مىنا تولعاۋى توقسان تىرشىلىكتە جاقسىلىق پەن جاماندىق، قۋانىش پەن قايعى قاتار جۇرەتىندىگى بەلگىلى. جىلت ەتكەن جاقسى جاڭالىققا بالاشا قۋانىپ، كەمشىلىك كورسەك كوڭىلىمىزگە كىربىڭ ۇيالايتىندىعى دا وتىرىك ەمەس.

جاقىندا وسىنداي ءبىر وركەنى وسكەن جاقسى جاڭالىقتىڭ كۋاسى بولدىق. سونى Abai.kz اقپاراتتىق پورتالىنىڭ وقىرماندارىنا ۇسىنعانشا اسىعىپ وتىرعان جايىمىز بار. قالامىزدا «انالارعا ارنالعان باسپانا» دەپ اتالاتىن ايرىقشا ءبىر ءۇي بوي كوتەردى. مۇنداعى ماقسات العاش قۇرساق كوتەرگەن، الايدا ومىردە قيىندىق كورىپ، بارار جەر، باسار تاۋى قالماعان، ەشكىمنەن كومەك الا الماي، سورلاپ قالعان جانداردى قامقورلىققا الىپ، پانالاتۋ. ياعني بۇل جەر ەندى ءبىر جارىم جىل بويى جاڭاعى قورعانسىزدارعا اكەگە دە، شەشەگە دە اينالماق. وسى ۋاقىت ىشىندە بالاسىنا دەپ ۇكىمەت بولگەن جاردەماقى ساقتالىپ تۇرادى دا، كەيىنگى تىرشىلىگىنە ازداپ بولسا دا سەپ بولماق.

    قىزىل كىرپىشتەن سالىنعان بۇل كوتتەدجدىڭ سىرتى عانا ەمەس، ءىشى دە ادەمى. اۋلاسى دا بالالار ويناۋعا لايىقتى ەتىلىپ، تاماشا جابدىقتالعان. ال وسى ءۇيدىڭ تومەنگى قاباتى بۇلدىرشىندەردىڭ اسىر سالىپ، ويناۋىنا ارنالعان. جۇمساق ويىنشىقتار، اتكەنشەكتەر سەكىلدى كوزدىڭ جاۋىن الاتىن دۇنيەلەرگە تولى. شىعار ەسىكتىڭ الدىنا ءار بالاعا جەكە-جەكە اربالار /كولياسكالار/ قويىلعان. نارەستەڭدى وتىرعىز دا، اۋلادا قىدىرا بەر.

   قازىرگى تاڭدا مۇندا توعىز انا مەن 10 بالا تىرشىلىك ەتىپ جاتىر. ولارعا ەكى الەۋمەتتىك پەداگوگ اقىلىن ايتىپ، كەڭەس بەرىپ وتىرادى. انا دا، بالا دا تاماقتان تارشىلىق كورمەيدى. داستارحاندا ەت، بالىق، كوكونىس پەن جەمىس-جيدەك جەتىپ ارتىلادى. شاقالار ءۇشىن ءارتۇرلى ۆيتامينگە باي تاعامدار دا جەتكىلىكتى.

     تاماقتى انالاردىڭ وزدەرى دايىندايدى. ول ءۇشىن كۇن سايىن ءبىر-بىردەن كەزەكشىلىك اتقارادى.

مۇنداعىلاردىڭ تاعدىرى دا سان قيلى. ءبىرى اكە-شەشەسىز جەتىم وسكەن. سپورتپەن اينالىسىپ، ءتاپ-ءتاۋىر جەتىستىكتەرگە جەتىپ جۇرگەن. اياعى اۋىر بولىپ قالعاندىعىن كەش بايقاعان. بوسانعاسىن كورمەگەن قورلىعى جوق. پاتەردەن پاتەرگە كوشىپ، ازاپتى از تاتپاعان. ەندى، مىنە، وسىندا كەلىپ، ومىرگە قايتا ورالعانداي، قۋانىشىندا شەك جوق.

   ەكىنشىسىنىڭ كۇيەۋى بولعانىمەن،تۇرمىسى ادام قىزىعارلىقتاي ەمەس ەدى. اياعى اۋىر بولىپ قالعاندا، جولداسى الدىرىپ تاستاۋعا كەڭەس بەرەدى. الايدا جاس كەلىنشەك بولاشاق نارەستەنىڭ ءومىرىن ۇزۋگە باتىلى بارمايدى. كۇيەۋى ايتقانىنان قايتپاي، قاسارىسىپ قالادى. دۇنيەگە نارەستە كەلگەسىن ەشكىم قامقورلىق قولىن سوزباعان. ايتەۋىر ابىروي بولعاندا، وسى ۇيگە كەلىپ، جان ساقتاپ ءجۇر. ءبىر قىزىعى، جاڭاعى جىگىتىمىزدىڭ اكەسى بۇل جاعدايدى ەسىتىپ، وسىندا كەلىپ، نارەستەنىڭ وزىنەن اۋماي قالعاندىعىن كورىپ، كوڭىلى بوسادى دەسەدى. بالانى اناسىمەن الىپ كەتۋگە ۋادە ەتىپتى. ال ول نارەستە ۇقساماسا شە؟ ءيا، ومىردە نەشە ءتۇرلى عاجايىپتار بولا بەرەدى ەكەن عوي.

     ءيا، توعىز انانىڭ كىم-كىمنىڭ دە جۇرەگىن ەلجىرەتەتىن تاريحى بار. قاي-قايسىسىنىڭ دا تىرلىكتەن تاتقان اششى ءدامى جاقىن ۋاقىتتا ۇمىتىلا قويماس.

   مۇندا پانالاعانداردىڭ وسىنداي باستامانى قولعا الىپ، تاعدىرلارى تالاپايعا تۇسكەن جاس ارۋلارعا قارلىعاشتىڭ قاناتىمەن سۋ سەپتكەندەي قولعابىس تيگىزگەن ايدىن راحىمباەۆ دەگەن ازاماتقا ايتار العىسى شەكسىز. بۇل ازامات استانادا تۇراتىن كاسىپكەر ەكەن. ودان باسقا قولىمىزدا مالىمەتىمىز جوق. مۇمكىن، وسى سايتتىڭ وقىرماندارى بىردەڭە بىلەر. ولاي بولسا، «جاقسىنىڭ جاقسىلىعىن ايت نۇرى تاسىسىن» دەگەندەي بۇل ازامات جايلى كەڭىرەك اڭگىمە قوزعاساق، از دا بولسا جاقسىلىعىنىڭ قايتارىمى بولار ەدى، بالكىم. ايتپەسە، بىزدە «فوربس» جۋرنالىنان تۇسپەيتىن قالتالىلار، سول جۋرنالعا ەنۋگە دەگەن ارمانى تاۋسىلمايتىن قالتالىلار وسىنداي يگىلىكتى ىسكە مۇرىندىق بولسا، كىم قولىن قاعىپتى؟ جەتىم-جەسىرلەرگە كومەك كورسەتۋ، قىسىلعانعا قول ءۇشىن بەرۋدى قۇداي دا قوستاماي ما؟ ول دۇنيەگە ەشكىم ەشتەڭە الىپ كەتپەيدى عوي. ءاي، قايدام ولاردا مۇنداي زاردى ەستەتىن قۇلاق، تۇسىنەتىن سانا تابىلا قويار ما ەكەن؟

    شىركىن، دەپ ارماندايسىڭ، ەگەر ءار وبلىستا وسىنداي ادال دا ارلى ازامات تابىلىپ، سول جەردە ءبىر-بىردەن وسىنداي باسپانا سالسا، قانشا جاننىڭ ساۋابىن الار ەدى؟ انشەيىندە ايتا بەرەتىن پاتريوتتىق دەگەن اسىل قاسيەتتىڭ وسى ايقىن كورىنىسى بولار ەدى.

مۇراتبەك داۋرەنۇلى.
قوستاناي.

Abai.kz