قر پرەمەر-ءمينيسترى ولجاس بەكتەنوۆ ۇكىمەت وتىرىسىندا كوكتەمگى ەگىس جۇمىستارىن وتكىزۋدىڭ دايىندىق ماسەلەسى بويىنشا بىرقاتار تاپسىرما بەردى:

نەسيە الۋ ءۇشىن قاجەتتى انىقتامالاردى قاعاز تۇرىندە تاپسىرماي، تسيفرلى نۇسقاعا كوشۋ پرەمەر-مينيستر اۋىل شارۋاشىلىعى مينيسترلىگىنە تسيفرلىق دامۋ مينيسترلىگمەن جانە «بايتەرەك» حولدينگىمەن بىرلەسىپ، ديقاندارعا ءتيىمدى ءارى اشىق مەملەكەتتىك قولداۋ كورسەتۋ ءۇشىن جەڭىلدەتىلگەن نەسيە بەرۋدىڭ تەحنيكالىق ءراسىمىن وڭايلاتىپ، ونى تسيفرلىق فورماتقا اۋىستىرۋدى تاپسىردى.

ارزانداتىلعان وتىننىڭ جەتكىزىلۋىن باقىلاۋ ەنەرگەتيكا جانە اۋىل شارۋاشىلىعى مينيسترلىكتەرى مەن وبلىس اكىمدىكتەرى ارزانداتىلعان وتىننىڭ ءتيىستى كولەمدە جەتكىزىلۋىن قاتاڭ باقىلاۋعا السىن. اكىمدىكتەر ءبىر اپتا ىشىندە وڭىرلىك وپەراتورلار تۋرالى تولىق جانە وزەكتى مالىمەتتەردى ۇسىنسىن. بولىنگەن جانار-جاعارمايدىڭ تالان-تاراجعا تۇسۋىنە جول بەرگەن تۇلعالارعا قاتىستى قۇقىق قورعاۋ ورگاندارى بارىنشا قاتاڭ شارالار قابىلداۋى قاجەت.

ۆەگەتاتسيالىق كەزەڭدە ەگىنگە قاجەتتى سۋمەن ۇزدىكسىز قامتاماسىز ەتۋ ديقانداردى تامشىلاتىپ جانە جاڭبىرلاتىپ سۋارۋ جۇيەسىنە كوشۋگە ىنتالاندىرىپ، سۋ ۇنەمدەۋ تەحنولوگيالارىن ەنگىزۋ جۇمىستارىن كۇشەيتۋ كەرەك. سولتۇستىك جانە شىعىس وڭىرلەردىڭ اكىمدىكتەرى قار توقتاتۋ جانە سۋ قورىن جيناۋ شارالارىن جۇرگىزۋى قاجەت.

اۋا-رايىنىڭ وزگەرۋىنە جەدەل دەن قويۋ ەكولوگيا مينيسترلىگىنە ەگىن ەگۋ مەرزىمدەرىن الدىن الا جوسپارلاۋ جانە اۋا-رايىنىڭ وزگەرۋىنە جەدەل دەن قويىپ، شارۋالارعا مەتەورولوگيالىق بولجامداردى ۋاقتىلى بەرۋ تۋرالى تاپسىرما بەرىلدى.

اوك ءونىمىنىڭ كولەمىن ۇلعايتۋ بويىنشا ينديكاتورلاردى ورىنداۋ وبلىس اكىمدىكتەرىنە ەگىن ەگۋ جۇمىستارىن جۇرگىزۋ بارىسىندا اگروونەركاسىپ كەشەنىنىڭ جالپى ءونىم كولەمىن ەكى ەسەگە ۇلعايتۋ بويىنشا ينديكاتورلارعا قول جەتكىزۋدى جانە ورىنداۋدى قامتاماسىز ەتۋ تاپسىرىلدى.

«اۋىل شارۋاشىلىعى مينيسترلىگى مەن ءوڭىر اكىمدەرىنە كوكتەمگى ەگىس جۇمىستارىنىڭ ۋاقتىلى جۇرگىزىلۋىن ەرەكشە باقىلاۋدا ۇستاۋدى تاپسىرامىن»، — دەپ اتاپ ءوتتى ولجاس بەكتەنوۆ.

جالپى ۇيلەستىرۋ پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە جۇكتەلدى.

Abai.kz