل سالىندى.

Abai.kz