اتالعان فاكتىلەر بويىنشا سوتقا دەيىنگى تەرگەۋ امالدارى باستالدى.

قارجىلىق مونيتورينگ اگەنتتىگى "بىرىڭعاي جيناقتاۋشى زەينەتاقى قورى" اق-دان ازاماتتاردىڭ زەينەتاقى جيناقتارىن زاڭسىز شىعارۋ دەرەكتەرى بويىنشا ستوماتولوگيالىق كلينيكالاردىڭ باسشىلارى مەن وزگە دە تۇلعالارعا قاتىستى سوتقا دەيىنگى تەرگەپ-تەكسەرۋدى جالعاستىرىپ جاتىر، دەپ حابارلايدى inbusiness.kz سايتى.

اگەنتتىك مالىمەتىنشە، زەينەتاقى جيناقتارى ستوماتولوگيالىق قىزمەتتەر كورسەتۋ تۋرالى فورمالدى شارتتار جاساسۋ جانە كەيىننەن جالعان مەديتسينالىق قۇجاتتار ۇسىنۋ ارقىلى شىعارىلعان.

اتالعان "قىزمەت" ءۇشىن كۇدىكتىلەر الىنعان قاراجاتتىڭ 10%-دان 20%-عا دەيىنگى مولشەرىندە زاڭسىز سىياقى ۇستاپ وتىرعان.

قىلمىستىق سحەماعا 42 ستوماتولوگيالىق كلينيكا تارتىلعان. الدىن الا مالىمەتتەرگە سايكەس، جالپى سوماسى 200 ملرد تەڭگەدەن استام قاراجات زاڭسىز شىعارىلعان.

"قىلمىستىق جولمەن الىنعان تابىستارعا كۇدىكتىلەر ەليتالىق جىلجىمالى جانە جىلجىمايتىن مۇلىك ساتىپ العان، سونداي-اق قاراجاتتى جاسىرۋ ماقساتىندا مۇلىكتى ءۇشىنشى تۇلعالاردىڭ اتىنا راسىمدەپ، جاڭا ستوماتولوگيالىق كلينيكالار اشقان.

قازىرگى ۋاقىتتا 11 كۇدىكتى ەكى اي مەرزىمگە قاماۋعا الىنعان، ال ءۇش ادامعا قاتىستى ۇيقاماق تۇرىندەگى بۇلتارتپاۋ شاراسى تاڭدالعان", – دەپ جازدى اگەنتتىكتەن.

سونىمەن قاتار جۇيەلى تۇردە زاڭسىز سىياقى الۋ ماقساتىندا مەديتسينالىق مەكەمەلەردىڭ بىرقاتار دارىگەرلەرى دارىگەرلىك-كونسۋلتاتسيالىق كوميسسيالاردىڭ (دكك) جالعان قورىتىندىلارىن بەرگەنى انىقتالعان. بۇل ەپيزودتار بويىنشا كۇدىكتىلەردەن الىنعان قاراجاتتىڭ جالپى سوماسى 30 ملن تەڭگەنى قۇرادى.

Abai.kz