قاراعاندى وبلىسىندا حالىقتىڭ قۇقىقتىق ساۋاتتىلىعىن ارتتىرۋعا باعىتتالعان «قۇقىق ءتارتىبىنىڭ الىپپەسى» اكتسياسى ءوتتى.

ءىس-شارا «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق فيليالىنىڭ بازاسىندا ۇيىمداستىرىلىپ، وبلىستىق پروكۋراتۋرا جانىنداعى جوبالىق كەڭسەنىڭ قولداۋىمەن «زاڭ جانە ءتارتىپ» يدەولوگەماسى اياسىندا وتكىزىلدى.

اكتسيا اياسىندا ۇيىمداستۆرىلعان نەگىزگى ءىس-شارا — دوستىق ءۇيىنىڭ كونفەرەنتس-زالىندا وتكەن دوڭگەلەك ۇستەل بولدى. جيىنعا وبلىستىق پروكۋراتۋرانىڭ، «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وكىلدەرى، دەپۋتاتتار مەن جۇرتشىلىق قاتىستى. كەزدەسۋ بارىسىندا مەملەكەتتىك قىزمەتتەر كورسەتۋ سالاسىنداعى وزەكتى ماسەلەلەر، تسيفرلىق سەرۆيستەردى دامىتۋ جانە ازاماتتاردىڭ مەملەكەتتىك ينستيتۋتتارعا دەگەن سەنىمىن ارتتىرۋ جولدارى تالقىلاندى.

وبلىستىق ىشكى ساياسات باسقارماسىنىڭ باسشىسى نۇرلان بيكەنوۆتىڭ ايتۋىنشا، «قۇقىقتىق ءتارتىپ ءالىپبيى» اكتسياسى اياسىنداعى بۇل جۇمىس وتكەن جىلدىڭ قازان ايىنان باستاپ جۇيەلى تۇردە جۇزەگە اسىرىلىپ كەلەدى.

— ءبىز پروكۋراتۋرا، پوليتسيا، اكىمدىكتەر جانە وزگە دە مەملەكەتتىك ورگانداردىڭ قىزمەتىمەن كەزەڭ-كەزەڭىمەن تانىسىپ كەلەمىز. بۇل ۇدەرىسكە ءماسليحات دەپۋتاتتارى، قوعامدىق كەڭەس مۇشەلەرى، قوعام بەلسەندىلەرى، جاستار جانە بۇقارالىق اقپارات قۇرالدارىنىڭ وكىلدەرى بەلسەندى تۇردە تارتىلعان. بۇگىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ جۇمىسىمەن تانىستىق. بارلىق قىزمەتتەر قاتاڭ تۇردە زاڭ اياسىندا كورسەتىلەدى. 2004 جىلى ۇيدەن شىقپاي-اق قۇجات الۋ يدەياسى قيال-عاجايىپ سياقتى كورىنسە، بۇگىندە بۇل كۇندەلىكتى تاجىريبەگە اينالدى، — دەدى ول.

اكتسيا اياسىندا كوشپەلى ءىس-شارالار دا ۇيىمداستىرىلدى. قوعام وكىلدەرى حالىققا قىزمەت كورسەتۋ ورتالىقتارىنا بارىپ، الەۋمەتتىك بلوكتىڭ، جىلجىمايتىن مۇلىكتى تىركەۋ جانە جەر كاداسترى ورگاندارىنىڭ جۇمىسىمەن تانىستى.

قاتىسۋشىلارعا مەملەكەتتىك قىزمەتتەردى الۋ ءتارتىبى جان-جاقتى ءتۇسىندىرىلىپ، قويىلعان سۇراقتارعا جاۋاپ بەرىلدى.

«قۇقىقتىق ءتارتىپ ءالىپبيى» اكتسياسى اتقارىلعان جۇمىستىڭ قورىتىندىسىن شىعارۋمەن اياقتالدى. ۇيىمداستىرۋشىلار مۇنداي باستامالار مەملەكەت پەن قوعام اراسىنداعى اشىق ديالوگتى دامىتۋعا، ازاماتتاردىڭ قۇقىقتىق مادەنيەتىن ارتتىرۋعا جانە زاڭدىلىق پەن قۇقىقتىق ءتارتىپ قاعيداتتارىن نىعايتۋعا ىقپال ەتەتىنىن اتاپ ءوتتى.

Abai.kz