جاي كۇندەرى «اناۋ جەتپەيدى، مىناۋ جەتپەيدى» دەپ جىلاپ وتىرامىز. بىراق قالاعا ءبىر الەمدىك جۇلدىز كەلە قالسا، الپىس مىڭدىق كونتسەرت بيلەتى التى سەكۋندتا ساتىلىپ كەتەدى.

سۇرانىستىڭ كوپتىگى سونشالىق ءتىپتى ارنايى قوسىمشالار حالىقتىڭ نوپىرىنە شىداماي، ىستەن شىعىپ جاتادى. وسىندايدان كەيىن ءوزىمىزدى كەدەيمىز دەپ ايتا الامىز با؟

تاعى ءبىر مىسال. بيىلدان باستاپ كولىك ءنومىرىن تاڭداپ ساتىپ الۋىنا مۇمكىندىك بەرەتىن زاڭ كۇشىنە ەندى. ەڭ ارزان ءنومىردىڭ ءوزى 42 مىڭ تەڭگەدەن باستالادى. سوعان قاراماستان ارنايى حالىققا قىزمەت كورسەتۋ ورتالىقتارىندا ادام قاراسى قالىڭ، كەزەك ءتىپتى كوشەگە دەيىن شىعىپ كەتكەن.

وسىدان كەيىن «ەلدىڭ اقشاسى جوق» دەپ ايتا المايمىز اۋ. بۇل از دەسەڭىز، جاقىندا ۆەتنامنىڭ فۋكۋوك ارالىندا كادىمگى قازاقتىڭ «قىزىل ورىگى» قويىلىپ، تۋريستەر جينالاتىن الاڭقاي ءبىر ساتكە شىمكەنتتەگى مەيرامحاناعا اينالىپ كەتكەن. شاڭىن شىعارىپ بيلەپ جاتقان ءوزىمىزدىڭ قاراكوزدەر. تۋريستەردىڭ دەنى – وتانداستارىمىز.

اقشا جوق بولسا، ۆەتنام، دۋباي، تايلاندتىڭ جاعاجايلارىن قالاي تولتىرىپ ءجۇرمىز؟ اكە-شەشەمىزدىڭ اۋىلىنا بارعانداي، شابادانىمىزدى الىپ، ويلانباستان جولعا شىعامىز. بارعان سوڭ ساۋىق قۇرىپ، قولىمىزداعى جاپ-جاڭا ايفون 17-مەن جارقىلداتىپ سۋرەتكە تۇسەمىز.

كەز كەلگەن اۆتوسالون نەمەسە ءۇي ساتاتىن كومپانيا شاعىن عانا اكتسيا جاريالاسىنشى كەزەك تاڭعى بەستەن باستالىپ كەتەدى. ەگەر شىنىمەن اقشا جوق بولسا، ونداي كەزەكتە تۇرماس ەدىك قوي.

جاقىندا ورازا ايى. اۋىز بەكىتىپ، اۋىزاشار جاسايمىز. سول باياعى ادەتىمىزدەن تانباي، داستارحانىمىزدى استا-توك جاساپ، داراقىلىققا جول بەرەمىز. مۋفتياتتىڭ قاسيەتتى ايدا «ىسىراپشىلدىققا جول بەرمەيىك» دەگەن قاراپايىم تالاپتارىنا دا پىسقىرمايمىز. مۇنىڭ ءبارى نە ءۇشىن؟ ماقتان ءۇشىن بە؟

شىن مانىندە ماسەلە كەدەيلىكتە ەمەس. ماسەلە ءوز قالتامىزعا قاراماي ءومىر سۇرۋىمىزدە. توي ءۇشىن، دەمالىس ءۇشىن، جاڭا ايفون ءۇشىن نەسيە الىپ، تىنىش جيناپ، شاماسىنا قاراي ءومىر ءسۇرۋدىڭ ورنىنا، كوزگە تۇسۋگە تىرىسامىز. سوسىن بارىپ تاعى دا «اقشا جوق» دەپ شاعىنامىز. اقشا جوق ەمەس بار. تەك ءبىز وتىرىك جىلايتىن سياقتىمىز.

ەربول ماندىبەك

Abai.kz