قازاق حاندىعىنىڭ 550 جىلدىعى حاندىقتىڭ كەزىندە باباسى بۇل جەردە تۇرماعان وتانداستارىمىزدىڭ شامىنا ءتيىپ جاتسا كەرەك. ونى سپورت كوممەنتاتورى دميتري موستوۆوي الەۋمەتتىك جەلىدە  حاندىقتىڭ 550 جىلدىعىن اشىق تۇردە بالاعاتتاعىنانىنان اڭعارۋ قيىن ەمەس. ءدميتريدىڭ تۆيتتەردەگى جازباسى كوپشىلىكتىڭ اشۋىن تۋعىزعان بولاتىن.

ەندىگى كەزەكتە ول ءىشىپ وتىرىپ جازعان جازباسى ءۇشىن ءوزىنىڭ  Facebook  پاراقشاسىندا كەشىرىم سۇراپتى.

 ەلىمىزدە بولىپ جاتقان ەكونوميكالىق جاعداي اشۋلاندىرىپتى-مىس. الايدا ءبىزدىڭ تەڭگەنىڭ قۇنسىزدانۋىنا قازاق حاندىعىنىڭ قاتىسى قانشا؟  كەرىسىنشە، كورشىمىزدىڭ اقشاسىنىڭ قۇلدىراپ كەتكەنىنە بايلانىستى سول جاقتىڭ تۇماۋى ءبىزدىڭ ەكونوميكاعا  دا جۇعىپ جاتقانىن كوزى قاراقتى ادام ءتۇسىنىپ وتىر. ونسىز دا قازاقتىڭ تەڭگەسى مۇنشا نەگە قۇلدىرادى دەپ كۇيزەلىپ وتىرعان ساتتە جىعىلعان كوڭىلگە جۇدىرىق سىلتەۋدىڭ نە قاجەتى بار ەدى ؟ راس، موستوۆوي كەشىرىم سۇرادى. كەشىرمەي قايدا بارامىز. ءبىزدىڭ كەشىرگەن، كەشىرمەگەنىمىزگە قاراپ وتىرعان ول  جوق. بىراق ويىنداعىسىن ايتىپ الدى عوي. ماسەلە سوندا. ەكونوميكالىق كوڭىلسىزدىك ءبىزدىڭ بويدى دا بيلەپ تۇر. بىراق ءبىز ول ءۇشىن قازاق حاندىعىن تۇرتپەكتەگەن جوقپىز. سەبەبى ول ءبىز ءۇشىن كيەلى ۇعىم. وسى جەردى مەكەن ەتكەن وزگە ۇلتتى وتانداستارىمىزعا دا كيەلى بولۋى ءتيىس ەدى. ولاي ەمەس ەكەن.

حاندىعىمىزدى تىلدەگەن ساباز ءبىزدىڭ مەملەكەتتىك تىلدە كەشىرىم سۇراسا، بارلىعىمىزدىڭ ءىشىمىز جىلىپ سالا بەرەر ەدى عوي.  ءبىزدىڭ ءتىلىمىز بەن تاريحىمىزدى زەردەلەيمەي-اق وسى ەلدە نان تاۋىپ، قىزىمەن بىرگە شەتەلگە دەمالىقا شىعاتىن ازاماتتىڭ كەشىرىمىنىڭ قازاقشا ء«تارجىما» ءماتىنى مىنانداي بولىپ شىعادى:

«ارينە بۇل ارەكەتىم مەنىڭ تاراپىمنان كەتكەن اقىماقتىق. اشۋلانعان كەزدە ويىما كەلگەنى وسى بولدى. تاڭەرتەڭ اتالعان جازبانى دەرەۋ ءوشىرىپ تاستادىم. مەنىڭ ايتپايىن دەگەنىم بۇل ەمەس. سوڭعى كۇندەرى بولىپ جاتقان ەلىمىزدەگى اۋىر ەكونوميكالىق جاعدايدان كەيىن، توي تويلاتۋدى دوعارساق دەگەن وي. بۇل ويىمنان مەن باس تارتپايمىن. ءوزىم كىنالىمىن. مەن ءوز وتانىمدى قاتتى جاقسى كورەمىن. ەگەر جاقسى كورمەسەم، مەن بۇل جاقتا بولماۋشى ەدىم. مەن اتالعان جازبا ءۇشىن بارىلىعىنان كەشىرىم سۇرايمىن», – دەيدى دميتري موستوۆوي Facebook جەلىسىندەگى جەكە پاراقشاسىندا.

«توي تويلاتۋدى دوعارساق دەگەن ويى» بولىپتى. وندا نەگە EXPO-2017-ءنى مىسالعا كەلتىرمەگەن. تويدىڭ  كوكەسى سول ەمەس پا؟ وسى ۋاقىتقا دەيىن اس تا توك شىعىن جاساعان مەملەكەت «قازاق حاندىعىنا» كەلگەندە نەمەنەگە جيىرىلا قالدى. بۇل تۇستا موستوۆويعا دا رەنجي المايمىز. ءبىزدىڭ مينيسترلىكتىڭ ءوزى حاندىقتىڭ ۇلى تويىنا اقشا جوق دەپ ايتقان بولاتىن. دەمەك ءوزىمىز اۋزىنا سالىپ بەرىپ وتىرمىز.

اينۇر تولەۋ

 دەرەك كوزى: Qamshy.kz