مۇحتار ەرمان قر پارلامەنتى ماجىلىسىندەگى "نۇر وتان" فراكتسياسىنىڭ اپپاراتى باسشىسى قىزمەتىنە تاعايىندالدى، دەپ حابارلايدى Tengrinews.kz  اتالمىش پارتيانىڭ رەسمي سايتىنا سىلتەمە جاساپ. وسى تاعايىنداۋعا دەيىن مۇحتار ەرمان  "ەۋرازيا+ورت" جشس باس ديرەكتورىنىڭ ءبىرىنشى ورىنباسارى قىزمەتىن اتقارعان.

م.ەرمان بۇعان دەيىن "نۇر وتان" پارتياسىنىڭ ورتالىق اپپاراتىندا بەس جىلعا جۋىق جۇمىس جاسادى: پارتيانىڭ ورتالىق اپپاراتى باسشىسىنىڭ ورىنباسارى، پارتيا توراعاسىنىڭ ءبىرىنشى ورىنباسارىنىڭ حاتشىسى جانە كەڭەسشىسى بولدى. ول ءوز ەڭبەك جولىن 1986 جىلى باستاعان. ءار جىلدارى "الماتىجارناما" مەملەكەتتىك كاسىپورىنىندا ديرەكتور، "اسار" رەسپۋبليكالىق پارتياسى" رقب ورتالىق اپپاراتى حاتشىسىنىڭ ورىنباسارى، حاتشىسى قىزمەتتەرىن اتقاردى. مۇحتار ەرمان ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى.

ال، بۇعان دەيىن قر پارلامەنتى ماجىلىسىندەگى "نۇر وتان" فراكتسياسىنىڭ اپپاراتى باسشىسى قىزمەتىن اتقارىپ كەلگەن اقىلبەك يحدانوۆ باسقا جۇمىسقا اۋىسۋىنا بايلانىستى ءوز قىزمەتىنەن بوساتىلدى.

اباي-اقپارات