ەسەپ كوميتەتىنىڭ حابارلاۋىنشا،  سەنات پەن ءماجىلىس  بيۋدجەتتىڭ 3 ميللياردقا جۋىق تەڭگەسىن زاڭسىز جۇمساپ، مەملەكەتكە قىرۋار شىعىن كەلتىرگەن. بۇل تۋرالى كتك ارناسى حابارلادى.

ەسەپ كوميتەتىنىڭ مالىمەتىنشە، وبلىس، اۋدان، اۋىلداردا  ميللياردتار يگەرىلمەي قالعان. سونىڭ كەسىرىنەن ونداعان مىڭ وتباسى باسپاناسىز قاڭعىپ دالادا  ءجۇر، ال قانشاما اۋىل اۋىز سۋعا جارىماي وتىر.

مىسالى، شىعىس قازاقستان وبلىسى بويىنشا 41 ميلليارد تەڭگە  زاڭسىز جۇمسالعان.  ال بيۋدجەتتىڭ  3 ميلليارد تەڭگەسى  نەگىزسىز يگەرىلگەن. شىن مانىندە،   شىعىس قازاقستانداعى اۋىلدار اۋىز سۋعا جارىماي وتىر. بۇل سالادا دا شەنەۋنىكتەر بيۋدجەتتەن بولىنگەن اقشانى ماقساتسىز جۇمساپ، جۇرتتى  شولدەتىپ وتىر. اسىرەسە، سەمەي، اياگوزدەگى جاعداي مۇشكىل. وبلىس اكىمى بار بىلىققا جاۋاپ بەر دەپ ورىنبارىن جىبەرىپتى. نۇرىمبەت ساقتاعانوۆ ۇشتى-كۇيلى جوعالعان قازىنانىڭ ميللياردتارى ءۇشىن ءتورت ادامدى جاۋاپقا تارتتىق دەپ قۇتىلعان.

“كاك ۆى موگلي 9,5 ميلليون تەڭگەنى وپلاتيت زا نەۆىپولنەننۋيۋ رابوتۋ پري سترويتەلستۆە موستا؟ رابوتا نەۆىپالنەنا. جول ىستەلمەگەن، اقشانى قالاي تولەيسىڭدەر سەندەر؟”، – دەپ كەيىگەن ەسەپ كوميتەتىنىڭ توراعاسى قوزىكورپەش جاڭبىرشين.  “ەگەر مىنا مىنبەرگە شىعىپ الىپ، تاعى دا بەتىڭىز قىزارعانىن قالاماساڭىز، باستى كىنالىلەردى جۇمىستان شىعارىڭىزدار. ەسكەرتۋ جاسادىم، جازالادىم دەگەن بولمايدى. سودان كەيىن بۇدان بۇلاي ەسەپ كوميتەتىنىڭ جيىنىنا دايىندالىپ كەلىڭدەر، سۇراققا جاۋاپ الايىق ناقتى”، – دەپتى ەسەپ كوميتەتىنىڭ توراعاسى.

ەسەپ كوميتەتىنىڭ دەرەگىنشە، پارلامەنتتەگى دە بىلىق از ەمەس. دەپۋتاتتار قىزمەتتىك كولىكتەرىمەن وڭدى-سولدى قىدىرىپ، سونىسىمەن-ەق بيۋدجەتكە 74 ميلليون شىعىن كەلتىرىپتى.

شارۋاشىلىق باسقارماسى ساۋلەت، قۇرىلىسقا قاجەت دەپ تاعى 365 ميلليون تەڭگەنى زاڭسىز جۇمساعان. ال، مەملەكەتتىك ساتىپ الۋ بويىنشا وتكەن تەندردە  كىم كورىنگەن جەڭىسكە جەتىپ، تاپسىرىس قابىلداعان. وسىلايشا، پارلامەنت جالپى بيۋدجەتتىڭ 3 ميللياردقا جۋىق تەڭگەسىن قۇردىمعا جىبەرگەن. ەسەپ كوميتەتى پارلامەنتتە جۇرگىزگەن تەكسەرۋلەرىن تەك رەسمي سايتىندا جاريالادى. ەشكىمدى شاقىرىپ الىپ سوكپەدى. بىراق،  قازىنا قارجىسىن كوزسىز جۇمساعان شەنەۋنىكتەردىڭ ءتىزىمىن باس پروكۋراتۋرا مەن اقورداعا جىبەرەمىز دەپ وتىر. ءسويتىپ، ايىپتى اتقامىنەرلەردى قاتاڭ جازالاماق.

سوندىقتان  جاقىن كۇندەرى ايماقتارداعى  بيۋدجەت اقشاسىن ءراسۋا ەتكەن شەنەۋنىكتەردىڭ سوڭىنا قۇقىق قورعاۋشىلار ماي شام الىپ ءتۇسۋى ابدەن مۇمكىن.

اباي-اقپارات