«كاك بارانى سەبيا ۆەدۋت»: اتا-انادان قورلىق كورگەنىن ايتقان مۇعالىم پرەزيدەنتكە ۇندەۋ جاسادى، - دەپ جازادى qaz365.kz سايتى. 

ۇستازدىڭ ايتۋىنشا، ءبىرىنشى سىنىپ وقۋشىسىنىڭ اناسى تاراپىنان وزىنە جانە مەكتەپ ۇجىمىنا قاتىستى قورلايتىن سوزدەر ايتىلعان.

جەتىسۋ وبلىسى كوكسۋ اۋدانىنداعى نۇرمولدا الدابەرگەنوۆ اتىنداعى ورتا مەكتەپتىڭ باستاۋىش سىنىپ مۇعالىمى ءۇمىت ساعىنبەكقىزى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا ۇندەۋ جاسادى.

ءۇمىت ايتاقونوۆا ءبىلىم سالاسىندا 38 جىل ەڭبەك ەتىپ كەلە جاتقانىن ايتادى. ونىڭ سوزىنشە، جاڭا وقۋ جىلى باستالعالى نەبارى ساناۋلى كۇن وتكەنىنە قاراماستان، اتا-انالاردىڭ بىرىمەن تۇسىنىسپەۋشىلىك تۋىنداعان. قولىندا  اراداعى جانجالعا بايلانىستى اۋديوجازبالار مەن بەينەماتەريالدار بار.

«مەندە اۋديوجازبا بار. وندا مەكتەپتىڭ ۇجىمىنا قاتىستى اۋىر سوزدەر ايتىلىپ، مەكتەپتى “بىت-شىتىن شىعارىپ، تاياق جەگىزۋگە” كەلگەنى تۋرالى سوزدەر بار. سوندا ءبىرىنشى سىنىپقا بالاسىن ءبىلىم الۋعا اكەلدى مە، الدە مەكتەپ ۇجىمىمەن ەسەپ ايىرىسۋ ءۇشىن كەلدى مە دەگەن سۇراق تۋىندايدى»، دەيدى ۇستاز.

مۇعالىم بۇدان بولەك، ءوزىن «نەكومپەتەنتنايا»، ياعني كاسىبي بىلىكتىلىگى جوق مۇعالىم رەتىندە كورسەتەتىن جانە اتا-انالارعا «نەادەكۆاتنىي» دەپ اتاعان بەينەجازبا بار ەكەنىن مالىمدەدى.

وسى جاعدايدان كەيىن ۇستاز 4 قىركۇيەكتە مەكتەپ ديرەكتورىنا ءوتىنىش جازىپ، ءوزىن باسقا سىنىپقا اۋىستىرۋدى سۇراعان. الايدا ونىڭ ايتۋىنشا، سىنىپتاعى 16 وقۋشىنىڭ اتا-اناسى مۇعالىمدى قولداپ، ديرەكتورعا وزدەرى دە ءوتىنىش بەرگەن. ولار ۇستازدى سىنىپ جەتەكشىسى رەتىندە قالدىرىپ، داۋلى اتا-انانىڭ بالاسىن باسقا سىنىپقا اۋىستىرۋدى ۇسىنعان.

«16 بالانىڭ اتا-اناسى مەنى قولداپ، ديرەكتورعا ءوتىنىش جازدى. “اپايىمىزدى وسى سىنىپتا قالدىرىڭىزدار، بىزگە باسقا مۇعالىم كەرەك ەمەس. ەگەر مۇمكىندىك بولسا، ءمولدىردىڭ بالاسىن باسقا سىنىپقا اۋىستىرىڭىزدار” دەدى. بۇل — مەنىڭ 38 جىلدىق ەڭبەگىمە اتا-انالاردىڭ بەرگەن باعاسى دەپ قابىلدايمىن»، دەيدى مۇعالىم.

ۇستازدىڭ سوزىنشە، الگى اتا-انا ءوزىن زاڭگەر ءارى سوت ورىنداۋشىسى رەتىندە تانىستىرىپ، «ماعان ەشتەڭە جاساي المايسىزدار» دەگەن مازمۇندا پىكىر بىلدىرگەن.

«مەن سىرت پىكىردەن قاشپايمىن. ەگەر مەنىڭ كاسىبي جۇمىسىما قاتىستى ناقتى ماسەلە بولسا، ونى زاڭ اياسىندا قاراۋعا دايىنمىن. پەداگوگيكالىق ادەپ جونىندەگى كەڭەس بولسىن، ءبىلىم ءبولىمى بولسىن — ءتيىستى ورگان تەكسەرسىن. بىراق مۇعالىمدى قورلاۋ، كاسىبي بىلىكتىلىگىن نەگىزسىز جوققا شىعارۋ دۇرىس ەمەس. مەن 38 جىل بويى وسى مەكتەپتە ەڭبەك ەتىپ كەلەمىن»، دەيدى ۇندەۋىندە.

ۇستاز  پەداگوگتىڭ ەرەكشە مارتەبەسى زاڭمەن قورعالاتىنىن اتاپ ءوتىپ، اتا-انالار تاراپىنان مۇعالىمنىڭ كاسىبي قىزمەتىنە قۇرمەتپەن قاراۋ كەرەكتىگىن جەتكىزدى.

«مەن پرەزيدەنتىمىزدەن وسى جاعدايعا نازار اۋدارۋدى سۇرايمىن. مەن ەشكىممەن جاۋلاسىپ، داۋلاسقىم كەلمەيدى. مەنىڭ تالابىم بىرەۋ عانا — جاعداي وبەكتيۆتى تەكسەرىلسە ەكەن. ەگەر مەنىڭ تاراپىمنان قاتەلىك بولسا، ونى دا ايتۋعا دايىنمىن. بىراق ۇستازدىڭ ار-نامىسى مەن قادىر-قاسيەتى تاپتالماۋى كەرەك»، دەيدى ءۇمىت ايتاقونوۆا.

مۇعالىم پرەزيدەنتتەن جاعدايدى جان-جاقتى ءارى وبەكتيۆتى تەكسەرۋگە ىقپال ەتۋدى سۇرادى. ونىڭ ايتۋىنشا، ماسەلەنىڭ باستى ماقساتى — جەكە جانجال شىعارۋ ەمەس، پەداگوگتىڭ كاسىبي بەدەلىن قورعاۋ جانە مەكتەپتەگى ءوزارا سىيلاستىقتى ساقتاۋ.

الەۋمەتتىك جەلىدە ۇستازدى قولداپ پىكىر جازعاندار وتە كوپ. كوپشلىك ۇستازدىڭ  كاسىبي قىزمەتىن اتقارۋىنا كەدەرگى كەلتىرەتىن قىسىم بولماۋى كەرەكتىگىن ايتىپ، مۇنداي جاعدايلاردى زاڭ اياسىندا قاراۋ قاجەتتىگىن كوتەرگەن.

Abai.kz