بالالار كونتەنتىنىڭ ساپاسى – ۇلت بولاشاعىنىڭ كەپىلى. بۇگىندە بالالارعا ارنالعان قازاقتىلدى ونىمدەردىڭ سانى ارتىپ، ۇلتتىق قۇندىلىقتاردى ناسيحاتتايتىن جوبالار كوبەيىپ كەلەدى. دەگەنمەن، مامانداردىڭ ايتۋىنشا، ەندىگى باستى مىندەت – ساننان ساپاعا كوشۋ.

وسىعان وراي ءبىز ساراپشى ءومارالى ادىلبەكۇلىنان بۇگىنگى قازاق بالالارى كورىپ جۇرگەن كونتەنت، «بالاپان» تەلەارناسىنىڭ بالا تاربيەسىندەگى ءرولى جانە بالالار كونتەنتىن دامىتۋ جولدارى تۋرالى پىكىرىن سۇرادىق.

سۋرەت: سپيكەردىڭ مۇراعاتىنان الىندى.

– قازاق بالالارىنىڭ ىشىندە اۋىلداعى بالالار كوبىنە «بالاپان» ارناسىن كورەدى. سول ارنادان كورسەتىلەتىن مۋلتفيلمدەردى تاماشالايدى. ال قالا بالالارى كوبىنەسە ورىس تىلىندەگى باعدارلامالاردى كورەدى. مىسالى، ءوز نەمەرەلەرىمنىڭ ءوزى مۋلتفيلمدەردىڭ بارلىعىن ورىس تىلىندە كورەدى. شىن مانىندە، قالا بالالارى ورىس تىلىندەگى باعدارلامالاردى قارايدى. سەبەبى ولار قىزىقتىراق جاسالعان. بالانى وزىنە قالاي تارتۋ كەرەكتىگىن جاقسى بىلەدى.

ال ءوزىمىزدىڭ «بالاپان» ارناسى اۋىل بالالارى ءۇشىن قىزىقتىراق. ونىڭ ۇستىنە، كوپتەگەن اۋىل بالاسىنىڭ ءتىلى وسى ارنا ارقىلى شىعىپ جاتىر. مەن وسىدان ءبىراز جىل بۇرىن موڭعولياعا بارعان بولاتىنمىن. سول جەردەگى قانداستارىمىزدىڭ بالالارى تەك «بالاپان» ارناسىن كورەدى ەكەن. اتا-انالارىنىڭ ءوزى: «ءتىلىمىزدى، اكتسەنتىمىزدى وسى «بالاپان» ارناسى ارقىلى تۇزەتىپ، جاتتىقتىرىپ جاتىرمىز»، – دەيدى.

«بالاپان» ارناسى ءوز ماقساتىن بەلگىلى ءبىر دارەجەدە ورىنداپ شىقتى. وتە جاقسى جۇمىس ىستەدى، ءوزىنىڭ تۇراقتى كورەرمەنىن قالىپتاستىردى دەۋگە بولادى. ەندى بۇل ارنانى زامان تالابىنا ساي قىزىقتىراق ەتىپ دامىتۋ كەرەك. جاڭا باعدارلامالاردى ەنگىزىپ، بالالاردى وزىنە تارتا تۇسسە، نۇر ۇستىنە نۇر بولار ەدى. ەسكى سارىندا قالىپ قويماعانى دۇرىس.

بالالار كونتەنتى بۇرىنعى جىلدارمەن سالىستىرعاندا وتە جاقسى دامىپ كەلەدى. ەندى ساننان ساپاعا وتەتىن ۋاقىت كەلدى. قازىرگى زامانعا ساي قىزىقتى، مازمۇندى، بالالاردىڭ تىلىندە سويلەيتىن، ولاردىڭ ويىمەن ويلايتىن باعدارلامالار كوپ بولسا، بالالاردىڭ ءوزىمىزدىڭ كونتەنتكە دەگەن قىزىعۋشىلىعى ارتار ەدى.

قازىر بىزدە ساننان ساپاعا وتۋگە مۇمكىندىك كوپ. قارجى جاعىنان بولسىن، باسقا دا مۇمكىندىكتەر قاراستىرىلىپ جاتىر. ناعىز ءوز ءىسىنىڭ مامانى، جىلىگىن شاعىپ، مايىن ىشكەن جاس ماماندارىمىز وتە كوپ. سولارعا مۇمكىندىك بەرسەك، بالالار ارناسى ودان ءارى دامي تۇسەر ەدى.

ءبىز وسى بالالار ارنالارى ارقىلى بولاشاق ۇرپاعىمىزدى تاربيەلەيمىز، قازاق ءتىلىنىڭ قولدانىس اياسىن كەڭەيتەمىز. سوندىقتان بالالارعا سالىنعان قارجى – بولاشاق ۇرپاققا سالىنعان ينۆەستيتسيا. ونىڭ قايتارىمى ءسوزسىز بولادى. سوندىقتان ساننان ساپاعا وتەتىن ۋاقىت الدەقاشان كەلدى.

توميريس ماراتقىزى

Abai.kz