قازاقستاندا ينۆەستورلار, كاسىپكەرلەر جانە سۇرانىسقا يە ماماندار ءۇشىن ەلگە كىرۋدىڭ جەڭىلدەتىلگەن ەرەجەلەرى قولدانىلادى. بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ مالىمدەدى.

ءمينيستردىڭ ايتۋىنشا, قازاقستاننىڭ كوشى-قون ساياساتى شەتەل ازاماتتارىنىڭ كەلۋ ماقساتتارىنا قاراي سارالانىپ قۇرىلادى, ياعني ەڭبەك كوشى-قونى مەن تۇراقتى تۇرۋعا كوشۋ ناقتى اجىراتىلادى.

ونىڭ سوزىنشە, مۇنداي ءتاسىل بىلىكتى ماماندار ءۇشىن ەكونوميكانىڭ اشىقتىعىن قامتاماسىز ەتۋگە مۇمكىندىك بەرەدى. وسىلايشا, ەلگە قۇندى كادرلاردى تارتۋ ءۇشىن جەڭىلدەتىلگەن كىرۋ ءتارتىبى ەنگىزىلگەن.

«ينۆەستورلار, سۇرانىسقا يە ماماندىق يەلەرى – بارلىعى جۇمىسقا ورنالاسۋ ءۇشىن جەڭىلدەتىلگەن تارتىپپەن كەلەدى. بىزدە ەڭبەك مينيسترلىگىنىڭ بۇيرىعى بار، وندا 51 سۇرانىسقا يە ماماندىق انىقتالعان. ولاردىڭ قاتارىندا, مىسالى, جاساندى ينتەللەكت ينجەنەرى, نەيروحيرۋرگ دارىگەرلەر جانە ت.ب. بار»، – دەدى اسقاربەك ەرتاەۆ.

ينۆەستورلار مەن كاسىپكەرلەر ءۇشىن جەكەلەگەن شارالار, ارنايى ۆيزالىق رەجيمدەر جانە وتىنىمدەردى جەدەل قاراۋ راسىمدەرى قاراستىرىلعان. سونىمەن قاتار, ەاەو اياسىندا ورتاق نارىقتا ەڭبەك رەسۋرستارىنىڭ ەركىن قوزعالىسىن قامتاماسىز ەتەتىن ەركىن جۇمىسقا ورنالاسۋ رەجيمى ارەكەت ەتەدى.

اسقاربەك ەرتاەۆتىڭ ايتۋىنشا, ۇلتتىق ەڭبەك نارىعىن قورعاۋ ءۇشىن جەڭىلدىكتى تىزىمدەرگە كىرمەيتىن شەتەلدىك جۇمىسشىلارعا كۆوتالاۋ تەتىگى قولدانىلادى.

سونىمەن قاتار, قازاقستان ازاماتتىعىن الۋعا ۇمىتكەر شەتەل ازاماتتارىنا بەلگىلى ءبىر تالاپتار قويىلادى. جاڭا ءتارتىپ كەزەڭ-كەزەڭىمەن باعالاۋدى قامتيدى: مەملەكەتتىك ءتىلدى بازالىق دەڭگەيدە ءبىلۋىن تەكسەرۋ, ساۋالناما دەرەكتەرىن تالداۋ, تسيفرلىق سكورينگ، ۆەدومستۆو ارالىق تەكسەرۋلەر جانە قورىتىندى سۇحبات.

مينيستر اتاپ وتكەندەي, جالپى العاندا قازاقستاننىڭ كوشى-قون ساياساتى ەكونوميكا دامۋىنا ۇلەس قوسۋعا دايىن كاسىبي ماماندار مەن ينۆەستورلار ءۇشىن اشىق كۇيىندە قالادى. مەملەكەت ۇلتتىق مۇددەلەردى, ەڭبەك نارىعىنىڭ قاجەتتىلىكتەرىن جانە ۇزاق مەرزىمدى دەموگرافيالىق مىندەتتەردى ەسكەرەتىن تەڭگەرىمدى ءارى پراگماتيكالىق ءتاسىلدى جۇيەلى تۇردە قالىپتاستىرىپ كەلەدى.

Abai.kz