ومىردە نەشە ءتۇرلى ىڭعايسىز جايتتارعا ۇشىراسىپ جاتاتىنىمىز انىق. سونىڭ ءبىرى – قولىمىزداعى ۇيالى تەلەفونعا كەلەتىن مازمۇنى اقىلعا سىيمايتىن قوڭىراۋلار مەن حابارلامالار بوپ تۇرعانى جاسىرىن ەمەس.

العاشقى كەزدەرى بىزگە بالەنباي بىرلىك جىبەرسەڭىز، تۇگەنبەي سىيلىقتار بەرەمىز دەگەن بايلانىس وپەراتورلارىنىڭ جارناما حابارلارىن كوزىمىز تالاي شالعان.

كوپشىلىك سول وڭاي ولجا اكەلەدى دەگەن ۇتىستارعا سان مارتە قاتىسىپ، اجەپتەۋىر قارجىلارىنان قاعىلىپ جاتتى. كەيىن بۇنداي باسسىزدىقتى توقتاتۋ كەرەك دەپ ەلىمىزدىڭ پارلامەنتى ءماجىلىسىنىڭ دەپۋتاتى راۋان شاەكين ماسەلە كوتەرىپ ەدى. وسىدان كەيىن ۇيالى بايلانىس وپەراتورلارى تاراپىنان الگىندەي ولقىلىقتارعا جول بەرىلمەيتىن بولدى.

بىراق  دەگەنمەن، بۇل كۇندەرى ماعىناسى الداۋ-ارباۋعا قۇرىلعان قوڭىراۋلاردى باسىنان وتكەرگەندەر از ەمەس. سولاردىڭ ىشىندە وسى جولداردىڭ اۆتورى دا بار.

بىردە ءتۇس مەزەتىندە مەنىڭ ۇيالى تەلەفونىما حابارلاما كەلدى. وندا ورىس تىلىندە: ء«سىزدىڭ ۇيالى تەلەفونىنىزدىڭ نومەرى ءبىز ۇيىمداستىرعان ۇتىستا فينالعا شىقتى. ءسىز «مەركۋر اۆتو» فيرماسى ۇسىنعان 4 «نيۆا» اۆتوكولىگىنىڭ يەسى اتانعالى تۇرسىز»-دەگەن مازمۇنداعى ءماتىن جازىلعان. بىراق مەن ونىڭ كەزەكتى بىرەۋلەردىڭ الاياقتىق ارەكەتى ەكەنىن بىردەن ءتۇسىنىپ، ولارمەن حابارلاسپادىم.ءبىر كەزدە مەن جاۋاپ بەرمەگەن سوڭ وزدەرى ۇيالى تەلەفونىما قوڭىراۋ سوقتى. تۇتقانى كوتەرسەم، ار جاعىندا جاسى 30-40 شاماسىنداعى   ەر ادام الدىنداعى جىبەرىلگەن حابارلامادا جازىلعان ۇتىسقا قاتىسۋىم ءۇشىن ونىڭ ۇيالى تەلەفونىنا 1000 بىرلىك سالۋىم قاجەت ەكەندىگىن ەسكەرتتى. ايتۋىنا قاراعاندا، سولاي ەتسەم عانا كولىكتى تىزگىندەيدى ەكەنمىن.

البەتتە، مۇندايمەن ەلىمىزدە ماشينا تاسىمالداۋشى «مەركۋر اۆتو» فيرماسىنىڭ اتىن جامىلىپ وتىرعان الاياقتاردىڭ اينالىساتىنى ايتپاسا دا تۇسىنىكتى. بىلۋىمىزشە، الگىندەي جاعىمسىز ءىس-ارەكەتتەردى كوبىنەسە قىلمىستىق جازاسىن وتەۋ ورىندارىندا وتىرعاندار كاسىپ ەتىپ العان كورىنەدى.

وسى جەردە كەيىنگى جىلدار مۇعدارىندا ىشكى ىستەر مينيسترلىگى ۇيعارىمىمەن ەلىمىزدەگى قىلمىستىق جازاسىن وتەۋ مەكەمەلەرى اۋماعىنا ۇيالى تەلەفونمەن بايلانىستى شەكتەيتىن ارنايى قۇرىلعىلاردىڭ  قويىلىپ جاتقانى وسىنداي كەلەڭسىزدىكتەردىڭ الدىن الۋعا ارنالعان قۇپتارلىق شارا ەكەنى اقيقات.

ءيا، جۇرتشىلىقتى الداپ-اربايتىنداردىڭ جىمىسقى ارەكەتىنە وسىلايشا توسقاۋىل قويساق عانا الگىندەي الدامشى قوڭىراۋلار مەن حابارلامالاردان قۇتىلارىمىز حاق.

                                                                 دارحان ۋاليەۆ.

                                                            قر جۋرناليستەر وداعىنىڭ مۇشەسى.

                                                            قاراعاندى قالاسى.

Abai.kz