ەلىمىزدىڭ گيدروەنەرگەتيكالىق رەسۋرستارى كارتاسىن ازىرلەۋ بويىنشا جۇمىستار باستالدى. بۇل تۋرالى ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىندا ءمالىم ەتتى.

– پلاتفورما گيدرولوگيالىق، جەر بەدەرى، ينفراقۇرىلىمدىق جانە قۇقىقتىق دەرەكتەردى بىرىكتىرىپ، وڭتايلى جوبالىق شەشىمدەردى قالىپتاستىرۋعا، بولاشاق ستانتسيالاردىڭ پارامەترلەرىن ەسەپتەۋگە جانە جوبالاۋعا دەيىنگى دايىندىق مەرزىمدەرىن قىسقارتۋعا مۇمكىندىك بەرەدى، – دەدى ەنەرگەتيكا ءمينيسترى.

ءوز كەزەگىندە سۋ رەسۋرستارى ءمينيسترى نۇرجان نۇرجىگىتوۆ مەملەكەتتىك سۋ شارۋاشىلىعى ساياساتىنىڭ ۇزاق مەرزىمدى جوسپارلاۋ قۇجاتتارىن ازىرلەپ جاتقانىن جەتكىزدى. بۇل قۇجاتتاردا سۋ بالانسى جاڭارتىلىپ، ەلدىڭ گيدروالەۋەتىنە باعا بەرىلەدى.

– ءبىرىنشى كەزەڭدە سۋ رەسۋرستارىن قورعاۋ جانە پايدالانۋ جونىندەگى باسسەيندىك جوسپارلار ازىرلەنەدى، ولاردى 2026 جىلدىڭ سوڭىنا دەيىن اياقتاۋ جوسپارلانعان. باسسەيندىك جوسپارلار ازىرلەنگەن سوڭ، سۋ رەسۋرستارىن ينتەگراتسيالانعان باسقارۋدىڭ باس جوسپارىن ازىرلەۋ باستالادى. ونى 2027 جىلدىڭ 3-ءشى توقسانىندا اياقتاۋدى جوسپارلاپ وتىرمىز، – دەدى سۋ رەسۋرستارى ءمينيسترى.

بولجامدى سۋ بالانسى بەكىتىلگەنشە مينيسترلىك ەنەرگەتيكا مينيسترلىگى جانە جەكە ينۆەستورلارمەن بىرلەسىپ، گەس جانە گاەس قۇرىلىسى بويىنشا جۇمىستار جۇرگىزىپ جاتىر.

– بيىل وگەم وزەنىندە گيدروەلەكترستانتسيالار كاسكادى بار سۋ قۇبىرىن سالۋ جونىندەگى ينۆەستيتسيالىق جوبا بويىنشا جوبالىق قۇجاتتاما ازىرلەۋدى باستادى، ول مەملەكەتتىك-جەكە ارىپتەستىك نەگىزىندە جۇزەگە اسىرىلادى. جوبانىڭ قۇنى 191,7 ملرد تەڭگە جانە جىل سايىن 110 ملن تەكشە مەتر اۋىزسۋ بەرىپ، 72 مۆت/ساع ەلەكتر ەنەرگياسىن ءوندىرۋدى كوزدەيدى، – دەدى ن. نۇرجىگىتوۆ.

بۇعان دەيىن ن. نۇرجىگىتوۆ سۋ ديپلوماتياسى ارال تەڭىزىن تولتىرۋعا كومەكتەسكەنىن ايتقان ەدى.

Abai.kz