ء(ازىل اۋىلىنىڭ ار جاعىندا، قالجىڭ اۋىلىنىڭ  بەر جاعىندا بولعان حيكايات)

ءبىرىنشى سەريا

  ءبىراز جەردە اتى شىققان ەكى ۇرى ويدا جوقتا كەزدەسىپ قاپتى.

-اسسالام..

-الەيكۋم...

- ساۋدا ساتىمەن دەگەن... جەرىڭىزدى ساتىپسىز،زاۋىتىڭىزدى ساتىپسىز، فابريكاڭىزدى ساتىپسىز، مالدارىڭىزدى ساتىپسىز.ەستىپ جاتىرمىز، قۇتتى بولسىن!

- راحمەت، تىلەگىڭ قابىل بولسىن.ءبىز سياقتى ۇرىعا بۇل دۇنيەنىڭ ەڭ قادىرلىسى - مال-مۇلىك ەمەس، التىن مەن اسىل تاستار عوي. ال، ونى قۇدايعا شۇكىر، ءبىر ادامداي جينادىم.

- ويباي، جۇرتتىڭ ايتپايتىنى جوق، بايبىشەڭىزدى دە ساتىپ جىبەرگەنسىز بە؟

- ءيا، دۇنيە-مۇلكىمەن قۇرتتىم قاقباستى. ەندى توقال ماسەلەسى دە شەشىلىپ قالار. ايتپاقشى، ءومىردىڭ شەگىن اينالدىرۋدى مىنا اعاڭنان ۇيرەن.

- ال!؟

- دويبى دەگەن ويىندا ءۇش جەپ بيگە شىعۋ دەگەن بار. مەن ءۇش ەمەس، ءبىر جەردى ءتورت توناپ، بايىپ ءجۇرمىن عوي. بىزدە  بيۋدجەت دەگەن اقشا جينالاتىن جەر بار، سونىڭ ارتىق اقشاسىن شەتەلگە قۋىپ جىبەرەم.سوسىن ونى ەلگە قايتارتىپ، زاڭداستىرام. سوسىن ول اقشالارعا بيزنەس ورتالىقتار ساتىپ الام. ولاردان تۇسەتىن پايدا، ءوزىڭ بىلەسىڭ، ون ەسە عوي. ال، ەندى وتكات-ماتكات دەگەن ونىڭ بەر جاعىنداعى دۇنيەلەر عوي. قالعانىن ءوزىڭ ەسەپتەي بەر.

سوندا ۇرىنىڭ كىشىسى:

- اۋ،ءپالى، قادىرلى قالقان قۇلاق اعام-اي.تالاي نارسەنى سىزدەن ۇيرەندىم عوي. مەن قازىر تريلليونداعان قارجىسى بار قوردى باسقارام عوي. وندا مەنىڭ پالەن مىڭ تۋىسقاندارىم جۇمىس ىستەيدى.ولار قالاي جالاسا دا قوردىڭ اقشاسىن بىتىرە الماي جاتىر. ءسىز قۋلىق سۇمدىقتىڭ جاڭا مەكتەبىن جاساعان ادامسىز. ۇرلىقتىڭ نانا تەحنولوگياسىن سىزدەن ۇيرەنۋ كەرەك ەكەن،- دەپتى.

ەكىنشى سەرياسى...

ەكى ۇرى گوي-گوي اڭگىمەنىڭ دۇرىلىمەن، قىمبات كونياكتىڭ قىزۋىمەن ستول باسىندا ءبىراز وتىرىپ قاپتى. ءبىرى: «وي مەنىڭ قولىم التىن عوي» دەسە،ەكىنشىسى : ء«بارىن اقىلمەن شەشەتىن، مەنىڭ  باسىم التىن» دەپ، ءبىر-بىرىنە دەس بەرمەسە كەرەك. ەكەۋى ءسويتىپ ءبوسىپ وتىرعاندا، ءبىر الىپ شايتان كەلىپ، ەكەۋىنىڭ دە جەلكەسىنەن ءبۇرىپ ۇستاپ، كوككە كوتەرىپ اكەتىپ: «ەلدى توناعاندارىڭمەن قويماي، سوعان ماقتانىپ وتىر ەكەنسىڭدەر، انا دۇنيەگە بارعاندا دوزاقتىڭ وتىنا سالامىن» دەپتى دە، جەرگە قايتادان لاقتىرىپ جىبەرىپتى. سودان ۇلكەنى  جۇمىلعان كوزىن اشىپ،ەكىنشىسىنەن: «جاڭاعى كورگەنىم ءتۇسىم بە، الدە ءوڭىم بە؟» دەپ سۇراپتى. سوندا ارىپتەسى «قورىققانعا قوس كورىنەدى» دەگەن، مىنا كونياكتىڭ اسەرى شىعار» دەسە كەرەك.  بۇلاردىڭ اڭگىمەلەرىنىڭ شەت جاعىن قۇلاعى شالىپ قالعان وفيتسيانت: «اللا تاعالا سەندەردىڭ جازالارىڭدى ولگەننەن كەيىن ەمەس، ءتىرى كەزدەرىڭدە بەرسە ءجون بولار ەدى» دەپ قاپتى. سوندا ۇرىنىڭ ۇلكەنى: «بۇلار كەزىندە «قويدىڭ اۋزىنان ءشوپ الماس، مومىن بولۋشى ەدى. ەندى قۇلعا دا ءتىل بىتەيىن دەگەن ەكەن. «التىن كورسە، پەرىشتە جولدان تايادى» دەگەن، مىنانى ال دا، اۋزىڭدى جاپ» دەپ، مىڭ دوللاردى وفيتسيانتقا قاراي لاقتىرىپ جىبەرىپتى. جاس داياشى جىگىت: « ارام جولمەن تاپقان اقشاڭمەن ارتىڭدى ءسۇرت» دەپتى دە، كەتىپ قاپتى. «زاتىنا قاراماي، قارا مۇنىڭ نامىسقويىن» دەگەن ەكى ۇرى ورىندارىنان تالتىرەكتەپ تۇرىپ، دالاعا شىققاندا، بەتتەرىن بۇركەپ العان ەكەۋ مىنالاردىڭ بۇيىرىنە مىلتىقتارىن تىرەپ: «بۇدان بىلايعى تابىستارىڭنىڭ الپىس پايىزىن بىزگە بەرىپ تۇراسىڭدار» دەپ تالاپ قويىپتى. «بايلارعا دا جان كەرەك» دەگەن، ەكى ۇرى كوشە سويقاندارىنا: «جارايدى» دەپ كەلىسىمىن بەرگەن ەكەن. ءسويتىپ ەكى ۇرى - ەكى باي «بۇل جولى دا ولىمنەن اقشانىڭ قۇدىرەتىمەن قۇتىلدىق» دەپ ۇيلەرىنىڭ تابالدىرىعىن اتتاعان ەكەن.

Abai.kz