قازاقستان رەسپۋبليكاسىنىڭ اقش-تاعى ەلشىسى ماعجان ءىلياسوۆ پرەزيدەنت دونالد ترامپقا سەنىم گراموتاسىن تاپسىرۋ راسىمىنەن كەيىن ەكەۋى از-كەم اڭگىمەلەستى. امەريكا باسشىسى بيىل قاراشا ايىندا قاسىم-جومارت توقاەۆپەن اق ۇيدەگى كەزدەسۋدەن العان اسەرىمەن ءبولىستى.

«قۇراما شتاتتار كوشباسشىسى قازاقستان پرەزيدەنتىنە جىلى لەبىزىن جولداپ، ونى قۇرمەتتەيتىنىن اتاپ ءوتتى. سونداي-اق قاسىم-جومارت توقاەۆتى «حالىقارالىق ۇدەرىستەردى تەرەڭ بىلەتىن ءارى جان-جاقتى تۇسىنەتىن تاجىريبەلى مەملەكەت قايراتكەرى، كەرەمەت ادام» دەپ سيپاتتادى. اقش پرەزيدەنتى مەملەكەت باسشىسىنا سىي-سىياپات جولدادى. ولاردىڭ اراسىندا اق ءۇيدىڭ سيمۆوليكالىق كىلتى مەن ءوزىنىڭ قولتاڭباسى قويىلعان بەيسبولكا دا بار»، - دەپ حابارلادى قر پرەزيدەنتىنىڭ ءباسپاسوز حاتشىسى ءارى كەڭەسشىسى رۋلان جەلدىباي.

ترامپ الەمدە توپىرلاتىپ ەلشىلەرىن اۋىستىرماق. افريكا، ازيا، ەۋروپا، وڭتۇستىك امەريكاداعى 48 ەلدىڭ ەلشىسىن اۋىستىرۋدى ءجون كورىپ وتىر. وسىلايشا ول بايدەن بيلىگى تاعايىنداپ كەتكەن ەلشىلەردى الىپ تاستاپ، ءوزى جاڭا ەلشىلەر قويماق. بۇل جالپى اقش ساياساتىندا بار تاجىريبە. پرەزيدەنت اۋىسقان كەزدە ەلشىلەردى دە اۋىستىرىپ جاتادى.

ەلشى دەمەكشى... ەلدەستىرمەك قاشاندا ەلشىدەن عوي. ەلشى جاڭادان تاعايىندالعاننان كەيىن سول ەلدىڭ باسشىسىنا سەنىم گراموتاسىن تاپسىرۋى ءتيىس. بۇل – حالىقارالىق ديپلوماتيادا بەكىتىلگەن حاتتاما. قازان ايىندا قازاقستان اقش-تاعى ەلشىنى اۋىستىردى. ماعجان ءىلياسوۆ اقش-تاعى قازاقستاننىڭ توتەنشە جانە وكىلەتتى ەلشىسى لاۋازىمىنا تاعايىندالدى. الگىندە قازاقستان ەلشىسى اق ءۇي باسشىسى دونالد ترامپقا سەنىم گراموتاسىن تاپسىرعان ەدى.

ترامپ ءراسىم بارىسىندا قازاقستان پرەزيدەنتىنە سىيلىق بەرىپ جىبەرىپتى. ونىڭ ىشىندە اق ءۇيدىڭ سيمۆوليكالىق كىلتى، قولتاڭباسى قويىلعان بەيسبولكا بار. نەگىزى اق ءۇيدىڭ كىلتى دەگەن ترامپ شىعارعان سيمۆوليكالىق قۇرمەتى. بۇل سىيلىعى سەنىمنىڭ، ديپلوماتيالىق تىلدە قۇرمەتتىڭ، ارىپتەستىك پەن سەرىكتەستىكتىڭ بەلگىسى سانالادى.

اقش-تىڭ باسىلىمدارى بۇل سىيلىقتى العان ادام ترامپ اكىمشىلىگى ءۇشىن «جاقىن»، سەنىمدى سەرىكتەس دەگەندى بىلدىرەتىنىن جازعان ەدى. بىرەۋى – نەتانياحۋ، ەكىنشىسى – يلون ماسك، ءۇشىنشىسى – رونالدۋ، ءتورتىنشىسى –يلحام اليەۆ، بەسىنشىسىن – ۆلاديمير زەلەنسكيگە (تامىزدا «تاتۋلاسۋ بەلگىسى» رەتىندە) بەرگەن ەدى. ەندى مىنە قازاقستان پرەزيدەنتىنە دە وسى سىيلىعىن بەرىپ جىبەرىپتى.

ترامپ ءۇشىن ورتالىق ازيا ەلدەرىنىڭ ىشىندە قازاقستان ايرىقشا ورىن الادى. ەكونوميكالىق، ساياسي بايلانىستاردان بولەك، ءبىز وسى ايماقتا العاش بولىپ «يبراھيم كەلىسىمدەرىنە» قوسىلدىق. ال بۇل ترامپ ءۇشىن وتە ماڭىزدى. جاقىندا وسى كەلىسىمگە رەسمي قوسىلۋ ءراسىمى بولاتىن شىعار. وسى كەلىسىمدى پايدالانىپ، ترامپتىڭ اكىمشىلىگىمەن باسقا سالالاردا دا ارىپتەستىك ارتتىرۋدى كەڭ تالقىلاۋعا بولادى.

Abai.kz