القيسسا، الداعى جاڭا جىلىمىزدا جاقسى دا جاقسى دۇنيەلەر جوسپارلانىپ-اق جاتقان شىعار، الايدا ادامداردى، ادامدار بولعاندا دا ونىڭ ىشىندە كاسىپكەرلەردى كادىمگىدەي الاساپىرانعا تۇسىرەتىن «اتاقتى قاڭتار» ايى دا بۇيىرسا بىرنەشە كۇننەن كەيىن بوساعامىزدان اتتايدى.

باسقاسىن ايتپاي-اق قويعاننىڭ وزىندە ءدال وسى قاڭتار ايىندا شاعىن جانە ورتا بيزنەستى تەكسەرۋگە جاريالانعان ءموراتوريدىڭ مەرزىمى بىتەدى. ەلباسىمىز جاريالاعان موراتوري. ءبىراز ۋاقىتتان بەرى «ەشكىمدى تەكسەرە الماي، اجەپتاۋىر اشىعىپ» قالعان كوپتەگەن دە كوپتەگەن قۇزىرلى ورگاندار كاسىپكەرلەردى «تەكسەرۋ تىرلىگىنە اش قاسقىرداي» ۇمتىلادى. بۇل ەندى ايداي اقيقات. راس، بۇگىنگى كۇنى كەز-كەلگەن كاسىپ يەسىن تەكسەرۋ كەپ جىبەرۋ ءۇشىن ءتيىستى ورىنداردىڭ «پەچاتتالىپ، قولى قويىلعان» رۇقسات قاعازى قاجەت، الايدا وسىناۋ رۇقسات قاعازى دەگەنىڭىزدى ۇرىپ قويىپ، ءاي-شايعا قاراماي تەكسەرە بەرەتىن «بەلدەن باسقىشتار» دا از ەمەس بۇگىنگى كۇنى – قىزمەت كۋالىگىن كوز الدىڭا كولبەڭدەتىپ. وسى تۇستا ويلاناتىن ءبىر ماسەلە بار – تولعاعى جەتكەن. ول – شاعىن جانە ورتا بيزنەس وكىلدەرىنىڭ كاسىبىن زاڭسىز تەكسەرگەن ءتيىستى ورىن قىزمەتكەرلەرىن زاڭ تۇرعىسىنان رەسمي تۇردە جاۋاپقا تارتۋ ماسەلەسى، ويتكەنى بۇل ماسەلە ءبىزدىڭ ەلىمىزدە ءالى كۇنگە دەيىن بەلگىلى ءبىر زاڭ شەڭبەرىندە ناقتىلانباعان. سوندىقتان دا بەلگىلى ءبىر كاسىپ يەسىن زاڭسىز تەكسەرگەن بەلگىلى ءبىر ورگان قىزمەتكەرى ەشقاشاندا اكىمشىلىك نەمەسە قىلمىستىق جاۋاپكەرشىلىككە تارتىلمايدى. ەگەمەن ەلىمىزدىڭ ءىس-تاجىريبەسىندە مۇنداي دەرەك ءالى ءبىر دە ءبىر رەت رەسمي تۇردە تىركەلگەن جوق. دەمەك، مۇنداي جاعداي، ياعني شاعىن جانە ورتا كاسىپ يەلەرىن زاڭسىز تەكسەرۋ بۇرىن بولعان بولسا... بولاشاقتا دا بولا بەرەدى دەگەن ءسوز.

بىرەۋ بىلەر، بىرەۋ بىلمەس - ءبىزدىڭ ەلىمىزدە «كاسىپكەرلەر مەن مەنشىك يەلەرىن قورعاۋ وداعى» دەگەن قوعامدىق ءبىر ۇيىم بار. جاقىندا وسى ۇيىم مۇشەلەرى شاعىن جانە ورتا بيزنەس يەلەرىن زاڭسىز تۇردە تەكسەرگەن كەز-كەلگەن قۇزىرلى ورگان وكىلدەرىن اكىمشىلىك جاۋاپكەرشىلىككە، ءتىپتى شەكتەن شىققان جاعدايدا ولاردى قىلمىستىق جاۋاپكەرشىلىككە دەيىن تارتۋ ماسەلەسىن زاڭدىق تۇرعىدا شەشۋ قاجەتتىگى جونىندە ءتيىستى ورىندارعا ۇسىنىس جاسادى. جاقسى ۇسىنىس، الايدا وسىناۋ ۇسىنىستان قورىتىندى شىقسا، قانەكەي! ال وسى كەزدە... استانادا ۇلتتىق كاسىپكەرلەر پالاتاسىنا قاراستى جاستار كاسىپكەرلىگىن دامىتۋ جونىندەگى كەڭەستىڭ العاشقى وتىرىسى بولىپ ءوتتى. وتىرىستا ءسوز سويلەگەن ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ مىرزا مەملەكەتتىك تىلدە ەمەس، رەسمي تىلدە بىلاي دەدى: «...مولودىە پرەدپرينيماتەلي پولۋچايۋت دوستۋپ ك دەنگام ي نە زنايۋت، چتو س نيمي دەلات، بەرۋت كرەديتى ۆ تري ميلليونا، زاكلادىۆايۋت روديتەلسكيە دوما. پري ەتوم ۆسە ناچينايۋت زانيماتسيا چاستنىم يزۆوزوم...»

ابىلاي مىرزانىڭ سوزىندە جان بار شىعار، بۇعان ءبىزدىڭ داۋىمىز جوق، ويتكەنى شاعىن جانە ورتا بيزنەس وكىلى بولامىن دەگەن ەلىمىز ازاماتتارىنا اتالمىش پالاتا تاراپىنان ميلليونداعان نەسيەلەر الۋعا ويداعىداي قولداۋ كورسەتىلىپ جاتقانعا ۇقسايدى. ال ەندى ءۇش ميلليوندى قالتاعا باسىپ الىپ، «تاكسوۆايت» ەتىپ جۇرگەن جاستاردى، جاسىرىپ كەرەگى نە، كوپشىلىگىمىز كورگەن جوقپىز. كەرىسىنشە، اۋىلدان كەلگەن «التىن باستارىمىز» بەن «قالادا جۇرگەن كاراكوزدەرىمىزدىڭ» بيزنەس-جوسپارلارىن قولتىقتارىنا قىسىپ الىپ، نەسيە الا الماي زار جىلاپ جۇرگەنىن «شىققىر كوزىمىز» كادىمگىدەي-اق كوردى.

ءيا، اعايىن، جاڭا جىلىمىز دا كەلىپ قالدى. جاڭا جىلىمىزبەن جىلاپ كورىسپەسەك بولعانى دا، ويتكەنى اتى مەن اتاعى دارداي ۇلتتىق كاسىپكەرلەر پالاتاسىنىڭ جۇمىسىنىڭ ناتيجەسى قاعاز جۇزىندە ەمەس، ءىس جۇزىندە جۇزەگە اساتىن بولسا، «بارەكەلدى!» دەمەيمىز بە؟!

مارات ماداليموۆ.

اباي.kz