كيەۆ گاز ماسەلەسى جونىندە ماسكەۋگە قارىز بولعان 2,5 ملرد. دوللاردى تولەۋگە كەلىستى. كەلىسىمگە ەۋرو وداقتىڭ مۇرىندىق بولۋىمەن بەرليندە وتكەن تاراپتاردىڭ كەزدەسۋىندە قول جەتكەن. ەگەر قارىز ءبىر اپتا ىشىندە وتەلەتىن بولسا رەسەي تاراپى ەكى ەل باسشىلارىنىڭ بىتىمىمەن گاز باعاسىن تومەندەتۋ جاعىن قاراپ كورمەك.

ۋكرايناداعى سايلاۋدا جەڭىسكە جەتكەن پرەزيدەنت  پەتر پوروشەنكوعا قالعان وزەكتى ماسەلەلەردىڭ ءبىرى رەسەيدەن گاز تاسىمالداۋ ءىسى. رەسەي بيلىگى گاز جونىندە ۋكرايناعا ەۋرو وداقتىڭ جاۋاپكەرشىلىك ارقالاپ،  كەپىل بولعانىن قالايدى. اتالعان ماسەلە كەشە، دۇيسەنبىدە ەكى ەلدىڭ ەنەرگەتيكا مينيسترلەرىنىڭ، جانە ەۋرو وداق كوميسسياسىنىڭ بەرليندە وتكەن ءۇش جاقتى كەلىسىمىندە قارالعان. بۇل تۋرالى  BBC جازدى.  بۇل ورايدا ۋكراينانىڭ جاڭا پرەزيدەنتىنە ۇلكەن جاۋاپكەرشىلىكتەر ءتۇسىپ وتىر. ول گاز جەتكىزۋ مەن قاتار گاز تاسىمالى توڭىرەگىندە جەمقورلىق ماسەلەلەردى دە شەشۋى ءتيىس.

ەنەرگەتيكا جونىندەگى ەۆروكوميسسار  گيۋنتەر ەتتينگەر كيەتۆتىڭ ماسكەۋگە 2,5 ملرد. دوللار قارىزىن تولەۋگە كەلىسكەنىن مالىمدەدى.  كەلىسىمگە ساي سارسەنبىگە دەيىن ەكى ەلدىڭ ەنەرگەتيكا مينيسترلەرى ءوز ەلدەرىندەگى ۇلتتىق گاز كومپانيالارىن قايتا اقپاراتتاندىرىپ، گاز جونەلتۋ-قابىلداۋ ءىسىن جەدەل قولعا الۋلارى كەرەك.

ەستەرىڭىزگە سالا كەتەتىن بولساق، ءساۋىر ايىنىڭ بىرىندە كيەۆتىڭ ماسكەۋگە قارىزى 2,2 ملرد. دوللار بولسا، مامىر ايىنىڭ ورتاسىنا قاراي 2,5 ميللياردقا تايادى. ماسكەۋدىڭ اقپان ايىندا كيەۆ تارابىمەن كەلىسپەي باعانى ءوسىرۋى كيەۆتى قارىز ەتكەن ەدى. وتكەن جىلدىڭ جەلتوقسانىندا، ۋكراينا پرەزيدەنتى يانۋكوۆيچ ەۋرو وداق اسسوتسياتسياسىمەن كەلىسىمگە قول قويۋدان باس تارتقاننان كەيىن  رەسەي گازدىڭ 1000 تەكشە مەترگە شاققانداعى باعاسىن 400-دەن 268,5 دوللارعا تۇسىرگەن بولاتىن.  ال اقپان ايىندا «گازپروم» 1000 تەكشە مەتر گاز باعاسىن 485 دوللارعا دەيىن قىمباتتاتىپ جىبەرگەن ەدى.

اباي-اقپارات