ۋكراينا پرەزيدەنتى تۇركياعا جاساعان ساپارى بارىسىندا تۇرىك باق-تارىنا سۇحبات بەرىپ، بىلاي دەدى:

- ءبىز رەسەي ۋاقىتشا باسىپ العان شىعىس ايماقتارىمىز بەن قىرىم رەسەيدىكى بولادى دەگەنگە كەلىسە المايمىز. بۇعان كەلىسۋ - كونستيتۋتسيامىزدى اياققا تاپتاۋ ءھام قوعامىمىزدىڭ سەنىمىن ساتىپ كەتۋ دەگەن ءسوز. ال رەسەيدىڭ قالاۋى وسى. اراعايىنشى جاساۋعا نيەتتى ءار ءتۇرلى ادامدار ارقىلى جەردەن باس تارتۋىمىزدى تالاپەتۋدە. وسى تالاپتىڭ ءوزى قيسىنعا كەلمەيتىن، كەرتارتپا تالاپ، - دەدى.

ال OSINT ساراپشىلارى: "ۋكراينا رەسەيدىڭ مۇناي وڭدەۋ قۋاتىنىڭ 10%-عا جۋىعىن ءۇش كۇندە ىستەن شىعاردى", - دەيدى.

بۇل جولى ۋكراينا سوققىلارىنىڭ كوزدىگىنە كستوۆ، نوۆوكۋيبىشەۆ مۇناي وڭدەۋ زاۋىتتارى جانە «باشنەفت-نوۆويل» كاسىپورنى ىلىكتى.

ولاردىڭ جالپى جىلدىق وڭدەۋ قۋاتى شامامەن 33 ملن توننا مۇنايدى قۇرايدى — بۇل رەسەيدەگى بارلىق مۇناي وڭدەۋ قۋاتىنىڭ شامامەن 10%-ى.

شابۋىلدار كوزگە كورىنەرلىكتەي زاقىم كەلتىرۋدە: ءبىر سوققىدان كەيىن بىردەن بىرنەشە تەحنولوگيالىق قوندىرعى، سونىڭ ىشىندە مۇنايدى باستاپقى جانە ەكىنشى رەت وڭدەۋ قوندىرعىلارى ىستەن شىعىپ قالۋى مۇمكىن.

بۇعان دەيىن ۋكراينا اقش پرەزيدەنتى اكىمشىلىگىنىڭ وتىنىشىمەن ەكى اپتا بويى رەسەيدىڭ ءموز-دەرىنە سوققى جاساۋدان تارتىنىپ كەلگەن. ال رەسەي بولسا شابۋىلدارىن توقتاتقان جوق.

Abai.kz