استانادا قر جوعارعى سوتى مەن «ۇلتتىق اقپاراتتىق تەحنولوگيالار» اق وكىلدەرى «ەلەكتروندى ۇكىمەت» (egov.kz) پەن جوعارعى سوتتىڭ «سوت كابينەتى» ەلەكتروندى سەرۆيسىنىڭ (office.sud.kz) ينتەگراتسيالانۋى ماسەلەلەرىن تالقىلادى.

اقپاراتتىق جۇيەلەر اراسىنداعى بىرىڭعاي اۆتوريزاتسيانى بىلدىرەتىن Single Sign-On (SSO) مەحانيزمىنىڭ ىسكە قوسىلۋى ەكىجاقتى ىنتىماقتاستىقتىڭ باستى جەتىستىگى بولىپ تابىلادى. تۇتىنۋشى قوسىمشا اۆتوريزاتسياسىز-اق تالاپ ارىز بەرۋ، سوت حاتتاماسىن ەلەكتروندى نۇسقادا الۋدى سۇراتۋ تۋرالى ءوتىنىش بەرۋ نەمەسە حاتتاماعا ءوتىنىش بەرۋ تۋرالى سۇرانىستى قامتيتىن جوعارعى سوتتىڭ ءۇش قىزمەتىنىڭ ءبىرىن پايدالانا الادى. ەندى بۇل قىزمەتتەردى الۋعا «ەلەكتروندى ۇكىمەتى» پورتالىندا اۆتوريزاتسيادان ءوتۋدىڭ ءوزى جەتكىلىكتى.

«اقپاراتتىق تەحنولوگيالاردى سوتتاردا قولدانۋدى دامىتۋ ماقساتىندا «سوت كابينەتى» اقپاراتتىق سەرۆيسى ەنگىزىلدى. وسىلايشا، جوعارعى سوت ەل تۇرعىندارى ءۇشىن سوت جۇيەسىنىڭ بارىنشا اشىق ءارى قولجەتىمدى بولۋىن كوزدەي وتىرىپ، زاماناۋي تەحنولوگيالاردى سوت جۇيەسىندە قولدانۋ بويىنشا جۇمىستاردى جالعاستىرۋدا»، - دەدى قر جوعارعى سوتىنىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى ءى.س. يسپانوۆ.  

جىل قورىتىندىسى بويىنشا اتالعان سەرۆيس ارقىلى 105 مىڭنان استام ەلەكتروندى وتىنىشتەر بەرىلسە، سونىڭ 85 مىڭنان استامىن تالاپ ارىزدار قۇرايدى. سونىمەن قاتار، ەلەكتروندى وتىنىشتەر بەرۋ جۇيەسى 2011 جىلدان باستاپ ىسكە اسىرىلا باستاعانىمەن، ونىڭ فۋنكتسيونالدىق مۇمكىندىگى شەكتەۋلى بولاتىن.

«SSO تەحنولوگياسى ەلەكتروندى قىزمەتتەردى نەعۇرلىم ىڭعايلى پايدالانۋدى قامتاماسىز ەتىپ، تۇتىنۋشىلاردى ءوز ەسەپتىك جازباسىنىڭ دەرەكتەرىن بىرنەشە رەت ەنگىزۋ قاجەتتىلىگىنەن بوساتادى»، - دەدى «ۇات» اق باسقارما توراعاسى ر.س. ەڭسەباەۆ. ونىڭ ايتۋىنشا، ينتەگراتسيا كومەگىمەن بۇگىندە 500 مىڭنان استام تۇتىنۋشىنى بىرىكتىرەتىن ازاماتتاردىڭ موبيلدىك بازاسىمەن بىرلەسكەن سوت ءوندىرىسىنىڭ جۇيەسى نەگىزىندە تۇتىنۋشىلارعا ءتۇرلى حابارلاندىرۋلار، اقپاراتتار مەن شاقىرتۋ حاتتارىن جىبەرۋدىڭ مۇمكىندىگى ارتا تۇسكەن. 

بۇل مەحانيزم سوت جۇيەسىنە قولجەتىمدىلىكتى ارتتىرۋدىڭ كەزەكتى قادامى بولىپ تابىلادى جانە وسى باعىتتاعى تۇراقتى قولجەتىمدىلىكتى قامتاماسىز ەتەدى. «سوت كابينەتى» ەلەكتروندى سەرۆيسى ىستەمەي قالعان جاعدايدا، تالاپ ارىزدار مەن وتىنىشتەردى «ەلەكتروندى ۇكىمەت» ۆەب-پورتالى ارقىلى بەرۋگە بولادى. وسى رەتتە، ەلەكتروندى ءوتىنىش بەرۋ قىزمەتى «ەلەكتروندى ۇكىمەت» ۆەب-پورتالى مەن «سوت كابينەتى» سەرۆيسىندە قاتار قىزمەت كورسەتەتىنىن اتاپ وتكەن ءجون.

اباي-اقپارات.