كۇي – ومىرشەڭ ونەردىڭ ءبىرى ءھام بىرەگەيى. بابالارىمىزدىڭ ۇرپاقتان-ۇرپاققا قاستەرلەپ جەتكىزگەن ءتول مۇراسىن كەڭىنەن ناسيحاتتاۋ، بۇگىنگى بۋىننىڭ ساناسىنا ءسىڭىرۋ باعىتىندا «اق جاۋىن» مەملەكەتتىك كامەرالىق وركەسترىنىڭ اتقارىپ وتىرعان ەڭبەگى – زور.

مەملەكەت باسشىسى نۇرسۇلتان نازارباەۆتىڭ بيىلعى جىلى قاسيەتتى ولكە – ۇلىتاۋ توپىراعىندا بەرگەن سۇحباتىندا دا،  قازاقستان حالقىنا ارناعان «نۇرلى جول – بولاشاققا باستار جول» جولداۋىندا دا ۋاقىتتان ەش ۇتىلۋعا بولمايتىنىن، ەڭ باستىسى، وسىناۋ جاھاندانۋ زامانىندا ءار ۇلت ءوز بوياۋىن ساقتاپ قالۋعا تىرىسۋ كەرەكتىگىن اڭعارتقان بولاتىن. ال حالىقتىڭ ۇلتتىق بوياۋىن، قادىر-قاسيەتىن ساقتاۋدىڭ بىردەن-ءبىر جولى، ول – ءار قازاق ءوز انا تىلىندە سۋسىنداپ، تامىرى تەرەڭگە تارتقان مادەنيەتىنەن ءنار الۋى ءتيىس. مىنە، وسى تۇرعىدان كەلگەندە اتالمىش وركەستر ۇجىمى تاريحى تەرەڭدە جاتقان كۇي ونەرىن ناسيحاتتاۋمەن كەلەدى.

«قازاقستاندا قالىپتاسقان بەيبىتشىلىك پەن بىرلىكتى ءار قازاق كوزىنىڭ قاراشىعىنداي ساقتاۋعا ات سالىسۋى قاجەت. بۇل جولدا بارلىق قازاقستاندىقتاردى بىرىكتىرەتىن قاينار كوز، ول – قازاقتىڭ مادەنيەتى، ءتول ونەرى دەسەك، ارتىق بولماس. سونداي بىرلىككە باستايتىن، ەل رۋحىن كوتەرەتىن شارالارعا «اق جاۋىن» مەملەكەتتىك كامەرالىق وركەسترى ۇنەمى ات سالىسىپ كەلەدى. اتالمىش ۇجىمدا قازاقستاننىڭ ەڭبەك سىڭىرگەن ارتىستەرى مەن مادەنيەت سالاسىنا ەڭبەك سىڭىرگەن قايراتكەرلەرى رامازان ستامعازيەۆ، اباي ابىشەۆ، دالەل ۋاشەۆ، كلارا تولەنباەۆا، گۋلميرا سارينا، ەرلان رىسقالي، ايگۇل ۇلكەنباەۆا سىندا ونەر مايتالماندارى ونەر كورسەتەدى. سونداي-اق، «ناز» بي تەاترىنىڭ دا حالىقتى تامساندىرعان ونەرىن ەرەكشە اتاپ وتكەن ءجون»، - دەيدى «اق جاۋىن» وسكەسترىنىڭ ديرەكتورى ەرلان داكەنوۆ. 

بىلتىر اتالمىش ۇجىم ەلىمىزدىڭ باتىس وڭىرىندە بولىپ ءبىرشاما قالالار مەن اۋدانداردا شىعارماشىلىق كەشتەرىن وتكىزىپ، كۇي ونەرىنەن تاماشا تارتۋ جاساپ قايتقان بولاتىن. «بيىل دا داستۇرگە ساي، مەملەكەتتىك كامەرالىق وركەستر الداعى جىلى رەسپۋبليكامىزدىڭ تۇپكىر-تۇپكىرىنە گاسترولدىك ساپارمەن بارىپ، شىعارماشىلىق كەشتەر وتكىزۋدى جوسپارلاپ وتىر»، - دەيدى ە.داكەنوۆ.

بوتاگوز باعداۋلەت.

استانا.

اباي.kz