زاكون.كز پورتالىندا (http://www.zakon.kz/4616658-integracionnaja-iniciativa-respubliki.html) «ينتەگراتسيوننايا ينيتسياتيۆا رەسپۋبليكي كازاحستان - دۆوينوە گراجدانستۆو ۆ ەۆرازيسكوم سويۋزە»   تاقىرىبىمەن جاڭا زاڭجوبا جاريالانىپتى.

ارينە، بۇل جوبانىڭ اۆتورى قازاقستان ەمەستىگى ايقىن، جوبا سولتۇستىكتەن شىعىپ وتىر. بولماسا بيلىكتى كەۋلەگەن ىشتەگى رەسەيشىل كۇشتەر جاقسى جۇمىس ىستەۋدە. ولاردىڭ ەكى نىساناسى بار: اتالعان تاقىرىپپەن قازاقتاردى قاق جارۋ، ەلگە يدەولوگيالىق بۇلك سالۋ، ەكىجاقتى ازاماتتىققا ەگەمەن ەلدىڭ يەسى قارسى بولاتىنى بەلگىلى جانە سونى باستاما ەتكەن بيلىككە ۇلتتى قارسى قويۋ. شىن مانىندە بۇل قازاق بيلىگىنىڭ قولىن بۇراۋ ءتاسىلى. ءورىستىلدى قازاق بيلىگىنىڭ بارلىق ءىس قاعازى رەسەي مەمتىلىندە بولعاندىقتان كەز كەلگەن زاڭجوبا سول تىلدە ءارى سولتىلدىلەردىڭ قولىمەن جاسالاتىن ءمالىم. بۇل ءبىر.

ەكىنشى، اتالعان «زاڭجوبادا» ارانداتۋ تەرميندەرىنەن اياق الىپ جۇرگىسىز: باستى قاتىرماي، «زاڭجوبانىڭ» «تۇسىندىرمە حاتىنا» كوز جۇگىرتەيىك: 

«پوياسنيتەلنايا زاپيسكا 
ك پروەكتۋ زاكونا رەسپۋبليكي كاحاحستان و ۆنەسەني يزمەنەني ي دوپولنەني ۆ  زاكون رەسپۋبليكي كازاحستان «و گراجدانستۆە رەسپۋبليكي كازاحستان» (و دۆوينوم گراجدانستۆە ۆ رەسپۋبليكي كاحاحستان) – دەپ باستالىپ، «قازاقستان» ءسوزىن قاساقانا بۇرمالاپ مازاق ەتىپ وتىر.

ودان ءارى:

«1. زاڭجوبانى قابىلداۋ قاجەتتىگىنىڭ نەگىزدەمەسى.

كازىرگى الەمدىك مەملەكەتتەر ەكونوميكاسىنىڭ جاھاندانۋىنداعى دۇنيەجۇزىلىك ۇدەرىستىڭ دامۋ، تمد، ەۆرووداق، ەۆرازەود، ودكب، شوس، كەدەن وداعىن قۇرۋ، ەۆرازود (ەاس) – ءبىرتۇتاس ساياسي، ەكونوميكالىق ،اسكەري، كەدەندىك، گۋمانيتارلىق، مادەني كەڭىستىگى بار مەملەكەتتەردىڭ كونفەدەراتيۆتىك وداعى جانە باسقا دا دوستاسقان ەكونوميكالىق جانە اسكەري-ساياسي وداقتار قۇرۋ ناتيجەسىندە، ازاماتتاردىڭ جاپپاي زاڭدىق-ۇيىمدىق ماسەلەلەرى تۋىندايدى، بۇل – بارلىق سالا بويىنشا ءوزارا كىرىككەن ەگەمەن مەملەكەتتەردىڭ ومىرىندەگى ماڭىزى بار قوس ازاماتتىق الۋ ماسەلەسى. قوس ازاماتتىقتا كوپتەگەن ومىرشەڭ مۇمكىندىكتەر بار، اسىرەسە كورشى ەلدە تۇرىپ جۇمىس ىستەيتىن جانە دە وعان الەۋمەتتىك قورعانىس، تۇراقتى جۇمىس، ءبىلىم الۋعا، سونداي-اق ءوزىنىڭ تۇراقتى ەلىنە دەگەن وتانشىل سەزىمىنە قاياۋ تۇسىرمەۋگە، ونىڭ پسيحولوگيالىق جانە الەۋمەتتىك جايلىلىعىنا، وزىنە ءوزى باعا بەرۋ مەن ءوز تۇلعاسىن سايكەستەندىرۋگە (يدەنتيفيكاتسيا), ازاماتتىق ۇستانىمىن ساقتاۋعا -  شەتەلدىك ازامات ءۇشىن قولايلى (كو، ەاو ەلدەرىندە ۋاقىتشا جۇمىس ىستەپ، ەمدەلەتىن قر ازاماتى) – بۇل قر ءۇشىن ەكونوميكالىق جانە الەۋمەتتىك پايدالى».

         اسىرەسە، كەكەسىن مەن مازاق سوڭعى سويلەمدە ايقىن: «بۇل قر ءۇشىن ەكونوميكالىق جانە الەۋمەتتىك پايدالى»...

ارينە، بۇل «باستاما» تەگىن ەمەس، ەلدەگى ىشكى يدەولوگيالىق احۋال مەن الەۋمەتتىك جاعدايعا جاقسى مونيتورينگ جاساي كەلىپ، ۇرىمتال جەرگە پىشاق ۇرىپ وتىر. اۆتورلار استانانىڭ ورىس مەكتەپتەرىندەگى 47 پايىز قازاق بالالار «چۋكچا» سەكىلدەنىپ ءوز جۇرتىنان جەرۋ يدەولوگياسىنا ۇرىنعانىن بىلمەي وتىرعان جوق، ونىڭ ۇستىنە ەلدەگى زەينەتاقى مولشەرى مەن رەسەيدەگى كورسەتكىش ايىرماسى، ءتىپتى، پەرزەنتپۇلدىڭ  ايىرماسى دا جەر مەن كوكتەي ەكەنىن دە ەسكەرگەن. وسى وسالدىق ارقىلى قازاقستاندى قاقپانعا ءتۇسىرۋ كوزدەلگەن. بۇعان ىلىعاتىن جانە وسى ساياساتتى العا باستىراتىن  بيلىكتە وتىرعان شەتەلگە بەرىلگەن قازاق شەندىلەرى از ەمەس. سولاردىڭ ىقپالىمەن ىشكى-سىرتقى ميگراتسيا ساياساتى دا بەتىمەن كەتىپ بارادى: بىرەسە ورالماندارعا جاعداي جاسالعان بولادى، بىرەسە وعان قاقپا جابىلادى، بىرەسە شەتەلدىكتەردى ەلگە قاپتاتۋ ساياساتى باس كوتەرەدى، بىرەسە...

ءتۇپتىڭ تۇبىندە قوسازاماتتىق دەگەنىمىز – ۋكراينانىڭ وڭتۇستىك-شىعىسىنا تاراتىلعان رەسەيلىك تولقۇجات-بومباسىن باسقا جولمەن قولدانۋ تاكتيكاسى عانا.قىسقاسى، ۋكرايندىق نۇسقا ورتا ازيا ءۇشىن تىم قىمبات، بۇل ايماقتى بورىكپەن ۇرىپ الۋ ساياساتى باستالدى.

سىرىم دات

Abai.kz