ەرتەڭ ەۋرازيالىق ەكونوميكالىق وداقتى قۇرۋ تۋرالى شارتقا قول قويىلادى. جىلدىڭ ماڭىزدى قۇجاتىنا قول قويىلار كۇن الدىندا  ەلباسى نۇرسۇلتان نازارباەۆ قۇجاتتى ازىرلەۋگە اتسالىسقان ۇكىمەت مۇشەلەرى مەن جاۋاپتى ورگانداردىڭ باسشىلارىن قابىلداپ، اتقارىلعان ىستەردى پىسىقتادى. بۇل تۋرالى Baq.kz حابارلادى.  

 شارت 4 ءبولىم، 28 تاراۋ، 118 ماقالا جانە 32 قوسىمشادان تۇرادى. ونىڭ ءاربىر تاراۋى مەن بەتى مۇقيات زەردەلەنگەن. شارتتا ءۇش تاراپتىڭ دا مۇددەسى تولىق قاراستىرىلعان. وتاندىق كاسىپكەرلەردىڭ مۇددەسى قورعالىپ، كاسىبىنەن ءناسىپ تابۋعا بارلىق جاعداي جاسالعان. ەلباسى تاريحى تامىرلاس كورشى ەلدەرمەن الىس-بەرىس ارتاتىندىعىن قاداپ ايتتى.

نۇرسۇلتان نازارباەۆ، قازاقستان رەسپۋبليكاسى پرەزيدەنتى: 

- كوپ نارسە ىستەلىندى، كوپ نارسەدەن وتتىك. ەلدىڭ اراسىندا ءتۇسىندىرۋ جۇمىستارى جاقسى ءجۇرىپ جاتىر دەپ ويلايمىن. ونى ءارى قاراي جالعاستىرۋ كەرەك. بارلىعى كەلىسىلگەن، ساراپتان ءوتىپ جاتىر. قۇجاتتىڭ ءاربىر سويلەمى، ابزاتسى ساراپتامادان ءوتۋى كەرەك. ول وڭاي جۇمىس ەمەس. ەلىمىزگە مۇنىڭ پايداسى بار. بۇل وداق ءبىر كۇن ەمەس، ءبىر جىل ەمەس، ۇزاق مەرزىمدە جاسالىپ جاتىر. ءبىز ءۇشىن ساياسي، ەكونوميكا جاعىنان ءتيىمدى بولعان سوڭ بارىپ وتىرمىز.  بۇل ەل، حالىق ءۇشىن ۇلكەن ماسەلە، سوندىقتان تۇسىندىرە ءبىلۋىمىز كەرەك. بۇل اشەيىن بارىپ بىرەۋمەن كەلىسسوزگە وتىرۋ ەمەس. بىزدە تەڭىزگە شىعاتىن جول بولماعاندىقتان، مىناداي كەلىسسوز بولماسا، جاعداي قيىن بولادى. ءبىز تەڭىزگە رەسەي ارقىلى قانشا مىڭداعان شاقىرىم ءجۇرۋىمىز كەرەك. ەگەر تەمىرجول، كولىك تاريفتەرى تومەندەيتىن بولسا، ءبىزدىڭ تاۋارلارىمىزدىڭ باسەكەلىك قابىلەتى جوعارى بولادى. ەكىنشى ماسەلە، كورشىلەرمەن ەكونوميكالىق بايلانىس وسىلاي تىعىز بولسا، كورشىلەردىڭ، ءبىزدىڭ دە ءىشى-سىرتىمىز تىنىش بولادى. ۇشىنشىدەن، تاۋارلارىمىزدىڭ نارىعىن، بيزنەستى شىڭداۋىمىز كەرەك.  

«مىڭعا تارتا بەتتەن تۇراتىن قۇجاتتا قازاقستاننىڭ بارلىق مۇددەلەرى ەسكەرىلگەن. ەڭ باستىسى قازاقستاننىڭ ەگەمەندىگى، شەكارا تۇتاستىعى مەن تۇراقتى دامۋىنا نۇقسان كەلمەيدى»، – دەيدى ۇكىمەت مۇشەلەرى. سەبەبى بۇل – ساياسي ەمەس، ەكونوميكالىق بىرلەستىك.

  مينيسترلەر كابينەتىنىڭ وكىلدەرى قۇجات بارلىق ۇلتتىق مۇددەلەرگە ساي ازىرلەنگەنىن ايتتى. 

كارىم ءماسىموۆ، قر پرەمەر-ءمينيسترى: 

- بىرىنشىدەن، قازاقستان ساياسي تاۋەلسىز ەل بولىپ قالا بەرمەك. بۇل – ءسىز قويعان باستى ماقسات. ەسەسىنە، قازاقستاننىڭ دامۋىنا قوسىمشا ەكونوميكالىق مۇمكىندىك بەرىلىپ وتىر. كەلىسىمشارتتا كوپسالالى ساياسات مۇمكىندىگى دە ەسكەرىلگەن. بۇل وداقتان باسقا، ءبىز دسۇ-عا كىرۋ جونىندەگى كەلىسسوزدەردى جالعاستىرۋدامىز. 

باقىتجان ساعىنتاەۆ، قر پرەمەر-ءمينيسترىنىڭ ءبىرىنشى ورىنباسارى:

- بۇگىندە مەملەكەتىشىلىك راسىمدەردى جۇرگىزۋ ءبىتتى. ۇكىمەتتىڭ ءتيىستى قاۋلىسى قابىلداندى. قازىر شارتىڭ جوباسى پرەزيدەنت اكىمشىلىگىنە قوس تىلدە ەنگىزىلدى. ءسىزدىڭ ۇستانىمىڭدارىڭىزدى باسشىلىققا الا وتىرىپ، جۇمىس بارىسىندا شارت جوباسى بويىنشا ەكونوميكالىق ىنتىماقتاستىق شەگىنەن شىعاتىن ازاماتتىققا، قۇقىقتىق كومەك، شەكارانى قورعاۋ، ورتاق پارلامەنت، ۆيزالىق ساياسات، ەكسپورتتى باقىلاۋ، كوشى-قون، قورعانىس، قاۋىپسىزدىك، دەنساۋلىق ساقتاۋ، ءبىلىم بەرۋ، عىلىم جانە مادەنيەتكە بايلانىستى ەرەجەلەر الىنىپ تاستالىندى.

اباي-اقپارات