جۇما, 29 ناۋرىز 2024
بيلىك 12388 0 پىكىر 1 قازان, 2014 ساعات 11:29

الىستاعى قازاقتار (بايان ولگەي ساپارى)

بۇل جولعى ساپارىمىزدىڭ ءجونى تىم بولەك، تىم باسقا. تالاي جەردى كوردىك، تالاي ەلدى ارالادىق. بايان ولگەي – نەگىزگى باعىتىمىز. و جاقتا قالعان قازاقتاردى كورگىمىز كەپ بارادى. ساعىنىپ قالعاندايمىز. بالكىم قانىمىز ءبىر بولعانى سەبەپتى شىعار…

مۇڭعۇليا ەلىنە رەسەي فەدەراتسياسىنا قارايتىن التاي ايماعى ارقىلى جەتتىك. جول بويى تابيعاتتىڭ سۇلۋلىعىنا ءتانتى بولدىق. كەرەمەت! قايتا-قايتا جۇرگىزۋشىنىڭ مازاسىن الدىق. ءتۇسىپ كورۋ ءۇشىن. تاماشالاۋ ءۇشىن.

سول سەبەپتى فوتورەپورتاجىمنىڭ باسىن التاي تاۋلارىنان باستاعاندى ءجون كوردىم. مىناداي سۇلۋلىقتى وزگەلەرمەن بولىسپەۋگە قالاي شىدارسىڭ؟!   

الىستاعى قازاقتار

وسىلايشا مۇڭعۇل شەكاراسىنا كىردىك. كەڭ دالا مۇڭعۇلدا دا بار ەكەن-اۋ. كارتادان قاراعاندا وسىنشاما كەڭدىگى بايقالمايدى… بىراق كوزبەن كورگەن تاعى باسقا بولىپ شىقتى. حوش، سونىمەن ءبىز بايان ولگەي دەگەن جەردىڭ توپىراعىن باسىپ، اۋاسىن جۇتىپ، 100 مىڭ قازاقتىڭ اراسىنا ەنىپ كەتتىك.

قازاقتىڭ قوناقجايلىعى تۋرالى از-كەم ءسوز

مۇندا كەلىپ دەمالعان سوڭ، بايان ولگەيدەن 40 شاقىرىپ جەردە كۇزەۋدە وتىرعان ۇيلەردىڭ بىرىندە قوناق بولىپ، ءدام تاتتىق. مەن ءوزىم ماڭعىستاۋدا تۋىپ، كىشكەنتايىمنان كيىز ۇيدە ويناپ ءوستىم. سودان بەرى قاراي قانشاما ۋاقىت ءوتتى. قازىر ەشكىم ارنايى كيىز ءۇي تىگىپ الەك بولمايدى. مۇنىڭ باستى سەبەبى – كوپتى كورگەن، كونەنىڭ كوزى بولعان اتا-اجەلەرىمىزدىڭ ورتامىزدا بولماۋىنان شىعار دەپ ويلايمىن. ءجا، باي ولكە جۇرتىنىڭ قوناقجايلىعى تۋرالى ايتايىقشى.

قازاقتىڭ قوناقجايلىعى، كەڭپەيىلدىلىگى بۇرىننان ەرەكشە عوي. ال مۇندا تىپتەن ەرەكشە ەكەن! ونىڭ ءبارىن ايتا بەرسەك ءوز الدىنا بولەك ءبىر تاقىرىپ بولايىن دەپ تۇر.

كەلسەك، ءۇي يەسى داستارحانىن جايناتىپ قويىپتى. قىمىزى بالداي ەكەن! قايماعى مەن سارى مايى قانداي! مال مايىنا پىسكەن باۋىرساعى قانداي! قۇرت-ىرىمشىك… كوپ ءسوزدىڭ كەرەگى نە، ودان دا سۋرەتتەردى تاماشالاڭىزدارشى 

 

سارىكول جايلاۋىنداعى ۇلان-اسىر توي

ەر جانىبەكتىڭ تۋعانىنا 300 جىل تولۋىنا وراي سارىكول جايلاۋىندا وتكەن تويعا قاتىسىپ، مۇنداعى الەۋمەتتىڭ تۇرمىس-تىرشىلىگىنەن حاباردار بولدىق. تۇسكە قاراي توي قىزا ءتۇستى. بۇركىتشىلەر سايىسىن كورىپ ءبىر سەرپىلدىك. اۋدارىسپاق تاماشالاپ ءبىر سەرپىلدىك. ءسويتىپ جۇرگەندە «ەت ءپىستى» دەپ شاقىردى. جۇرت تەگىس كيىز ۇيلەرگە قاراي بەتتەدى. ارى قاراي نە بولعانى بەلگىلى عوي 

بۇدان سوڭ مەرەكە-دۋمان تاعى جالعاستى. قىزىق، ويىن-ساۋىق كەشەنىنە كىرىپ كەتكەندەي كۇي كەشتىك.

تويعا كەلۋشىلەرمەن سۇحباتتاسىپ، قال-جاعداي سۇراسىپ ءجۇرمىز. سونداعى مەنىڭ بايقاعانىم – مۇنداعى قازاقتاردا ءتىل تازالىعى ساقتالعان ەكەن. ءبىرتۇرلى جۇمساق سويلەيدى، مادەنيەتتى. وزگە ءتىلدى ارالاستىرماي سويلەيدى. نەسىن جاسىرايىن، جۇرتتىڭ نامىسىنا ءسۇيسىندىم. ارى قاراي سۋرەتتەرگە كەزەك بەرەلىك.

شەبەردىڭ قولى ورتاق…

بايان ولگەي قازاقتارى قولونەردى ابدەن مەڭگەرگەن ەكەن. ءتىپتى وتباسىلىق بيزنەسكە اينالدىرىپ العان. بۇعان تومەندەگى سۋرەتتەر دالەل بولا الادى. 

بۇل وسىنداعى ءبىر قازاق شەبەرىنىڭ قولىنان شىققان كيىز ءۇي. كۇمىس اشەكەيلەرمەن بەزەندىرىلگەن. تولىق جابدىعىمەن قۇنى 15 000 دوللار. 

قورىتىندى ءسوز. باسىندا جازىپ وكتكەنىمىزدەي، بۇل جولعى ساپارىمىزدىڭ ءجونى تىم بولەك بولدى. تالاي جەردى كوردىك، تالاي ەلدى ارالادىق. باستىسى الىستاعى اعايىنمەن ديدارلاسىپ، سۇحباتتاسىپ، تۇرمىس-تىرشىلىگىمەن تانىسىپ قايتتىق. باۋىرلارىمىز ءدىن امان ەكەن. سالت-داستۇرىنە بەرىك ەكەن. كۇندىز-ءتۇنى قازاق ەلىنىڭ تىنىشتىعىن تىلەيدى ەكەن. جىگىتتەرى جىگەرلى، قىزدارى ۇياتتى ەكەن. تۋىسقاندار بارلىعىڭىزعا دا سالەم ايتتى.

استانا – باي ولكە – استانا

(ازامات بيتاننىڭ بلوگىنان)

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616