قازاقستاننىڭ ساياسي ايدىنىندا كوكتەمگى «ەگىس ناۋقانى» باستالدى. پرەزيدەنتتىڭ پارمەنىنەن كەيىن پارتيالىق الاڭدا ايتارلىقتاي جاندانۋ بايقالادى. مسب-نى ءوز تۋىنىڭ استىنا جيناعان «Amanat» پارتياسىنىڭ جاپپاي موبيليزاتسياسىنان سوڭ، ساحناعا ەسكى اتاۋى بار، بىراق جاڭا امبيتسياسى زور «ادىلەت» ساياسي جوباسى شىقتى.

ەسكى اتاۋ، جاڭا مازمۇن با؟

كەزىندە «ادىلەت» پارتياسى تەك نەگىزىن قالاۋشى، مارقۇم ماقسۇت نارىكباەۆتىڭ بەدەلىنە عانا سۇيەنگەن «كوسەمشىل» ۇيىم بولدى. 2013 جىلى «رۋحانياتپەن» بىرىگىپ، كەيىن «بىرلىككە» اينالعان بۇل قۇرىلىم بيلىكتىڭ كەز كەلگەن قادامىن قولداۋدان باسقا ەشتەڭەمەن ەستە قالمادى.

الايدا بۇگىنگى «رەاديلەتاتسيا» (قايىرا ادىلەتتەنۋ) – الدەقايدا سالماقتى جوبا. جەلى قولدانۋشىلارى «جاڭا ادىلەتتى» كەزىندە داريعا نازارباەۆانىڭ «وتان» پارتياسىنا سەسكەنۋ تۋدىرعان «اسار» پارتياسىمەن سالىستىرۋدا. «اسار» دا كەزىندە قىسقا مەرزىمدە «كىشى ىستەر پارتياسى» رەتىندە تانىلىپ، نومەنكلاتۋرالىق ورتانى ءدۇر سىلكىندىرگەن ەدى. سۇراق بىرەۋ: «ادىلەتتىڭ» دە تاعدىرى «اسار» سياقتى «اماناتپەن» بىرىگۋمەن اياقتالا ما، الدە بۇل توقاەۆ ۋادە ەتكەن ناعىز كوپپارتيالىقتىڭ باسى ما؟

ەكى ءپوليۋستى جۇيە: «ا» جانە «ءا»

مەملەكەت باسشىسى قاسىم-جومارت توقاەۆ 2019 جىلعى العاشقى جولداۋىندا ساياسي باسەكەلەستىك پەن كوپپارتيالىقتى دامىتۋعا ۋادە بەرگەن بولاتىن. ارادا جەتى جىلعا جۋىق ۋاقىت وتكەندە ءبىز كلاسسيكالىق كوپپارتيالىقتىڭ ەمەس، «Amanat» پەن «ادىلەت» پارتيالارى كەزەكتەسىپ بيلىك ەتەتىن ەكىپارتيالىق جۇيەنىڭ («ەرزاتس-مودەل») كۋاسى بولۋىمىز مۇمكىن.

ساياساتتانۋشى اندرەي چەبوتارەۆتىڭ پىكىرىنشە، جاڭا پارتيانىڭ باستاماشىلار توبىندا ءىرى بيزنەس وكىلدەرىنىڭ بولۋى – شەشۋشى فاكتور.

«قۇرامدا اندرەي لاۆرەنتەۆ («Allur Group») جانە ايعازى قۇسايىنوۆ (حالىقارالىق ءبىلىم بەرۋ كورپوراتسياسى) سياقتى تۇلعالاردىڭ بولۋى پارتيانىڭ ايماقتىق فيليالدارىن قۇرۋ مەن تىركەۋ ماسەلەسىن تەز شەشۋگە مۇمكىندىك بەرەدى. بۇل پارتيا ساياسي ارەناعا سولشىل-تسەنتريستىك پوزيتسيامەن شىعۋى مۇمكىن»، — دەيدى ساراپشى.

«جاڭا كيم» ءھام «بولات پاتشاسى»

پارتيانىڭ «قوزعالتقىشى» سانالاتىن تۇلعالارعا توقتالساق، لاۆرەنتەۆ — اۆتوموبيل جانە بولات ونەركاسىبىنىڭ الىبى بولسا، ايعازى قۇسايىنوۆ — ەلدەگى ءىرى ءبىلىم بەرۋ حولدينگىنىڭ مۇراگەرى ءارى جاڭا «مىس پاتشاسى». كەزىندە ۆلاديمير كيم مەن «قازاقمىس» «وتان» پارتياسىنا قالاي تىرەك بولسا، قۇسايىنوۆ تا «ادىلەت» ءۇشىن سونداي قارجىلىق-ۇيىمداستىرۋشىلىق درايۆەرگە اينالماق.

ەڭ باستىسى، «ادىلەتتىڭ» باعدارلامالىق ماقساتتارى توقاەۆتىڭ «ادىلەتتى قازاقستان» يدەولوگەماسىمەن ۇندەس. بۇل پارتيا جاي عانا باسەكەلەس ەمەس، ۋاقىت وتە كەلە جالعىز بيلەۋشى كۇشكە اينالۋى دا عاجاپ ەمەس.

«ۇجىمدىق نازارباەۆتان» — «ۇجىمدىق توقاەۆقا»

ەگەر وسى ستسەناري جۇزەگە اسسا، پرەزيدەنت فورمالدى تۇردە پارتياسىز قالا وتىرىپ، «ەسكى» بيلىك پارتياسىنان (ونى ءالى دە «ۇجىمدىق نازارباەۆ» دەپ اتايتىندار بار) ىرگەسىن ءبىرجولا اجىراتادى. ال «ادىلەت» پارتياسى توقاەۆتىڭ تىكەلەي قاتىسۋىنسىز-اق «ۇجىمدىق توقاەۆقا» اينالادى.

بۇل — ساياسي تۇراقتىلىققا قاتەر توندىرمەيتىن، بىراق كوپپارتيالىقتىڭ كورىنىسىن بەرەتىن ءتيىمدى جۇيە.

ءابىل-سەرىك الىاكبار

Abai.kz