ەلىمىزدە تسيفرلاندىرۋ جانە جي سالالارى قارقىندى دامىپ كەلەدى. بۇل جونىندە قر ۇكىمەتىنىڭ جانە قر جوعارى اۋديتورلىق پالاتاسىنىڭ 2025 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن بەكىتۋ جونىندە قر پارلامەنتى پالاتالارىنىڭ بىرلەسكەن وتىرىسىندا پرەمەر-مينيستر ولجاس بەكتەنوۆ مالىمدەدى.

– مەملەكەت باسشىسىنىڭ تاپسىرماسى بويىنشا، ەلىمىزدە قازىرگى تاڭدا تسيفرلاندىرۋ جانە جاساندى ينتەللەكتىنى ەنگىزۋ باعىتتارىندا اۋقىمدى جۇمىستار اتقارىلىپ جاتىر. ەڭ باستىسى، زاماناۋي قۇقىقتىق نەگىز قالىپتاستىرىلدى، ياعني تسيفرلىق كودەكس، جاساندى ينتەللەكت تۋرالى زاڭ قابىلداندى. بۇگىنگى مۇمكىندىكتى پايدالانا وتىرىپ، پارلامەنت دەپۋتاتتارىنا وسى باعىتتاردا اتقارىلعان اۋقىمدى بىرلەسكەن جۇمىسى ءۇشىن العىسىمدى ايتامىن. سونىمەن قاتار مەملەكەت باسشىسىنىڭ جارلىعىمەن، Digital Kazakhstan جالپىۇلتتىق ستراتەگياسى بەكىتىلدى جانە پرەزيدەنتتىڭ شەشىمى بويىنشا، بيىل تسيفرلاندىرۋ جانە جاساندى ينتەللەكت جىلى دەپ جاريالاندى، – دەدى ول.

پرەمەر-ءمينيستردىڭ سوزىنشە، مامان دايارلاۋ – وتە ماڭىزدى ماسەلە. AI Sana باعدارلاماسى شەڭبەرىندە 1 ميلليوننان استام ادام جاساندى ينتەللەكتىمەن جۇمىس ىستەۋ نەگىزدەرىنە وقىتىلدى. بۇل باعىتتاعى جۇمىستار مەكتەپتەردە، جوعارى وقۋ ورىندارىندا ارى قاراي جالعاسادى.

سونىمەن بىرگە ولجاس بەكتەنوۆ IT ەكسپورتى ماسەلەسىنە توقتالدى.

– IT ەكسپورتى – ەكونوميكامىزدىڭ وتە ماڭىزدى بولىگى. 2025 جىلى IT ەكسپورتىنىڭ كولەمى 1,1 ملرد دوللارعا جەتتى. بۇل جاقسى ناتيجە دەپ ايتۋعا بولادى. مىسالى، 2024 جىلى بۇل كورسەتكىش 690 ملن دوللار بولدى، ياعني ءبىر جىل ىشىندە 60% ءوستى، – دەدى ول.

سوعان قاراماستان الداعى جۇمىستار وتە اۋقىمدى.

– جايباراقات وتىرۋعا بولمايدى. نارىقتاعى باسەكە كۇننەن- كۇنگە كۇشەيىپ بارا جاتىر. بىزگە دە بەلسەندى، پارمەندى شارالار قابىلداۋ كەرەك، – دەدى ولجاس بەكتەنوۆ.

Abai.kz