..."مەنىڭ اتىم قوجانى" ۇمىتپاعان شىعارسىزدار؟ وقۋ جىلى باستالار الدىندا بالا قوجا كىتاپ الماق بولىپ دۇكەنگە تارتپاۋشى ما ەدى؟

دۇكەننىڭ الدى قاراقۇرىم حالىق. "قانت الامىن" دەپ قۋلىققا باسقان "قارا كوجەنىڭ" وبرازىنا ەلۋگە كەلگەندە ەنەم دەپ ءۇش ۇيىقتاسام تۇسىمە كىرمەپتى. ءبارى دە اسلان مىرزانىڭ "ارقاسىندا"! ءبىلىم ءمينيسترىن ايتامىن. سول كىسىنىڭ "شاپاعاتىمەن" بالالىق شاققا ءبىر ساياحات جاساپ قايتتىم بۇگىن...

...تاڭ ازاننان تۇرىپ "اتامۇرانى" جاعالاپ، نەمەرەمە وقۋلىقتار ساتىپ الدىم. اعىلشىن كىتابىن "الماتىكىتاپتان" الۋ كەرەك ەكەن. ءبىر دانا كىتاپقا بولا بارماي-اق قويايىن دەپ ەدىم، اياق استىنان پىسىقتىعىم ۇستاپ... الگى دۇكەننىڭ الدى "قوجاداعىداي" قىرعىن كەزەك! ءسارىنجىپوۆ "بيىل ەشكىم وقۋلىق ساتىپ المايدى" دەپ ەدى. مىناۋسى نەسى؟ ء"بىر كىتاپقا بولا تۇرامىن با؟" دەپ كەرى بۇرىلعانىم سول ەدى، جەتەگىمدەگi نەمەرەم قيعىلىقتى سالعانى. 
- اتا! اپاي ەرتەڭ ۇرسادى عوي. بالالاردىڭ بارىندە بار بۇل كىتاپ...
بولدى! اتاسىندا جان بار ما؟ قوجانىڭ قۋلىعى بۇل جەردە جۇرمەيتىنiن تۇسىنەمىن. ىشتە قانت ساتىپ جاتقان دا ەشكىم كورىنبەيدى. الماتىنىڭ جاڭبىرىنىڭ استىندا ءبىراز تۇردىم. جاي تۇرعانىم جوق. قۋلىق ويلاپ تۇرمىن. قوجادان قاي جەرىم كەم ەكەن؟ سوقپاقباەۆ تا ءوز اعام!.. ءبىر ويدىڭ ساپ ەتە قالعانى. شەگىپ تۇرعان تەمەكىمدى ۋرناعا اسىعىس تاستاپ، كەزەكتىڭ الدىندا كولدەي بولىپ كولدەنەڭ تۇرىپ العان ورىس ايەلگە جەتىپ باردىم.
- قازىر عانا تەمەكى شەگۋگە شىعىپ ەدىم... ىشتە دە كەزەك... ونىڭ ۇستىنە اۋا جەتپەي...
ەتجەڭدى ايەل ماعان ءبىر، نەمەرەمە ءبىر قاراپ شەتكە ىعىستى. ارت جاقتاعى جۇرتتىڭ شۋىنا قاراماي كىردىم -اۋ ايتەۋىر! الگى جالعىز وقۋلىقتى ىزدەپ جۇرگەنمىن. تەرەزە تىقىلدادى. سىرتتا كەزەكتە تۇرعان ءبىر كەلىنشەك كوزى جاۋدىرەپ، اينەكتىڭ سىرتىنان قاراپ تۇر. قاعازعا جازىلعان الدەبىر وقۋلىقتاردى "الا شىق" دەپ ىمدايدى. ءسىرا، مەنىڭ "قوجا قۋلىعىمدى" بايقاپ قالعان سياقتى. ءوزىمنىڭ الاتىنىم ءبىر عانا وقۋلىق. وعان دا الا سالايىن دەدىم. نەم كەتەدى؟ ءبارىن الىپ، كەزەككە تۇرعانىم سول ەدى، سىرتتان تاعى سيگنال ءتۇستى. بۇل جولعىنىڭ كوزى ءتىپتى ايانىشتى. ءتىزىمىن اينەككە جاپسىرىپ، موليە قالىپتى. امال جوق، ونى دا الدىم. جانە بىرەۋى ءوتىندى. ونىڭ دا كوڭىلىن قالدىرمادىم. تاعى دا ءبىراز ءجاۋدiر كوزدىڭ ساۋابىنا قالار ما ەدىم؟ كەزەكتەگىلەر الا كوزدەرىمەن اتىپ، كۇڭكىلدەي باستاماعاندا...
...ارتىنىپ، تارتىنىپ شىققان مەنى سىرتتاعى ءجاۋدiر كوزدەر "حالىق باتىرىنداي" قارسى العانى دا راس. ءتىپتى بىرەۋى بەتىمنەن ءسۇيىپ الدى-اۋ دەيمىن!.. بۇل دا اسلان مىرزانىڭ "ارقاسىندا" دەيمىن دە. الماتىنىڭ جاڭبىرىنىڭ استىندا بۇرسەڭ قاعىپ، اسلانعا الدانىپ، وقۋلىقتىڭ كەزەگىندە تۇرعاندار بىزگە قىزىعا قاراپ تۇردى.

ارمان سقابىلۇلى، facebook-تەگى پاراقشاسىنان