مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا 2026 جىلعى 31 قازاندا «ىلە-بالقاش» مەملەكەتتىك تابيعي رەزەرۆاتىنىڭ اۋماعىندا امۋر ەسىمدى اتالىق امۋر جولبارىسى تابيعي مەكەندەۋ ورتاسىنا جىبەرىلدى.

ول قازاقستاندا جولبارىستاردى قايتا جەرسىندىرۋ باعدارلاماسى اياسىندا جابايى تابيعاتقا شىعارىلعان ەكىنشى جولبارىس اتاندى. جولبارىس تابيعي ورتاعا جىبەرىلەر الدىندا ۆەتەريناريالىق تەكسەرۋلەر مەن مىنەز-قۇلىق ەرەكشەلىكتەرىن باعالاۋعا باعىتتالعان بىرقاتار سىناقتان ءوتتى. ماماندار ونىڭ دەنساۋلىعىن، اڭشىلىق داعدىلارىن، وزدىگىنەن قورەك تابۋ قابىلەتىن، سونداي-اق ادامعا قاتىستى مىنەز-قۇلقىن باعالادى. سىناق ناتيجەلەرى امۋردىڭ تابيعي ورتادا وزدىگىنەن تىرشىلىك ەتۋگە دايىن ەكەنىن راستادى. الداعى ۋاقىتتا ونىڭ قوزعالىسى مەن جاڭا ورتاعا بەيىمدەلۋىن باقىلاۋ ءۇشىن جولبارىسقا سپۋتنيكتىك باقىلاۋ قارعىباۋى تاعىلدى.

ءىس-شاراعا ەكولوگيا جانە تابيعي رەسۋرستار ءمينيسترى الىبەك قۋانتىروۆ، «امۋر جولبارىسى» ورتالىعىنىڭ باس ديرەكتورى سەرگەي اراميلەۆ، «ىلە-بالقاش» مەملەكەتتىك تابيعي رەزەرۆاتىنىڭ قىزمەتكەرلەرى، ماماندار مەن ادام جانە جولبارىس اراسىنداعى قاقتىعىستاردىڭ الدىن الۋ توبىنىڭ مۇشەلەرى قاتىستى.

بۇعان دەيىن 31 شىلدەدە تابيعي ورتاسىنا جىبەرىلگەن ءۇمىت ەسىمدى انالىق جولبارىس رەزەرۆات اۋماعىنا بىرتىندەپ جەرسىنىپ كەلەدى. ول وزدىگىنەن اڭ اۋلاپ، جابايى تابيعاتقا  ءساتتى بەيىمدەلۋدە.

70 جىلدان استام ۋاقىت بويى جولبارىستار تابيعي ورتاسىندا بولعان جوق. تابيعي ەكوجۇيەلەردى قالپىنا كەلتىرۋ بويىنشا كوپجىلدىق جۇمىستاردىڭ ارقاسىندا بۇل جىرتقىشتار بىرتىندەپ تاريحي مەكەندەيتىن جەرلەرىنە ورالادى.

جولبارىستاردى قايتا جەرسىندىرۋ ءۇشىن اۋقىمدى دايىندىق جۇمىستارى جۇرگىزىلدى. 2018 جىلى «ىلە-بالقاش» مەملەكەتتىك تابيعي رەزەرۆاتى قۇرىلىپ، ونىڭ اۋماعىندا تابيعي مەكەندەۋ ورتاسىن قالپىنا كەلتىرۋ، قورەكتىك قوردى مولايتۋ جانە قاجەتتى تابيعات قورعاۋ ينفراقۇرىلىمىن دامىتۋ جۇمىستارى باستالدى. بۇل باعىتتا جابايى تۇياقتى جانۋارلاردىڭ سانىن ارتتىرۋعا ەرەكشە كوڭىل بولىنۋدە. رەزەرۆات اۋماعىنا بۇقار بۇعىلارى مەن قۇلاندار جىبەرىلدى.

ماسەلەن، 2026 جىلعى قىركۇيەكتە «التىن-ەمەل» مەملەكەتتىك ۇلتتىق تابيعي پاركىنەن «ىلە-بالقاش» رەزەرۆاتىنا 30 قۇلان اكەلىندى. قورەكتىك قور مەن تابيعي مەكەندەۋ ورتاسىن قالپىنا كەلتىرۋ باعدارلامانىڭ كەلەسى كەزەڭىنە، ياعني جىرتقىشتاردىڭ ءوزىن تابيعاتقا قايتارۋعا، پوپۋلياتسياسىن كوبەيتۋگە نەگىز قالادى.

سونداي-اق جەرگىلىكتى تۇرعىنداردىڭ قاۋىپسىزدىگىن قامتاماسىز ەتۋگە جانە ادام مەن جىرتقىش اراسىندا تۋىنداۋى مۇمكىن قاتەرلەردىڭ الدىن الۋعا ەرەكشە كوڭىل بولىنۋدە. وسى ماقساتتا ارنايى توپ قۇرىلدى. ونىڭ ماماندارى جانۋارلاردىڭ قوزعالىسىن باقىلايدى، جەرگىلىكتى تۇرعىندارمەن تۇراقتى بايلانىس ورناتادى جانە توتەنشە جاعدايلاردان تىس تۋىندايتىن كۇتپەگەن وقيعالارعا جەدەل دەن قويادى.

Abai.kz