كونەنى قايدام، كەيىنگى كەزدە "قازاق كينوسى" دەسە ويعا ءارتۇرلى داۋ-دامايلار ورالا بەرەتىن بولدى. بايان ەسەنتاەۆا، نۇرلان قويانباەۆ سياقتى اۋەسقوي كينوگەرلەردى اياۋسىز سىناعان ەرمەك ءتۇرسىننىڭ ءجونى بولەك. قازاقفيلم توڭىرەگىندە دە الىپقانپا اڭگىمە سايابىرسىعان ەمەس.

ۇلتتىق كينو ءوندىرىسىنىڭ كوسەگەسىن كوگەرتەدى دەگەن ازامات ساتىبالدى دا كۇنى كەشە شۋلى ورتادان ات باسىن الا قاشتى.

ۇلتتىق كينو قولداۋ ورتالىعى قۇرىلىپ، بۇل سالاعا بيۋدجەتتەن قوماقتى اقشا ءبولىنىپ، ەل كينوسى جاڭاشا باعىتقا بەت الادى دەگەنىمىزبەن جاعداي وڭالماي تۇر. بۇگىن عانا جاس بۋىننىڭ بەتكەۇستارى رۇستەم ابدىراشەۆ جەكە پاراقشاسىندا وقشاۋ پىكىر جاريالادى. تولىق مازمۇنى تومەندەگىدەي:

«قازاق كينوسى، ەس جياتىن ۋاقىت كەلدى! ۇلتتىق مۇددەمىزدى كاسىبي تۇرعىدا قورعاۋ - ءبىزدىڭ جاۋاپكەرشىلىك!

بۇگىن شەت ەلدە ءبىزدىڭ اتىمىزدان، قازاق كينووندىرىسىنە قاتىسى جوق ادامدار تىم ءجيى سويلەۋدە. ولار يندۋستريانى تانىستىرادى-مىس، قورىتىندى جاسايدى-مىس، وكىنىشكە قاراي، ءبىزدىڭ كينو سالاسىنىڭ شىنايى كەلبەتىن بۇرمالاپ كورسەتەدى. وزگەلەردىڭ سويىلى بولىپ جۇرۋدەن جاسقانبايدى.

قازاق كينوسىنىڭ اتىنان بىزدەر قولدامايتىن، بىزگە جات يدەيالاردى ۇسىنادى.

سوندىقتان:

ۇلتتىق كاسىبي كينو گيلديالار قۇرۋ ۋاقىتى كەلدى. ورتاق ءۇن شىعاراتىن كەزەڭ كەلدى.

كۇن سايىن وسى سالادا ەڭبەك ەتىپ جۇرگەندەردىڭ مۇددەسىن قورعايتىن، قۇرىلىم كەرەك-اق!

بىرىگۋدى باستاماساق، ءبىزدىڭ اتىمىزدان وزگەلەر سويلەي بەرمەك.

بىرىگەتىن، قۇلدىق سانادان ارىلاتىن زامان كەلدى.

ءوز قولىمىز ءوز اۋزىمىزعا ەندى جەتكەندە، ەل بولىپ ۇيىپ جاتقان بىزدەر - وزگە ەلدىڭ باعىت - باعدارىنا كىرىپتار ەمەسپىز».

ابدىراشەۆتىڭ ايتپاق بولعان ويىنىڭ ۇزىن-ىرعاسى وسىنداي. بۇل نارىق زامانىندا باستالعان كينوگەرلەر اراسىنداعى كاسىبي-اۋەسقوي بولىپ ايتىساتىن داۋدان وزگەشە. پىسىق پروديۋسەرلەر ەل ءىشىن قويىپ، ەندى الەمدىك نارىققا قازاق بولمىسىن باسقاشا كورسەتۋگە تىرىسىپ ءجۇر دەگەن ءسوز.

دۇنيەنى شۋلاتقان «بورات» فيلمىنەن ءالى دە ساباق الماعان سياقتىمىز. ۇلتتىق كينو قولداۋ ورتالىعى وزدەرى قارجىلاندىرعان، «ۇلتتىق» ءسوزىن قوسارلاعان كينولارعا كوپپەن اقىلداسىپ ناقتى سيپاتىن بەكىتۋى كەرەك-اق!

رۋستەم ابدىراشەۆتىڭ دا ايتپاعى سول بولار دەپ تۇسپالدايمىز.

Abai.kz