ەنەرگەتيكا مينيسترلىگى 2030 جىلعا دەيىنگى كومىر گەنەراتسياسىن دامىتۋ جوسپارىن تانىستىردى. بۇل تۋرالى ۇكىمەتتىڭ ءباسپاسوز قىزمەتى حابارلادى.

مەملەكەت باسشىسىنىڭ تاپسىرماسىنا سايكەس، قر ۇكىمەتى ەنەرگەتيكا مينيسترلىگى ارقىلى كومىر گەنەراتسياسىن دامىتۋ جونىندەگى ۇلتتىق جوبانى ازىرلەۋدە. ەنەرگەتيكا مينيسترلىگى دوڭگەلەك ۇستەل وتىرىسىندا ساراپشىلىق قاۋىمداستىققا 2030 جىلعا دەيىنگى كومىر گەنەراتسياسىن دامىتۋ جونىندەگى ۇلتتىق جوسپاردىڭ جوباسىن تانىستىردى.

جوبانىڭ باستاپقى قۇنى 8 ترلن تەڭگەدەن اسادى دەپ باعالانىپ وتىر. ۇلتتىق جوسپار ەلدەگى ەنەرگيا تاپشىلىعىن شەشۋگە جانە ەسكىرگەن ستانسالاردى جاڭارتۋعا باعىتتالعان.

«ۇلتتىق جوبا سالاداعى بارلىق باعىتتاردى كەشەندى ءارى جان-جاقتى دامىتۋعا باعىتتالعان. بۇل ينۆەستيتسيا تارتۋدان باستاپ، وتىن-لوگيستيكالىق ينفراقۇرىلىمدى دامىتۋعا جانە كادرلىق الەۋەتتى كۇشەيتۋگە دەيىنگى تەڭدەستىرىلگەن ءتاسىل. مۇنداي جۇيەلى ءادىس ەكونوميكانىڭ مۋلتيپليكاتيۆتىك اسەرىن قامتاماسىز ەتىپ، ەلدىڭ تۇراقتى دامۋىنا ۇلەس قوسادى»، — دەدى ەنەرگەتيكا ءمينيسترى ەرلان اقكەنجانوۆ.

جوسپارعا التى ءىرى ەنەرگەتيكالىق نىساننىڭ قۇرىلىسى كىرەدى: ەكىباستۇز ماەس-3 (گرەس), سونداي-اق كۋرچاتوۆ، كوكشەتاۋ، سەمەي، وسكەمەن جانە جەزقازعان ستانسالارى. سونىمەن قاتار، ەكىباستۇز ماەس-2 جانە اقسۋ ماەس سياقتى جۇمىس ىستەپ تۇرعان ستانسالاردى تەحنيكالىق جاڭعىرتۋ قاراستىرىلعان.

جاڭا جوبالاردى جۇزەگە اسىرۋ ءۇشىن ينۆەستورلاردى تەندەر ارقىلى تاڭداۋ مەحانيزمدەرى قولدانىلادى. ال قولدانىستاعى ستانسالاردى جاڭارتۋ ءۇشىن مينيسترلىكپەن ينۆەستيتسيالىق كەلىسىمدەر جاسالادى. بۇل شارالار جوبانى ىسكە اسىرۋ پروتسەسىنىڭ اشىقتىعىن قامتاماسىز ەتىپ، ۇزاقمەرزىمدى كەلىسىمدەر شەڭبەرىندە بولجاناتىن تاريفتەردى ساقتاي وتىرىپ، ينۆەستيتسيالاردىڭ قايتارىمدىلىعىن قامتاماسىز ەتەدى.

«جوبادا باستى نازار «تازا كومىر» نەگىزىندەگى نىساندارعا، زاماناۋي تەحنولوگيالاردى قولدانۋعا اۋدارىلعان. ءبىزدىڭ ماقسات — مورالدىق جانە فيزيكالىق ەسكىرگەن قۋاتتاردى جوعارى تيىمدىلىك كوەففيتسيەنتىنە يە زاماناۋي ەنەرگەتيكالىق بلوكتارمەن كەزەڭ-كەزەڭىمەن الماستىرۋ. بۇل ەكولوگيالىق تالاپتار مەن ەنەرگەتيكالىق قاۋىپسىزدىك اراسىنداعى تەپە-تەڭدىكتى ساقتاۋعا مۇمكىندىك بەرەدى»، — دەدى ۆەدومستۆو باسشىسى.

جاڭا قۋاتتاردى ءتيىمدى ەنگىزۋ ءۇشىن كومىر ءوندىرۋ جانە تەمىرجول ينفراقۇرىلىمىن دامىتۋ جوسپارلارىن ۇيلەستىرۋ قاجەت. مينيسترلىك كومىر ءوندىرىسىن ۇلعايتۋ جانە تەمىرجول جەلىسىندەگى وتكىزۋ قابىلەتى شەكتەۋلى ۋچاسكەلەردى («تار تۇستاردى») جويۋ ماسەلەلەرىن تالقىلادى.

جوبانىڭ الەۋمەتتىك بولىگىندە پەرسونالدى قورعاۋ شارالارى مەن «وتباسى بانك» اق-پەن بىرلەسىپ ارنايى تۇرعىن ءۇي باعدارلامالارىن ىسكە قوسۋ قاراستىرىلعان. ۇسىنىلعان ۇسىنىستار بارلىق مۇددەلى تاراپتارمەن پىسىقتالعاننان كەيىن ۇلتتىق جوبانى سوڭعى نۇسقادا بەكىتۋگە نەگىز بولادى.

Abai.kz