«…جاستاردىڭ اراسىندا بۇگىندە رۋحاني الاقۇلالىق بار. رۋحاني سۋساپ جۇرگەن، تاباندى تۇردە ىزدەنىپ جۇرگەن جاستار بار. تۋرا ءدىننىڭ، تۋرا رۋحانياتتىڭ جولىنا تۇسكەن، تەك دىنمەن عانا شەكتەلىپ قالماي، مادەنيەت، تاريح، ادەبيەت تۇرعىسىنان رۋحاني بايىپ، ونەرمەن شۇعىلداناتىن جاستارىمىز دا جەتكىلىكتى. بىراق، وكىنىشكە قاراي، جاستاردىڭ اراسىندا رۋحانياتقا مۇلدەم ءمان بەرمەي جۇرگەندەرى دە بار. رۋحاني جۇتاڭدىق كەزدەسەدى. اسىرەسە، كوركەم ادەبيەتتىڭ بەدەلى قوعامدا تومەندەدى، ەداۋىر رۋحاني داعدارىس قازىر اڭعارىلۋدا. مۇنى جوققا شىعارۋعا بولمايدى. اسىرەسە، مىنا عالامتور جاستاردىڭ تانىمىنا كەرى اسەر ەتۋدە. ءبىزدىڭ جاستار كوپ جاعدايدا ءبىلىم مەن اقپاراتتى شاتاستىرادى. عالامتورداعى دۇنيە جاي عانا اقپاراتتار، ولار بۇگىن بار دا، ەرتەڭ جوق. اقپارات ءبىلىم بولمايدى. ەگەر ول عىلىمي اقپارات بولسا، بىلىمگە نەگىز بولا الادى. عىلىمي زەرتتەۋلەر، كوركەم جانە عىلىمي ادەبيەتتەر، تانىمدىق ەڭبەكتەر ناعىز ءبىلىم ەكەنىن قازىر جاستار كوپ ۇعىنا بەرمەيدى. جالپى، عالامتور قانشا ورىستەسە دە، ادەبيەتتىڭ ورنى ەشقاشان جوعالمايدى، كوزبەن كورىپ، قولمەن ۇستايتىن قۇندىلىقتىڭ ورنى ارقاشان ماڭىزدى. سوندىقتان بىزگە كىتاپتىڭ ناسيحاتى كەرەك جانە ەڭ الدىمەن جاستارعا رۋحاني ىزدەنىستىڭ ادام بولمىسىنا ءتان، ادامدى ەرەكشەلەيتىن نارسە ەكەندىگىن ۇعىندىرۋىمىز كەرەك. اباي ايتىپ كەتكەندەي، «مالدا دا بار جان مەن ءتان، اقىل سەزىم بولماسا، تىرشىلىكتىڭ نەسى ءسان، تەرەڭگە بەت قويماسا؟». ادامدىقتىڭ بولمىسى دا، ءسانى دە، ءمان-مازمۇنى رۋحانياتقا بوي ۇرۋىندا، رۋحاني ىزدەنىس ارقىلى ومىرىنە ماعىنا بەرۋدە. ادام بالاسى ومىردەن ماعىنا ىزدەيدى، دىنگە، رۋحانياتقا بوي ۇراتىنى دا سوندىقتان. ماعىنا-مازمۇن دارىتاتىن رۋحانيات بولعاندىقتان، بالا كەزدەن ۇيرەتۋ كەرەك. وسى جەردە جەكە تۇلعالاردىڭ جاۋاپكەرشىلىگىن كۇشەيتۋ كەرەك دەر ەدىم. مىسالى، كوپتەگەن اتا-انالار بالالارىن مەكتەپكە تابىستاپ قويىپ، ال مەكتەپتەگىلەر كەرىسىنشە اتا-اناعا سەنىپ، ەكىۇداي بولادى. بالا، ارينە، رۋحاني ءتالىمدى وتباسىنان الادى، سوندىقتان دىنمەن ءبىز اينالىسپاساق، ءدىن بىزبەن اينالىساتىن جاعدايعا جەتىپ وتىرعانىمىزدى ءتۇسىنۋ كەرەك. اتا-انالار وزدەرى رۋحاني قۇندىلىقتاردى بەلگىلى ءبىر دارەجەدە يگەرىپ، بالالارىنا رۋحاني باستاۋدى سۋسىنداتۋى قاجەت. بەسىكتەن بەرىلەتىن اتا-انا تانىم-تاربيەسىن نە بالاباقشا، نە مەكتەپ الماستىرا المايدى. بۇل بالانىڭ بولاشاقتاعى رۋحاني باعدارىنىڭ دۇرىس قالىپتاسۋىنا اسەر ەتەدى. ال ەكىنشى جاعىنان، بالا تاربيەسىمەن اينالىساتىن كەز كەلگەن قاۋىم ولار ءۇشىن رۋحاني ۇستاز، يدەال تۇلعاعا اينالا بىلگەنى ابزال. كەشە، كەڭەس كەزىندە ۇستاز قانداي مارتەبەلى ماماندىق بولدى، سول دەڭگەيگە ۇستازدىقتى كوتەرگەنىمىز ءجون بولار. ەگەر ۇستازىنان بۇكىل رۋحاني قاسيەتتەردى، ءبىلىمدى الا بىلسە، ءبىزدىڭ جاستارىمىز شەتەلدەن شايقى ىزدەگەن قازىرگىدەي جاعدايعا ۇشىراماس ەدى…»

ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعىنىڭ ديرەكتورى اينۇر ابدىراسىلقىزىنىڭ BNews.kz تىلشىسىنە بەرگەن سۇحباتىنان.

«www.bnews.kz».