«حيلنيچەنكو ي ك» شارۋا قوجالىعىنىڭ قىزىلشا القابىنىڭ باسىندا ۇيىمداستىرىلعان سەمينار قانت قىزىلشاسىن ءوسىرۋ مەن جيناۋداعى جاڭا تەحنولوگيالارعا ارنالدى. جيىنعا الماتى وبلىسىنىڭ اكىمى اماندىق باتالوۆ قاتىستى.

سەميناردىڭ العاشقى بولىگىندە قاتىسۋشىلار قانت قىزىلشاسىن جينايتىن جانە تاسىمالدايتىن تەحنيكالاردى، سول سياقتى شارۋاشىلىقتاردا قولدانىلىپ، تاجىريبەدەن وتكەن ءتۇرلى ۆيتاميندەر، گەربيتسيدتەر، تىڭايتقىشتاردى تاماشالادى. وبلىس اكىمى ا. باتالوۆقا وتەناي اۋىلىنداعى عىلىمي-پراكتيكالىق ورتالىق بازاسىندا دايىندالىپ، وسىرىلگەن قانت قىزىلشاسىنىڭ «اقسۋ-گيبريد» جاڭا سورتى تانىستىرىلدى. كورمەدە ۇسىنىلعان ءتاتتى ءتۇبىردىڭ سالماعى 4 كەلى 200 گرامم تارتادى. جالپى 18 گا جەرگە وسىنداي سورت ەگىلگەن.

مەملەكەت باسشىسى نۇرسۇلتان ءابىشۇلى نازارباەۆ وتكەن جىلدىڭ تامىزىندا وبلىسىمىزعا جاساعان جۇمىس ساپارىندا قانت قىزىلشاسىن قايتا تۇلەتۋدى تاپسىرعان بولاتىن. وسى تاپسىرمانى ورىنداۋ ماقساتىندا بىرقاتار جۇمىس اتقارىلىپ، وبلىستىڭ قىزىلشاعا توسەلگەن 5 اۋدانىندا 4 مىڭ گا جەرگە قانت قىزىلشاسى سەبىلدى. قىزىلشا ەككەن شارۋا قوجالىقتارىنا قولداۋ كورسەتۋ باعىتىندا قاجەتتى تەحنيكالارمەن قامتاماسىز ەتۋ ءۇشىن 6 سەرۆيستىك-دايىنداۋ ورتالىقتارى قۇرىلدى جانە شارۋاشىلىقتار ساپالى تۇقىممەن قامتىلدى. وعان قوسا بيىلعى جىلى مەملەكەت 86 ملن. تەڭگە كولەمىندە سۋبسيديا بەردى. بۇگىنگى كۇنى كوكسۋ قانت زاۋىتى ءونىم قابىلداپ، وڭدەۋگە دايىندىق ۇستىندە. جۇمىستى دۇرىس ۇيىمداستىرعاندا، اگروتەحنولوگيالىق تالاپتاردى ساقتاعاندا، يننوۆاتسيالىق تەحنولوگيانى قولدانعاندا، وعان قوسا ءوز ءىسىن بەرىلە اتقارعاندا عانا جوعارى دەڭگەيدەگى، ساپالى ءونىم جيناۋعا بولادى، - دەدى ءوڭىر باسشىسى ا. باتالوۆ سەميناردىڭ العاشقى بولىگىن قورىتىندىلاعان سوزىندە.

مۇنان سوڭ سەمينار پلەنارلىق جيىنمەن جالعاستى. اۋىل شارۋاشىلىعى سالاسىنىڭ عالىمدارى مەن شارۋاشىلىق ماماندارى قانت قىزىلشاسىن ءوسىرۋدىڭ بۇگىنگى جاعدايى، دامۋى مەن مۇمكىندىكتەرى، جوعارى ءونىم بەرەتىن سورتتار شىعارۋ، وندىرىسكە جاڭا تەحنولوگيا ەلەمەنتتەرىن ەنگىزۋ تۋرالى پىكىر الماستى.

سول سياقتى وبلىس اكىمى ا. باتالوۆ «القاپ كۇنى» شەڭبەرىندە «حيلنيچەنكو ي ك» جانە «نام» شارۋا قوجالىقتارىنىڭ قانت قىزىلشاسىن، جۇگەرى، كارتوپ، پياز، سويا جانە باسقا دا اۋىل شارۋاشىلىعى داقىلدارىن وسىرەتىن القاپتارىن ارالادى.

اباي-اقپارات