ۋكراينا پرەزيدەنتىنىڭ مىندەتىن اتقارۋشى الەكساندر تۋرچينوۆ رەسەيدەن ۋكراينانىڭ ىشكى ىسىنە ارالاسۋدى جانە "بوپسالاۋدى" توقتاتۋدى تالاپ ەتتى دەپ حابارلايدى «ازاتتىق راديوسى». تۋرچينوۆ ۋكراينا تەرروريستىك قاۋىپتەن تايساقتامايتىنىن ايتىپ، تەلە ارنا ارقىلى رەسەيدەن شەكارا ماڭىنداعى اسكەرىن الىپ كەتۋدى تالاپ ەتكەن. بۇعان 24 ءساۋىر كۇنى رەسەي اسكەرىنىڭ ۋكراينا شەكاراسىنا شوعىرلانىپ، ناتو-نىڭ پولشا مەن بالتىق بويى ەلدەرىندەگى جاتتىعۋلارىنا جاۋاپ رەتىندە «اسكەري جاتتىعۋ باستاعانى» سەبەپ بولدى. ەستەرىڭىزدە بولسا كيەۆ سلاۆيانسكدەگى سەپاراتيستەردى جونگە سالۋ ءۇشىن اسكەر جونەلتكەن. ال رەسەي پرەزيدەنتى پۋتين كيەۆتىڭ شىعىس ۋكرايناعا اسكەر شوعىرلاندىرۋىنىڭ زارداپتارى اۋىر بولادى دەپ مالىمدەمە جاساعان بولاتىن.

اباي-اقپارات