ەندى 14 جاسقا دەيىنگى بالالارعا الەۋمەتتىك جەلىلەرگە كىرۋگە تىيىم سالىنۋى مۇمكىن. قازاقستان وقۋ-اعارتۋ مينيسترلىگىندە بالالاردىڭ ۇيالى تەلەفوندار مەن الەۋمەتتىك جەلىلەردى پايدالانۋىن شەكتەۋ جايلى قاراستىرىلىپ جاتىر. بۇل تۋرالى مينيستر جۇلدىز سۇلەيمەنوۆا مالىمدەدى.

ءمينيستردىڭ ايتۋىنشا، ۆەدومستۆودا بالالاردى ينتەرنەتتەگى قاۋىپتى جانە زاڭسىز كونتەنتتەن قورعاۋدىڭ ءتۇرلى جولدارىن زەرتتەيتىن جۇمىس توبى قۇرىلعان. قازىر ناقتى شەشىم قابىلدانعان جوق. ماسەلە ءالى تالقىلاۋ ساتىسىندا. مينيستر وسىنداي شارالاردىڭ باسقا ەلدەردە دە بار ەكەنىن اتاپ ءوتتى.

مىناداي شەكتەۋلەر قويىلۋى مۇمكىن:

1. بالالارعا ارنالعان SIM-كارتالاردى بولەك تىركەۋ;
2. 14 جاسقا دەيىنگى بالالارعا قولجەتىمدى ينتەرنەت كونتەنتىن باقىلاۋدى كۇشەيتۋ;
3. مەكتەپ باعدارلاماسىندا تسيفرلىق ساۋاتتىلىق پەن مەدياقاۋىپسىزدىكتى دامىتۋ، سول ارقىلى بالالارعا ونلاين كەڭىستىكتەگى قاۋىپ-قاتەردى ءتۇسىندىرۋ.

الەۋمەتتىك جەلىلەرگە قولجەتىمدىلىكتى شەكتەۋ مۇمكىندىگىنە باسا نازار اۋدارىلعان. سۇلەيمەنوۆا اتاپ وتكەندەي، مۇنداي شەشىمدەر قوعام بولىپ تالقىلاماي تۇرىپ قابىلدانبايدى. ديالوگقا اتا-انالار، مۇعالىمدەر، ساراپشىلار جانە باق وكىلدەرى شاقىرىلماق. مينيستر سونىمەن قاتار 14 جاسقا دەيىن بالالاردىڭ الەۋمەتتىك جەلىلەرگە كىرۋىن شەكتەۋ باستاماسىن ءماجىلىس دەپۋتاتتارى بۇرىن كوتەرگەنىن ەسكە سالدى. ونىڭ سوزىنشە، بۇل ماسەلە ءالى شەشىمىن تاپپاعان كۇيىندە قالىپ وتىر جانە ونى شەشۋدە بالالار مەن قوعام مۇددەسىن ەسكەرە وتىرىپ، ويلانىپ شەشىم قابىلداۋ قاجەت.

Abai.kz