جۋىردا «جاس الاش» گازەتىندە جاريالانعان ءبىر ماتەريالعا كوزىم ءتۇستى. تاقىرىبى – «كىتاپ وقىمايتىن قوعام: جالعان ستاتيستيكاعا جاسىرىنعان شىندىق». تالقىعا باسپاگەر شىڭعىس مۇقان، جازۋشى-باسپاگەر ارمان المەنبەت، كىتاپحانا قىزمەتكەرى ايدوس بەكتۇرسىن ءۇن قوسىپتى.

كوتەرىلگەن ماسەلە شىنىندا دا وزەكتى. جۇرتشىلىقتى، اسىرەسە جاس جەتكىنشەكتەردى الەۋمەتتىك جەلىنىڭ جەتەگىنە جىبەرمەي، كىتاپ وقۋعا باۋلۋ – بارىمىزگە ورتاق ءىس، ورتاق جاۋاپكەرشىلىك. سوندىقتان بۇل باعىتتاعى كەز-كەلگەن يدەيا، كەز-كەلگەن باستاما قولداۋعا لايىقتى.

كىتاپ وقۋ مادەنيەتىن دامىتۋ، كىتاپقۇمار قوعامعا، وقۋ-بىلىمگە قۇشتار ۇلتقا اينالۋ – بۇگىنگى كۇننىڭ باستى تالابى. مەملەكەت باسشىسى ايتقانداي، «وزىق ويلى ۇلت بولۋدىڭ توتە جولى – كىتاپ وقۋ». بۇل – دالەلدەۋدى قاجەت ەتپەيتىن اكسيوما. بىراق...

بىراق مەملەكەت ەشكىمدى كىتاپ وقۋعا مىندەتتەي المايدى. مەملەكەتتىڭ مىندەتى – وسىعان نەگىز بولاتىن العىشارتتاردى جاساۋ. ياعني، وقىرماننىڭ قاجەتتىلىگىن وتەيتىن كىتاپتار باسىپ شىعارۋ، شەتەلدىڭ ۇزدىك تۋىندىلارىن اۋدارۋ، وقۋعا قولايلى جاعداي جاساۋ، وقۋ-ءبىلىمدى ناسيحاتتاۋ، ىنتالاندىرۋ. ءسويتىپ جالعاسا بەرەدى.

سوڭعى ۋاقىتتا جۇرگىزىلگەن جۇيەلى جۇمىستار وسى ماقساتقا ارنالعانىن اتاپ وتكەن ءجون. ماسەلەن، پرەزيدەنت باستاماسىمەن 23 ءساۋىر ۇلتتىق كىتاپ كۇنى بولىپ بەكىتىلدى. ءاربىر قازاقستاندىق وقۋعا ءتيىس 100 كىتاپتىڭ ءتىزىمى ايقىندالدى. «بالالار كىتاپحاناسى» جوباسى قولعا الىندى. Amanat پارتياسى «كىتاپ-Amanat» جوباسىن جۇزەگە اسىرىپ جاتىر. الماتىداعى بىرنەشە كىتاپحانانىڭ وقۋ زالى 24/7 جۇمىس رەجيمىنە كوشىرىلدى. پرەزيدەنت يدەياسى بويىنشا تاۋلىك بويى جۇمىس ىستەيتىن زاماناۋي كىتاپحانانىڭ قۇرىلىسى باستالماق.

قازىر كوپشىلىككە ارنالعان كىتاپحانالاردىڭ قورىندا 72 ميلليوننان استام قۇجات بار. بيىلدىڭ وزىندە ولاردىڭ قورى جاڭادان 1 029 568 باسپا ونىمىمەن تولىقتى. تسيفرلىق فورماتتاعى كىتاپتاردىڭ قورى دا مولايا ءتۇستى. بۇگىندە كىتاپحانالاردىڭ قورىندا 2,2 ميلليوننان استام ەلەكتروندى ءونىم تىركەلگەن. بۇعان قوسا ونلاين وقۋعا ارنالعان ءتۇرلى پلاتفورمالار جۇمىس ىستەيدى.

قىسقاسى، وقيمىن دەگەن جانعا مۇمكىندىك مول، ءتيىستى جاعداي جاسالعان. ەندى جاپپاي كىتاپ وقۋ مادەنيەتىن قالىپتاستىرساق نۇر ۇستىنە نۇر بولار ەدى. سوندىقتان قوعامدىق دەڭگەيدە كىتاپقا دەگەن قولجەتىمدىلىك پەن قىزىعۋشىلىقتى ارتتىرۋ، كوپشىلىككە ۇلگى بولاتىن وقىرماندار ورتاسىن قالىپتاستىرۋ ماڭىزدى. بۇل – بارىمىزگە ورتاق ءىس.

ەرلان قارين،

قازاقستان رەسپۋبليكاسىنىڭ مەملەكەتتىك كەڭەسشىسى

Abai.kz