2026 جىلعى 21 قاڭتاردا استانا قالاسىنىڭ قىلمىستىق ىستەر جونىندەگى اۋدانارالىق سوتى الاياقتىق جاسادى دەپ ايىپتالعان ن. جانە ا. ازاماتتارىنا قاتىستى ايىپتاۋ ۇكىمىن جاريالادى. ولار الدىن الا ءسوز بايلاسۋ ارقىلى ادامدار توبى بولىپ، اسا ءىرى مولشەردە، سونداي-اق قىزمەتتىك جاعدايىن پايدالانا وتىرىپ، ءىرى مولشەردە بوتەننىڭ مۇلكىن الداۋ جولىمەن يەمدەنۋ قىلمىسىن جاساعان دەپ تانىلدى (قك 190-ب. 4-ب. 2-ت. جانە 190-ب. 3-ب. 1-ت.).

ءىستىڭ ءمان-جايى

سوتپەن انىقتالعانداي، ن. «جشس» مەديتسينالىق ۇيىمىنىڭ قۇرىلتايشىسى بولا وتىرىپ، 2023 جىلعى ءساۋىر مەن شىلدە ايلارى ارالىعىندا مەديتسينالىق ساقتاندىرۋ قورىنىڭ اقشالاي قاراجاتىن جىمقىرۋ ماقساتىندا ازاماتتاردى ءوزىنىڭ مەديتسينالىق ۇيىمىنا جالعان تىركەۋدىڭ زاڭسىز ءتاسىلىن ۇيىمداستىرعان.

قىلمىستىق نيەتىن جۇزەگە اسىرۋ ءۇشىن ن. «ۇلتتىق دەنساۋلىق ساقتاۋدى دامىتۋ عىلىمي ورتالىعىنىڭ» استانا قالاسىنىڭ بولىمشەسىنىڭ مامانى ا.-عا اقشالاي سىياقى ءۇشىن ازاماتتاردى تىركەۋ بويىنشا جالعان وتىنىشتەردى زاڭسىز ماقۇلداپ، بەكىتۋدى ۇسىنعان.

ا. بۇل ۇسىنىسقا كەلىسىپ، ءوزىنىڭ قىزمەتتىك جاعدايىن پايدالانا وتىرىپ، جالعان وتىنىشتەردى بەكىتكەن.

قىلمىستىق ارەكەتتەردىڭ ناتيجەسىندە «جشس» مەديتسينالىق ۇيىمىنا 15 مىڭنان استام ازامات جالعان تۇردە تىركەلىپ، بۇل  مەديتسينالىق ساقتاندىرۋ قورىنىڭ قاراجاتىن زاڭسىز الۋعا اكەپ سوققان. مامانداردىڭ قورىتىندىسىنا سايكەس، قورعا شامامەن 80 ملن تەڭگە كولەمىندە اسا ءىرى مولشەردە زالال كەلتىرىلگەن، ونىڭ ىشىندە 7,5 ملن تەڭگە ا.-نىڭ تىكەلەي ارەكەتتەرىنەن كەلتىرىلگەن ماتەريالدىق زالالدى قۇرايدى. زاڭسىز جولمەن الىنعان اقشالاي قاراجات ن. مەن ا. اراسىندا بولىنگەن.

تاراپتاردىڭ ۇستانىمدارى

پروكۋرور ن.-عا 5 جىلعا باس بوستاندىعىنان ايىرۋ، ال ا.-عا 2 جىل 8 ايعا باس بوستاندىعىنان ايىرۋ جازاسىن تاعايىنداۋدى سۇرادى.

سوتتالۋشىلار كىنالارىن تولىق مويىندادى، قورعاۋ تاراپى شارتتى جازا تاعايىنداۋدى سۇرادى.

سوتتالۋشىلاردىڭ كىناسى وزدەرىنىڭ مويىنداۋ كورسەتۋلەرىمەن، جابىرلەنۋشى مەن كۋالاردىڭ ايعاقتارىمەن، سونداي-اق ماماننىڭ قورىتىندىسىمەن دالەلدەندى.

سوت ۇكىمى

قر قك 190-بابىنىڭ 4-بولىگى بويىنشا سانكتسيا – 5 جىلدان 10 جىلعا دەيىن باس بوستاندىعىنان ايىرۋ.
قر قك 190-بابىنىڭ 3-بولىگى بويىنشا سانكتسيا – 3 جىلدان 7 جىلعا دەيىن باس بوستاندىعىنان ايىرۋ.

سوت جەڭىلدەتەتىن ءمان-جايلار رەتىندە كامەلەتكە تولماعان بالالارىنىڭ بولۋىن، كىنانى مويىنداۋدى، شىن جۇرەكتەن وكىنۋدى جانە بۇرىن سوتتالماعانىن تانىدى.
اۋىرلاتاتىن ءمان-جايلار انىقتالعان جوق.

جاسالعان قىلمىستىڭ سيپاتى مەن اۋىرلىعىن، سونداي-اق اسا ءىرى مولشەردەگى زالالدىڭ وتەلمەگەنىن ەسكەرە وتىرىپ، سوت ن.-عا ورتاشا قاۋىپسىزدىك مەكەمەسىندە جازاسىن وتەۋ ارقىلى 5 جىلعا باس بوستاندىعىنان ايىرۋ جازاسىن تاعايىندادى.

ا.-عا 3 جىلعا باس بوستاندىعىنان ايىرۋ جازاسى تاعايىندالىپ، امنيستيا تۋرالى زاڭ نەگىزىندە جازا مەرزىمى 1/5-كە قىسقارتىلىپ، تۇپكىلىكتى تۇردە ورتاشا قاۋىپسىزدىك مەكەمەسىندە جازاسىن وتەۋ ارقىلى 2 جىل 4 ايعا باس بوستاندىعىنان ايىرۋ بولىپ وتەۋگە سوتتالدى.

ۇكىم زاڭدى كۇشىنە ەنگەن جوق.

Abai.kz