باس ءمۇفتي قازاقستاندىقتاردى رامازان ايىمەن قۇتتىقتاپ، كاسىپكەرلەرگە ۇندەۋ جاسادى.

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى رامازان ايىنىڭ باستالۋىنا وراي قازاقستاندىقتاردى قۇتتىقتادى. ول حالىقتى قايىرىمدىلىققا شاقىرىپ، كاسىپكەرلەردى ازىق-تۇلىك باعاسىن تومەندەتۋگە ۇندەدى.

باس ءمۇفتي ءوز ۇندەۋىندە بارشا مۇسىلمان قاۋىمىنا ىزگى تىلەگىن جەتكىزدى.

سىزدەردى ءيسى مۇسىلمان بالاسى اسىعا كۇتەتىن، ون ەكى ايدىڭ سۇلتانى بولعان قاسيەتتى رامازان ايىنىڭ كەلۋىمەن شىن جۇرەكتەن قۇتتىقتايمىن! اللا تاعالا قاسيەتتى ايدا ۇستايتىن ورازامىزدى، ىزگى امالدارىمىزدى قابىل ەتىپ، مول ساۋاپتان جازعاي، – دەدى ول.

ۇندەۋدە رامازان ايىنىڭ رۋحاني ءمانى كەڭىنەن تارقاتىلىپ، ورازانىڭ باستى ماقساتى – جۇرەكتى تازارتۋ، ءناپسىنى تاربيەلەۋ جانە تاقۋالىققا جەتۋ ەكەنى اتاپ ءوتىلدى. باس ءمۇفتي ورازانىڭ ءمانى تەك اس پەن سۋدان تىيىلۋدا ەمەس، جۇرەكتى ءتۇرلى دەرتتەن ارىلتىپ، كوركەم مىنەز قالىپتاستىرۋدا ەكەنىن جەتكىزدى.

سونىمەن قاتار قاسيەتتى قۇراننىڭ «باقارا» سۇرەسىنىڭ 183-اياتىن كەلتىرە وتىرىپ، ورازانىڭ يمان كەلتىرگەندەرگە پارىز ەتىلگەن قۇلشىلىق ەكەنى ەسكە سالىندى.

ناۋرىزباي قاجى تاعانۇلى حالىقتى قاسيەتتى ايدا قايىرىمدىلىق جاساۋعا، كومەككە مۇقتاج جاندارعا قولداۋ كورسەتۋگە شاقىردى. ول قازاقستان مۇسىلماندارى ءدىني باسقارماسى ۇيىمداستىراتىن قايىرىمدىلىق ءىس-شارالارىنا بەلسەندى قاتىسۋعا ۇندەدى.

سونداي-اق كاسىپكەرلەردى الەۋمەتتىك ماڭىزى بار ازىق-تۇلىك باعاسىنا جەڭىلدىك جاساۋعا، قوعامدىق تاماقتانۋ ورىندارىن اۋىزاشار ءمازىرىن قولجەتىمدى باعامەن ۇسىنۋعا شاقىردى. قۇدايى استاردى اۋىزاشار ۋاقىتىندا وتكىزۋ ساۋاپتى ءىس ەكەنى دە ايتىلدى.

ۇندەۋ سوڭىندا باس ءمۇفتي ەلدىڭ اماندىعى مەن تىنىشتىعىن تىلەپ، كەلەر جىلعى رامازان ايىنا امان-ەسەن جەتۋدى ءناسىپ ەتۋىن سۇراپ، دۇعا جاسادى.

Abai.kz