جەتىسۋ وبلىسىندا مەديتسينالىق ينفراقۇرىلىمدى جاڭارتۋ جۇمىستارى جالعاسۋدا.

رەسپۋبليكا كۇنى قارساڭىندا تالدىقورعاندا ءبىر اۋىسىمدا 500 ادامدى قابىلدايتىن جاڭا قالالىق ەمحانا پايدالانۋعا بەرىلىپ، كۇردەلى جوندەۋدەن كەيىن اقسۋ جانە كەربۇلاق ورتالىق اۋداندىق اۋرۋحانالارى اشىلدى. اۋىل تۇرعىندارىنا ساپالى مەديتسينالىق قىزمەتتىڭ قولجەتىمدىلىگىن ارتتىرۋ ماقساتىندا ەسكەلدى اۋدانىندا جاڭا دارىگەرلىك امبۋلاتوريا اشىلدى.

ەلتاي اۋىلىنداعى جاڭا دارىگەرلىك امبۋلاتوريا ءبىر اۋىسىمدا 25 ادامدى قابىلداۋعا ارنالعان. عيماراتتا بالالاردى قابىلداۋ، ۆاكتسيناتسيالاۋ، ەم-شارالار جۇرگىزۋ، سكرينينگتەن وتكىزۋ، ستوماتولوگيالىق كومەك كورسەتۋ، كۇندىزگى ستاتسيونار جانە باسقا دا مەديتسينالىق قىزمەتتەرگە ارنالعان كابينەتتەر جابدىقتالعان. وسىنىڭ ارقاسىندا اۋىل تۇرعىندارى قاجەتتى مەديتسينالىق كومەكتى ۇيىنە جاقىن جەردە، اناعۇرلىم قولايلى جاعدايدا الا الادى.

جاڭا مەديتسينالىق مەكەمەنىڭ اشىلۋىن جەرگىلىكتى تۇرعىندار كوپتەن كۇتكەنىن ايتادى. 90 جاستاعى اۋعالي مىرزاحمەتوۆ بۇرىن مەديتسينالىق كومەك 1959 جىلى سالىنعان شاعىن عيماراتتا كورسەتىلگەنىن جەتكىزدى.

– مەن ءومىر بويى وسى اۋىلدا تۇردىم، جاقسى مەديتسينالىق مەكەمەنىڭ جاقىن جەردە بولعانىنىڭ قانشالىقتى ماڭىزدى ەكەنىن جاقسى بىلەمىن. جاڭا امبۋلاتوريانىڭ اشىلعانىنا وتە قۋانىشتىمىز، ويتكەنى بۇل كۇندى 20 جىلداي كۇتتىك، بۇگىنگە دەيىن وسى ماسەلەنى كوتەرىپ كەلدىك. بۇرىن شاعىن ەسكى عيماراتقا بارىپ، مەديتسينالىق كومەك الۋعا تۋرا كەلەتىن. ەندى اۋىل تۇرعىندارى ءۇشىن الدەقايدا قولايلى جاعداي جاسالىپ وتىر. وسىنداي وزگەرىستەردىڭ رەسپۋبليكا كۇنى قارساڭىندا بولىپ جاتقانى ەرەكشە قۋانتادى، – دەدى ول.

امبۋلاتوريانىڭ اشىلۋى جاس وتباسىلار ءۇشىن دە ەرەكشە ماڭىزدى. اۋىل تۇرعىنى جانارگۇل ەرمۇرات ەندى بولاشاق انالار مەن بالالارعا مەديتسينالىق قىزمەت كورسەتۋ قولايلى بولا تۇسەتىنىن اتاپ ءوتتى.

– مەن ءۇشىن، بولاشاق انا رەتىندە، جاڭا امبۋلاتوريانىڭ اشىلۋى – ەرەكشە قۋانىشتى جايت. جاقىندا وتباسىمىزدا ءۇشىنشى بالا دۇنيەگە كەلەدى. ەندى ءار دارىگەر پاتسيەنتتەردى جەكە كابينەتتە، قولايلى جاعدايدا قابىلداي الادى. بۇل بولاشاق انالارعا دا، بالالارعا دا، اۋىلدىڭ بارلىق تۇرعىندارىنا ىڭعايلى. وسىنداي قاجەتتى مەديتسينالىق نىساننىڭ اشىلعانىنا ريزامىز، – دەدى ول.

40 جىل ءومىرىن مەديتسينا سالاسىنا ارناعان داميرا لياتيەۆا دا اۋىل تۇرعىندارىنىڭ قۋانىشىنا ورتاقتاستى. ول ەڭبەك جولىندا مەديتسينالىق كومەكتىڭ قولجەتىمدىلىگى مەن مامانداردىڭ جۇمىس جاعدايىنىڭ قانشالىقتى ماڭىزدى ەكەنىن جاقسى تۇسىنەدى.

– مەديتسينا مەنىڭ بۇكىل ءومىرىم دەۋگە بولادى. سوندىقتان اۋىلىمىزدا زاماناۋي امبۋلاتوريانىڭ اشىلىپ جاتقانىنا شىن جۇرەكتەن قۋانىشتىمىن. مەديتسينا قىزمەتكەرلەرى ءۇشىن جۇمىس ىستەۋگە جاقسى جاعداي جاسالۋى كەرەك، ويتكەنى پاتسيەنتتەرگە كورسەتىلەتىن قىزمەت ساپاسى كوپ جاعدايدا سوعان بايلانىستى. ال تۇرعىندار ءۇشىن ەڭ باستىسى – دارىگەرگە ۋاقىتىندا قارالىپ، قاجەتتى كومەك الۋى. جاڭا امبۋلاتوريا حالىققا ۇزاق جىلدار بويى قىزمەت ەتىپ، جەرلەستەرىمىزدىڭ دەنساۋلىعىن ساقتاۋعا ىقپال ەتەدى دەپ ويلايمىن، – دەدى ول.

سوڭعى ءۇش جىلدا ەسكەلدى اۋداندا 25 الەۋمەتتىك نىسان سالىندى. ونىڭ ىشىندە 18-ءى – دەنساۋلىق ساقتاۋ نىسانى.

اتاپ وتسەك، وسى كۇنى اۋداننىڭ تاعى ءبىر ەلدى مەكەنى جالعىزاعاش اۋىلىندا «اۋىل قۇتقارۋشىلارى» ۆەدومستۆولىق باعدارلاماسى اياسىندا ءورت ءسوندىرۋ بەكەتى اشىلدى. سونىڭ ارقاسىندا 1230-دان استام ادام تۇراتىن جالعىزاعاش جانە بيعاش اۋىلدارى ورتتەن قورعاۋ شارالارىمەن قامتاماسىز ەتىلدى.

Abai.kz