اقش اسكەرلەرىنىڭ ۆەنەسۋەلا پرەزيدەنتى نيكولاس مادۋرونى تۇتقىنداۋى ەلدىڭ بەس ادامنان تۇراتىن بيلىك قۇرىلىمىن شايقالتقان.

بۇل بەس ادام: مادۋرو جانە ونىڭ ايەلى سەليا فلورەس، ۆيتسە-پرەزيدەنت دەلسي رودريگەس جانە ونىڭ اعاسى پارلامەنت توراعاسى حورحە رودريگەس جانە ىشكى ىستەر ءمينيسترى ديوسدادو كابەلو.

بيلىك قۇرىلىمىندا ولاردىڭ ارقايسىسىنىڭ ءوز سالماعى بولعان، بىراق مادۋرو تەپە-تەڭدىكتى ساقتاۋداعى نەگىزگى تۇلعا. ەندى مادۋرامەن ايەلى تۇرمەگە قامالعاندىقتان قالعانىنىڭ بولاشاعى بۇىڭعىر.

بۇگىندە مادۋرونىڭ قولىنا كىسەن سالىنىپ، كوزى بايلانعان تۇتقىن بەينەسى الەمدى كەزىپ كەتتى. بىراق بىرنەشە كۇن بۇرىن عانا ول ونلاين ءسوز سويلەپ، ايەلى سەليا فلورەسپەن بىرگە «سوعىس بولماسىن، ءبىز بەيبىتشىلىكتى قالايمىز!» دەپ بيلەپ جۇرگەن ەدى.

قاراشاداعى ميتينگتە ول: «مەنى ەشكىم توقتاتا المايدى!» دەپ ايقايلادى. مادۋرونى سايلاۋشىلار قولاماسا دا، اسكەريلەردىڭ قولداۋىنىڭ ارقاسىندا ىشكى قارسىلىقتى ءساتتى جويىپ، وپپوزيتسيانى تەمىر جۇدىرىقپەن تۇنشىقتىرىپ ەلدەن قۋدى..

ول سونداي-اق ءوزىنىڭ الدىنداعى تالىمگەرى ۋگو چاۆەسكە ەلىكتەپ، جەكە باس كۋلتى ارقىلى «بەرىلمەيتىن» بەينەنى قالىپتاستىردى.

قابىرعا سۋرەتتەرى، اندەر جانە ومىرباياندىق فيلمدەر ونىڭ جەتىستىكتەرىن ماداقتادى، ءتىپتى «يمپەرياليزمگە» قارسى كۇرەسەتىن سۋپەرقاھارمانعا ۇقساس تۇلعانىڭ تاريحىن باياندايتىن «سۋپەر ساقال» انيماتسيالىق سەريالدا بار.

سونىمەن قاتار، نيكولاس مادۋرونىڭ ايەلىنىڭ ۇلگىسىندەگى «سۋپەر سەليا» اتتى ايەل سۋپەرقاھارمان كوپشىلىكتىڭ نازارىنان تۇسپەيدى.

قورعانىس ءمينيسترى گەنەرال ۆلاديمير پادرينو لوپەستىڭ باسشىلىعىمەن ەلدىڭ اسكەري كۇشتەرى مادۋروعا «تولىق ادالدىق» تۋرالى بىرنەشە رەت انت بەردى.

اعالى-قارىنداستى رودريگەسرتەر ءاردايىم مادۋرونىڭ ىشكى بيلىك شەڭبەرىنىڭ مۇشەلەرى بولعان.

قازىرگى ۋاقىتشا پرەزيدەنت دەلسي رودريگەس ەكونوميكانى دا، مۇناي ونەركاسىبىن دە باسقارادى. ونىڭ اعاسى حورحە رودريگەس ۇلتتىق اسسامبلەيانىڭ سپيكەرى قىزمەتىن اتقارادى جانە وپپوزيتسيامەن جانە امەريكا قۇراما شتاتتارىمەن باس كەلىسسوز جۇرگىزۋشى بولىپ تابىلادى.

ەكەۋى دە «ەل جاۋلارىنا» قارسى وتتى ريتوريكاسىمەن تانىمال، بىراق كورىنىس ارتىندا ولار پراگماتيكالىق جانە ديپلوماتيالىق ۇستانىمدا.

بىرنەشە ساراپشىلاردىڭ پىكىرىنشە، ولار تاپقىر ستراتەگتەر رەتىندە ۇكىمەت ىشىندەگى تازارتۋلاردى ۇيىمداستىردى، مىسالى، باستاپقىدا 2023 جىلى مەرزىمى اياقتالۋى ءتيىس بەدەلدى مۇناي ءمينيسترى تارەك ءايساميدى تۇرمەگە قامادى. ونىڭ ورنىنا كىم كەلدى؟ ءدال دەلسي رودريگەس.

ساراپشى پەدرو بەنيتەس: « اعايىندى رودريگەستەر مادۋرونىڭ بارلىق ىشكى تازارتۋلارىنا قاتىستى، ولاردىڭ كومەگىمەن مادۋرو وزىنە قاۋىپ توندىرەتىن بيلىك توپتارىن جويدى»، - دەيدى.

«بەس ادامنان تۇراتىن توپتىڭ» بەسىنشى مۇشەسى - ىشكى ىستەر ءمينيسترى ديوسدادو كابەللو. ۆەنەسۋەلاداعى بۇل قورقىنىشتى تۇلعا ۋگو چاۆەستىڭ قارۋلاسى، چاۆەسيزمنىڭ سيمۆوليكالىق تۇلعاسى جانە مادۋرونىڭ ارتىندا تۇرعان ۆەنەسۋەلا بىرىككەن سوتسياليستىك پارتياسىنىڭ (بسبپ) جەتەكشىسى.

مادۋرونىڭ نارازىلىقپەن قايتا سايلانعاننان كەيىن جانە ۇكىمەت تاراعاننان كەيىن كابەللو ىشكى ىستەر ءمينيسترى بولىپ تاعايىندالدى. ول قاتىگەزدىكپەن قۋدالاۋ ۇيىمداستىرىپ، حالىق اراسىندا قورقىنىشتى ۇرەي تۋدىردى.

ساراپشىلار كابەللونى چاۆەسيزمنىڭ ەڭ راديكالدى مۇشەلەرىنىڭ ءبىرى دەپ سانايدى، كەيبىرەۋلەر رودريگەس وتباسىنىڭ پراگماتيزمىمەن كەلىسپەۋشىلىگ بار دەپ بولجايدى، دەگەنمەن ەكى تاراپ تا مۇنى جوققا شىعارادى.

كابەلەللو 2002 جىلى چاۆەستى بيلىكتەن تايدىرعان ءساتسىز توڭكەرىس ارەكەتى كەزىندە بىرنەشە ساعات بويى پرەزيدەنت قىزمەتىن قىسقا مەرزىمگە اتقاردى.

دەگەنمەن، قازىر ونىڭ جاعدايى وزگەردى: ول مادۋرو ءىسى بويىنشا اقش سوت جۇيەسى ايىپتاعان التى ادامنىڭ ءبىرى، اقش ونى ۇستاۋ ءۇشىن 25 ميلليون دوللار سىياقى ۇسىندى. ونىڭ دا مادۋرو سياقتى امەريكادا سوتقا تارتىلۋ قاۋپى بار.

بۇل "بەستىكتىڭ" ىشىندە قازىرشە اعايىندى رودريگەستەردىڭ جولى بولىپ تۇر. ولار ورىن تاعىنان ايرىلعان جوق.

كەشە امەريكانىڭ NBC تەلەارناسى اقش بارلاۋ قىزمەتىنە مادۋرو تۋرالى بارلىق مالىمەتتى بەرگەن ىشكى جانسىزدىڭ اعايىندى رودريگستەر ەكەنىن مالىمدەدى. پرەزيدەنت ترامپ ۆيتسە-پرەزيدەنت دەلسي رودريگەسپەن مادۋرو تۇتقىندالعاننان كەيىن عانا ءتىل تابىسقاندارىن العا تارتۋدا.

Abai.kz