قۇلاققاعىس

وقۋدى ۇزدىك بىتىرگەندەرگە سوۆەت وداعى تۇسىندا قىزىل ديپلوم تاپسىرىلاتىن بولسا، سول ءۇردىس كۇنى بۇگىنگە دەيىن جالعاسىپ كەلەدى. 

ساكەن سەيفۋليننىڭ كوممۋنيستىك سالەممەن ستالينگە جازعان حاتىنا قاراعاندا، پويىزبەن ورىنبورعا قايتىپ كەلە جاتقاندا الاش ارىسى ەلدەس ومارۇلى ساكەنگە: «بۇرىن الاشوردا ەدىك، ەندى قىزىلوردا بولدىق. قازاق ءۇشىن قىزىل، جاسىل، اق ءتۇستىڭ ايىرماسى جوق. ەڭ باستىسى وردانىڭ باۋىرى ءبۇتىن بولعانى» – دەگەن ەكەن. بۇل الاش ارداقتىلارىنىڭ ەڭ سوڭعى ۇلتتىق قۋانىشتارىنىڭ ءبىرى ەدى» («اباي-اقپارات» پورتالىنان)

قىزىل ديپلوم قىزىل تۋمەن تۇستەس، سوۆەت يمپەرياسىنىڭ سيمۆولى. قىزىل اققان قاننىڭ ءتۇسى رەتىندە كەشەگى اشارشىلىق پەن قاندى قىرعىندى ەسكە سالادى. تاۋەلسىز قازاق ەلى بۇگىن كوك تۋىن جەلبىرەتىپ وتىرعاندا نەگە ونىڭ ءتۇسىن كوك قىلماسقا؟!

ديپلومنىڭ قىزىل نەمەسە كوك بولۋى كوپ كىسىگە ونشا ماڭىزدى دا ەمەس دەگەن پىكىرلەر بار. الايدا، قولىنا ديپلوم العان جاس ماماننىڭ كوكىرەگىندەگى ەلى ءۇشىن ماقتانىش سەزىمى مەملەكەتتىك تۋ كوتەرگەن سەكىلدى پاتريوتتىق بيىكتە بولعانى ورىندى ەمەس پە؟

كوك قازاق ۇعىمىندا قاستەرلى ءتۇس. اسپان دا كوك، جاڭا شىققان شالعىن دا كوك. ءبىزدىڭ قازىرگى تولقۇجاتىمىزدىڭ دا ءتۇسى كوك.

قازاقتا: «بىرەۋدىڭ قاڭسىعى بىرەۋگە تاڭسىق» دەگەن ءسوز بار. جوعارعى وقۋ ورنىن بىتىرۋشىلەر ءجيى قولداناتىن، توبەسى ءتورت بۇرىشتى بولىپ كەلەتىن باس كيىم قازىرگى ۋاقىتتا مودا بولىپ كەتكەن سەكىلدى. كەزىندە موناحتار مەن شىركەۋ قىزمەتشىلەرى كيگەن مانتيا ەندى وقۋ ورىندارىنا كوشىپ الىپتى. ەلىكتەۋ-سولىقتاۋدان ارىلا الماعاندار  سونى دا تاڭسىق كورەدى. قازاقتا بۇرىن-سوڭدى بولماعان مۇنداي باس كيىمنىڭ ءبىزدىڭ ۇلتقا نە قاجەتى بار؟

وسى تۋرالى مينيسترلىك شەنەۋنىكتەرىنە قۇلاققاعىس قىلعىمىز كەلەدى.

اقىلبەك شاياحمەت،

احمەت بايتۇرسىنۇلى اتىنداعى قوۋ پروفەسسورى

Abai.kz