2026 جىلعى نەگىزگى ۇلتتىق بىرىڭعاي تەستىلەۋگە 233 مىڭعا جۋىق تالاپكەر قاتىسىپ، ولاردىڭ 177 مىڭعا جۋىعى شەكتى بالل جينادى، دەپ حابارلايدى عىلىم جانە جوعارى ءبىلىم مينيسترلىگى.

تالاپكەرلەردىڭ 73,1%-ى تەستتى قازاق تىلىندە، 26,8%-ى ورىس تىلىندە، ال 383 ادام اعىلشىن تىلىندە تاپسىرعان.

تالاپكەرلەرگە نەگىزگى ۇبت-نى ەكى رەت تاپسىرىپ، ەڭ جوعارى ناتيجەمەن ءبىلىم گرانتى كونكۋرسىنا قاتىسۋ مۇمكىندىگى بەرىلدى. ناتيجەسىندە 233 مىڭ تالاپكەر تەستىلەۋدى جالپى 422 مىڭ رەت تاپسىرعان. بىلتىر بۇل كورسەتكىش 210 مىڭ تالاپكەر جانە 381 مىڭ تەستىلەۋدى قۇراعان.

– تەستىلەۋ قورىتىندىسى بويىنشا 177 مىڭعا جۋىق تالاپكەر شەكتى بالل جينادى، بۇل قاتىسۋشىلاردىڭ جالپى سانىنىڭ 76%-ىن قۇرايدى. بەس ءپان بويىنشا ۇبت-نىڭ ورتاشا بالى – 69. ەڭ جوعارى 140 بالدى پاۆلودار وبلىسىنىڭ تۇلەگى اسەت التاير جانە قىزىلوردا وبلىسىنىڭ تۇلەگى بالحان الفيا (قازتەست كونۆەرتاتسياسى ارقىلى) جينادى. سونداي-اق 821 تالاپكەر 130 بالدان جوعارى ناتيجە كورسەتتى، – دەلىنگەن حابارلامادا.

بيىل ەرەكشە ءبىلىم بەرۋ قاجەتتىلىگى بار 800 تالاپكەرگە ۇبت تاپسىرۋ ءۇشىن قولايلى جاعداي جاسالعان.

ەلەكتروندى فورماتتاعى تەستىلەۋ بارىسىندا تالاپكەرلەر اپەللياتسيانى ونلاين بەرە الدى. بيىل 95 مىڭنان استام اپەللياتسيالىق ءوتىنىش قابىلدانىپ، ولاردىڭ ىشىندە 152 بىرەگەي تەست تاپسىرماسىنا قاتىستى ءوتىنىش قاناعاتتاندىرىلعان.

– رەسپۋبليكالىق كوميسسيا جۇمىسىن اياقتادى. تالاپكەرلەردىڭ سەرتيفيكاتتارى جەكە كابينەتتە قولجەتىمدى، – دەپ حابارلادى مينيسترلىك.

ۇبت وتكىزۋ كەزىندە 890 ەرەجە بۇزۋشىلىق تىركەلگەن. ونىڭ ىشىندە 522 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ وتپەك بولعانى ءۇشىن تەست تاپسىرۋ مۇمكىندىگىنەن ايىرىلدى. تاعى 361 ادام تەستىلەۋ بارىسىندا ەرەجەنى بۇزعانى ءۇشىن اۋديتوريادان شىعارىلىپ، ولاردىڭ ناتيجەلەرى جويىلدى.

سونىمەن قاتار بەينەجازبالاردى تەكسەرۋ بارىسىندا ەرەجە بۇزعان تاعى 7 تالاپكەردىڭ ناتيجەسى جويىلعان. بوگدە ادامنىڭ ورنىنا تەست تاپسىرۋ فاكتىلەرى انىقتالماعان.

Abai.kz