ونەركاسىپ جانە قۇرىلىس مينيسترلىگى تاۋارلاردى تاڭبالاۋ جانە قاداعالاۋ جونىندەگى بىرىڭعاي وپەراتورمەن بىرلەسىپ جۇزەگە اسىرىلعان تۇرمىستىق حيميا جانە كوسمەتيكالىق ونىمدەردى تاڭبالاۋ جانە قاداعالاۋ بويىنشا قاناتقاقتى جوبانى اياقتادى.

اتالعان پيلوتتىق جوباعا تاۋار وتكىزۋ تىزبەگىنىڭ ءارتۇرلى بۋىندارىن قامتيتىن 20 ۇيىم قاتىستى. ولاردىڭ قاتارىندا 7 وتاندىق ءوندىرۋشى، سونداي-اق يمپورتتاۋشىلار مەن كوتەرمە جانە بولشەك ساۋدا وكىلدەرى بار. جوبا اياسىندا سايكەستەندىرۋ قۇرالدارىن قولدانۋدىڭ ءتۇرلى تاسىلدەرىن سىناقتان وتكىزۋ جانە ولاردىڭ قولدانىستاعى ءوندىرىس پەن تاۋاراينالىمى جاعدايىنداعى تيىمدىلىگىن باعالاۋعا مۇمكىندىك بەرەتىن تەحنولوگيالىق 12 ەكسپەريمەنت جۇرگىزىلدى.

سىناقتار سىرتقى ەكونوميكالىق قىزمەتتىڭ تاۋار نومەنكلاتۋراسى (سەق تن) كودتارى بويىنشا جەتى تاۋار توبىن قامتىدى. ولاردىڭ قاتارىندا سابىن، جۋ جانە تازالاۋ قۇرالدارى، ساندىك كوسمەتيكا، شاش پەن اۋىز قۋىسىنا كۇتىم جاساۋعا ارنالعان ونىمدەر بار. قاتىسۋشىلار تاڭبالاۋ جۇيەسىنىڭ تولىق جۇمىس تسيكلىن — تاڭبالاۋ كودتارىن شىعارۋ جانە ءونىمدى توپتاستىرۋدان باستاپ، ونى باقىلاۋ-كاسسالىق ماشينالار ارقىلى اينالىمنان شىعارۋعا دەيىن تەكسەردى.

پراكتيكالىق سىناقتار وتاندىق كاسىپورىندار مەن ءىرى يمپورتتاۋشىلاردىڭ وندىرىستىك جانە قويما الاڭدارىندا جۇرگىزىلدى. جوباعا «مەديدەز عوب» جشس، «اۆرورا» وكجشس، «پروفحيم» جشس، «ۆيتا ۆەنت» جشس، «پروكتەر ەند گەمبل قازاقستان ديستريبيۋشن» جشس، «Amway Central Asia» جشس جانە باسقا دا كومپانيالار قاتىستى. بۇل ناقتى وندىرىستىك ۇدەرىستەر جاعدايىندا سايكەستەندىرۋ قۇرالدارىن قولدانۋدىڭ ءارتۇرلى تاسىلدەرىنىڭ، ونىڭ ىشىندە جاپسىرما جاپسىرۋ جانە تىكەلەي باسىپ شىعارۋ ادىستەرىنىڭ تيىمدىلىگىن باعالاۋعا مۇمكىندىك بەردى.

«مەديدەز» عوب» جشس وكىلى اتاپ وتكەندەي، پيلوتتىق جوباعا قاتىسۋ تاڭبالاۋ جۇيەسى جۇمىسىن قولدانىستاعى ءوندىرىس جاعدايىندا سىناقتان وتكىزىپ، ونىڭ ءىس جۇزىندەگى تەحنولوگيالىق ۇدەرىستەرگە ىقپالىن باعالاۋعا مۇمكىندىك بەردى.

— وندىرۋشىلەر ءۇشىن جاڭا تسيفرلىق شەشىمدەردىڭ سالانىڭ ەرەكشەلىكتەرى مەن ناقتى وندىرىستىك ۇدەرىستەر ەسكەرىلە وتىرىپ ەنگىزىلۋى اسا ماڭىزدى. سوندىقتان پيلوتتىق فورماتتىڭ پراكتيكالىق ماڭىزى زور. ول ارتۇرلى تەحنولوگيالىق شەشىمدەردى سىناقتان وتكىزۋگە، سايكەستەندىرۋ قۇرالدارىن قولدانۋدىڭ ەڭ ءتيىمدى تاسىلدەرىن انىقتاۋعا جانە رەتتەۋشى شەشىمدەر قابىلدانعانعا دەيىن ىقتيمال ماسەلەلەردى الدىن الا پىسىقتاۋعا مۇمكىندىك بەرەدى. مۇنداي ءتاسىل مەملەكەتتىڭ مىندەتتەرىن دە، بيزنەس مۇددەلەرىن دە تەڭ دارەجەدە ەسكەرەتىن تەڭگەرىمدى تەتىكتەردى قالىپتاستىرۋعا ىقپال ەتەدى، — دەپ اتاپ ءوتتى پيلوتتىق جوبا بارىسىندا «„مەديدەز“ عوب» جشس وندىرىستىك تسەحىنىڭ شەبەرى ءامىر وتەنوۆ.

قاناتقاقتى جوبا ناتيجەلەرى تاۋارلاردى تسيفرلىق تاڭبالاۋ سالاسىندا ودان ارىشەشىمدەر ازىرلەۋ كەزىندە پايدالانىلادى.

جوبا بارىسىندا الىنعان دەرەكتەر سالانىڭ تەحنيكالىق دايىندىعىن باعالاۋعا، تسيفرلىق شەشىمدەردى قولدانىستاعى بيزنەس-ۇدەرىستەرگە ەنگىزۋدىڭ ەرەكشەلىكتەرىن ايقىنداۋعا جانە تۇرمىستىق حيميا مەن كوسمەتيكالىق ونىمدەر نارىعىنىڭ ەرەكشەلىكتەرىن ەسكەرە وتىرىپ، نورماتيۆتىك رەتتەۋدى جەتىلدىرۋ جونىندە ۇسىنىستار قالىپتاستىرۋعا مۇمكىندىك بەردى.

Abai.kz