ءبىز تاۋەلسىزدىك پەن ازاتتىقتى، ۇلت پەن حالىقتى شاتاستىرىپ وتىرعان جۇرتپىز. وسىدان كەلىپ، «ءبىز - بەيشارامىز» دەگەن كۇيگەلەك ۇعىم مادەني ەليتانىڭ بويىنا ءسىڭىپ بارادى.

بەيشارا حالىقتار تاريح ساحناسىنان كەتتى، كەتىپ جاتىر... بىزگە ونداي قاتەر ءتوندى دەۋگە كەلمەس.

ازاتتىق دەگەن نە؟  بوداندىقتىڭ بۇعاۋىن ءۇزىپ، بولماسا ءۇزىلىپ تۇسكەن، كوزىن اشىپ، مەملەكەت قۇرام دەپ كىرىسكەن كۇن – ازاتتىق كۇنى. ونىڭ بىزدە ەكەۋى بار: 25 قازان 1990 جىل جانە 16 جەلتوقسان 1991 جىل. ءيا ەكى مارتە ۇمتىلىپ بارىپ، ورنىمىزدان تۇرەگەلگەن حالىقپىز. ويتكەنى، تاريحىمىز بەن تاعدىرىمىز سوعان لايىق...

ال تاۋەلسىزدىك دەگەن نە؟ بۇل – ازاتتىقتى باياندى ەتىپ، اينالاسىمەن تەرەزەسىن تەڭەستىرگەن، سوعان جەتەقابىل جاعدايداعى ۇلت. ءبىزدىڭ 35 جىلىمىز تەككە كەتپەسە دە، دالباسالاعان جىلدار. ول ءۇشىن ءبىر ادامدى كىنالاپ قۇتىلا الماسپىز...

ازاتتىق – ساياسي ەليتانىڭ مۇراتى، تاۋەلسىزدىك – مادەني ەليتانىڭ، ياعني زيالى قاۋىمنىڭ مۇراتى/ميسسياسى. سوڭعىسى الدىڭعىسىنىڭ قولبالاسى بولعان كۇننەن باستاپ، ازاتتىقتان ءمانى كەتەدى، تاۋەلسىزدىك تارك ەتىلەدى...

نەگىزى ۇلت ۇلتسىزدانا باستاعاندا تاۋەلسىزدىكتەن ايرىلادى. ءبىزدىڭ ايرىلعانىمىزعا كەمى 3 عاسىر. بىراق ءبىز ازاتتىقتىڭ سۋبەكتىسى/يەسى بولۋعا تولىق مۇمكىندىگى بار حالىقپىز.

حالىق تاۋەلسىزدىكتى العاننان كەيىن عانا ۇلتقا اينالادى. كازىر ۇلت ەمەسپىز، قۇلدىراعان جوقپىز، جاي عانا حالىقپىز.

ازاتتىق الدىق، تاۋەلسىزدىكتى الۋ جولىندامىز.

تاۋەلسىزدىك ءۇشىن حالىقتىڭ  الەۋەتى/مادەني ەليتاسى جۇمىلۋى كەرەك. ساپتىاياقتان قاراۋىل قاراپ، تۇشكىرىپ-پىسقىرىپ وتىرماۋى قاجەت.

جاڭا جاعدايعا توتەپ بەرەتىن جاڭا ەليتا كەرەك. ول باياۋ بولسا دا قالىپتاسۋدا. ونىڭ ساۋداسى ءارى كەتكەندە - 5 جىل. وعان دەيىن ۇرى-قارىلار مەن ساتقىندار، قىرتتار ازاتتىقتى تالعاجاۋ ەتىپ، ۋاقىت كەتىرەدى. كەتىرمەسىن دەگەندەر حالىقتى ۇلتقا اينالدىراتىن كۇرەسكە شىعۋى قاجەت.

بۇگىنگى ازدى دەپ جۇرگەنىمىز - بوداندىقتىڭ بوداۋى. سودان قۇتىلۋ ۇستىندەمىز. حالىقتى 1 پايىز باستاپ، 10 پايىزى ۇلت قىلادى. سول 1 پايىزدى جاساقتاۋعا قاتىسىڭدار!

الەم قاجىدى، اداستى. ادامزات ماڭگۇرتتەندى، جالعان وركەنيەتكە سەندى، الداندى، ازدى...

وسىنداي ساتتە ىلعي دا ادامزاتتى قۇتقاراتىن ونىڭ اتالىق نەگىزى - اتتى مادەنيەت! سونىڭ وكىلدەرى ساحناعا شىعادى. كازىر سونىڭ تولىق بەلگىسى بار. بىراق سول مادەنيەتتىڭ كىندىگى بولعان قازاقتىڭ زيالىسى، مادەني ەليتاسى جاڭا داۋىرگە بەيىمدەلە الماي وتىر. ءوز مۇراتىن ءوزى تانىماي وتىر.

ەندىگى دامە – جاس ۇرپاقتا عانا. بىراق سونى ەرتەتىن دە كەكىلدەي توپ كەرەك!

ەلسەرىك

Abai.kz