پرەزيدەنت اۋىلشارۋاشىلىعى وندىرىسىنە جارامدى جەرلەردى ءتيىمدى پايدالانۋ ماسەلەسىن ۇنەمى تالاپ ەتەتىنىن بىلەمىز. بىراق سوعان قاراماي جالعا الۋشىلارعا ۇزاق مەرزىمگە بەرگەن 10 ملن. گا جەر جارامسىز بولىپ، قولدانىسسىز جاتىر. ونى وڭالتۋ ماسەلەسىن ەشكىم دە كوتەرمەيدى.  جالگەرلەر وزدەرىنىڭ العان جەرلەرىندە  توپىراقتىڭ قۇنارلىلىعىن جەلدىڭ، سۋدىڭ ەروزياسىنان ساقتاۋعا باعىتتالعان ءتيىمدى شارالار جاسامايدى. بۇل اگروونەركاسىپ كەشەنىن ەلباسى تالاپ ەتكەندەي يننوۆاتسيالىق رەلسكە ءتۇسىرۋ مۇمكىندىگىنەن مۇلدە الىس جاتقان دۇنيەلەر. ونىڭ ۇستىنە قولدانىلماي جاتقان جەرلەردى رەۆيزيالاۋ جۇمىستارى دا وتە باياۋ جۇرگىزىلۋدە.

مىنە، وسىنداي ماسەلەلەردى ايتا كەلىپ ءماجىلىس دەپۋتاتى تۇرسىنبەك ومىرزاقوۆ ۇكىمەتتىڭ الدىنا اۋىلشارۋاشىلىعى جەرلەرىن پايدالاناتىندارعا جەردىڭ ساپاسىن ساقتاۋعا باعىتتالعان ءتيىمدى شارالار جۇرگىزگەندەرى ءۇشىن ەكونوميكالىق ىنتالاندىرۋ قۇرالدارىن قاراستىراتىن زاڭنامالىق قۇجات دايىنداۋدى ۇسىندى. مۇنداي جاعداي جاسالماسا ەلباسى تالاپ ەتكەندەي جوعارى ءونىمدى تەحنولوگيالار مەن ينۆەستيتسيا تارتۋعا جەردى پايدالانۋشىلار ىقىلاسسىز ەكەندىگى ايتىلدى.

سونىمەن قاتار، تۇرسىنبەك قازەنۇلى، ءوزىنىڭ پرەمەر-ءمينستردىڭ ك.ءماسىموۆتىڭ اتىنا جولداعان وسىناۋ ساۋالىندا ەلباسىنىڭ جۋىردا بولعان ۇكىمەتتىڭ كەڭەيتىلگەن وتىرىسىندا ايماقتاردىڭ بەلگىلى ءبىر ونىمدەردى وسىرۋگە ماماندانۋ كارتاسىن جاساۋ تۋرالى تاپسىرما بەرگەنىن ايتا كەلىپ، وسى باعىتتا قانداي شارالار جاسالاتىنىن بىلگىسى كەلەتىنىن جەتكىزدى.

بۇگىنگى تاڭدا سۋعا دەگەن سۇرانىس ارتىپ كەلەدى. الايدا ونىڭ قورى شەكتەۋسىز ەمەس. ەگەر سۋدى وسى قارقىنمەن ۇنەمسىز پايدالانا بەرسەك، 2030 جىلى سۋ جەتىسپەۋشىلىگى 14 ملرد.، ال 2050 جىلى 20 ملرد.  كۋب مەترگە جەتەدى ەكەن. سوڭعىسى سۋ رەسۋرستارىنا دەگەن جالپى سۇرانىستىڭ 70 پايىزىنا جەتەدى. سۋدى ۇنەمسىز جۇمساۋ، اسىرەسە، جەردى سۋلاندىراتىن جەرلەردە ۇلكەن پروبلەماعا اينالىپ وتىر. سوندىقتان بۇل جەرلەردەگى اۋىل شارۋاشىلىعى وندىرىسىنە دە سۋ ۇنەمدەۋ تەحنولوگيالارىن الۋ جانە يننوۆاتسيالىق ادىستەر قولدانۋعا دا ەكونوميكالىق ىنتالاندىرۋ شارالارىن جاساۋ كەرەك. جوعارىدا اتالعان قۇجاتتا وسى ماسەلە دە ەسكەرىلۋى كەرەك، دەدى دەپۋتات ءوزىنىڭ ۇسىنىسىندا.

ەندىگى ءسوز وكىمەتتە.     

جاقسىلىق قۋاندىق

اباي-اقپارات