قوردايدا ەسىرتكى كونترابانداسى كۇدىگىمەن رەسەيلىك رەپەر Navai ۇستالدى. 

جامبىل وبلىسىندا شەكارادان وتپەك بولعان تانىمال رەسەيلىك رەپەر Navai (شىن اتى-ءجونى — ناۆاي باحمانوعلى باكيروۆ) ەسىرتكى كونترابانداسى بويىنشا كۇدىككە ءىلىنىپ، ۇستالدى. بۇل تۋرالى وڭىرلىك پوليتسيا دەپارتامەنتىنىڭ ءباسپاسوز قىزمەتى مالىمدەدى.

وقيعا 13 قازاندا «قورداي» وتكىزۋ پۋنكتىندە بولعان. شەكارالىق باقىلاۋ بارىسىندا ءانشى وتىرعان كولىك تەكسەرىلىپ، ىشىنەن زاڭسىز ەسىرتكى زاتى تابىلىپ، تاركىلەندى. ازىرگە تاركىلەنگەن زاتتىڭ ناقتى قاي ءتۇرى ەكەنى جانە ونىڭ كولەمى تۋرالى رەسمي اقپارات جاريالانعان جوق. ءتارتىپ ساقشىلارى اتالعان فاكتى بويىنشا قىلمىستىق ءىس قوزعادى.

جەرگىلىكتى بۇقارالىق اقپارات قۇرالدارىنىڭ حابارلاۋىنشا، رەپەرمەن بىرگە كولىكتە بولعان تاعى ەكى ادام جاۋاپ الىنعاننان كەيىن بوساتىلعان.

ورىن العان وقيعاعا بايلانىستى ءانشىنىڭ 14 قازاندا استانا قالاسىندا ءوتۋى ءتيىس بولعان جەكە كونتسەرتى كەيىنگە قالدىرىلىپ، وتپەي قالدى.

قازىرگى ۋاقىتتا تەرگەۋ امالدارى جالعاسۋدا. وقيعانىڭ وزگە دە ءمان-جايلارى انىقتالىپ جاتىر.

Abai.kz