نيدە ۋنيۆەرسيتەتى جانە قازاق مەملەكەتتىك قىزدار پەداگوگيكالىق ۋنيۆەرسيتەتتى بىرىگىپ اشقان مۋزەيدە قازاقتاردىڭ ۇلتتىق كيىمدەرى، قولونەر بۇيىمدارى، باعالى كىتاپتار قويىلعان. مۋزەيدىڭ لەنتاسىن قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورى قازىنا ايماعانبەتقىزى جانە نيدە ۋنيۆەرسيتەتى رەكتورى،  پروفەسسور، دوكتور ادنان گۋرۋر قيدى.

اشىلۋ سالتاناتىندا نيدە ۋنيۆەرسيتەتى رەكتورى ادنان گۋرۋر: «نيدە ۋنيۆەرسيتەتى جانە قازاق مەملەكەتتىك قىزدار پەداگوگيكالىق ۋنيۆەرسيتەتى بىرلەسىپ اشقان كورمەگە قوش كەلدىڭىز! بۇگىن بۇل جەردە تۇرىك – قازاق مۋزەيى اتىندا ءبىر مۋزەي اشتىق. مۋزەيدىڭ مۇندا اشۋداعى ماقساتىمىز، تۇرىك – قازاق اراسىنداعى دوستىقتى، تۇركيا جانە قازاقستان اراسىنداعى بىرلىكتى ودان ءارى جالعاستىرۋ. 2011 جىلىنان بەرى قازاق مەملەكەتتىك قىزدار پەداگوگيكالىق ۋنيۆەرسيتەتىمەن نيدە ۋنيۆەرسيتەتتىڭ اراسىنداعى دوستىق جالعاسىن تابۋدا. وسى دوستىعىمىزدى ودان ءارى نىعايتۋ ماقساتىندا مۋزەي اشۋدى ءجون كوردىك. قازاقتار مەن تۇرىكتەر تاريح، مادەنيەت، ءتىل جانە ءدىن جاعىنان ورتاق بولعانىمىز، ءتۇبى ءبىر تۇركىنىڭ ۇرپاعى بولعانىمىز بارىڭىزگە ايان. وسى ورتاقتىعىمىزدىڭ جالعاسۋى ءۇشىن كىشكەنتاي بولسا دا ۇلەسىمىزدى قوسقىمىز كەلدى. وسى جەردە ەكى ۋنيۆەرسيتەتتەردىڭ بىرلەسىپ جۇمىس جاساۋى قازاقستان ءۇشىن دە، تۇركيا ءۇشىن دە ماڭىزدى ناتيجەلەر بەرەتىنىنە سەنىمدىمىز»، - دەپ ىستىق لەبىزىن ءبىلدىردى.

ءوز كەزەگىندە قازاق مەملەكەتتىك قىزدار پەداگوگيكالىق ۋنيۆەرسيتەتتى پروفەسسورى قازىنا ايماعانبەتقىزى: ء «بىز وتكەن جىلى «حالىقارالىق تۇرىك عىلىمي-زەرتتەۋ سيمپوزيۋمى» وتكىزىلگەنىنە وتە قۋانىشتىمىز جانە «قازاق-تۇرىك ءبولىم-مۇراجايىنىڭ» اشىلۋى ءبىزدىڭ ىنتىماقتاستىعىمىزدىڭ جالعاسى بولىپ تابىلادى. بۇل تاعى دا باۋىرلاس ەلدەرمەن مادەني بايلانىستاردىڭ شىنايىلىعىن راستايدى. سونداي-اق، ەكى ەل اراسىنداعى جالعاسىپ جاتقان قارىم-قاتىناستار تاريحىن نىعايتادى. اتالمىش ونەر مەكەمەسىنىڭ ومىرگە كەلۋى قازاق ۇلتىنىڭ وركەنيەتتىن، ياعني مادەنيەتىمەن ادەبيەتىن كەڭىرەك تانىستىرۋعا مۇمكىندىك بەرەدى. وسى ۋاقىتتا، نيدە ۋنيۆەرسيتەتىندە ءار ءتۇرلى ماماندىقتار بويىنشا ءبىزدىڭ ستۋدەنتتەر ءبىلىم الىپ جاتىر. بولاشاقتا مەكتەپكە دەيىنگى، باستاۋىش جانە مۋزىكالىق ءبىلىم بەرۋ سالاسىندا ەكى ديپلومدى ءبىلىم الۋعا جىل سايىن ستۋدەنتتەرمەن الماسۋدى جوسپارلاپ وتىرمىز. ولار تەك قانا ءبىلىم الماي، سونىمەن قاتار تۇرىك ءتىلى مەن مادەنيەتىن ۇيرەنەدى» دەگەن ىزگى تىلەگىن ءبىلدىردى.

بۇگىندە نيدە ۋنيۆەرسيتەتىندە قازاقستاندىق 20 شاقتى ستۋدەنتتەر ءبىلىم الۋدا جانە قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسورى جارقىنبيكە سۇلەيمەنوۆا ءبىلىم بەرۋدە. قازاقستاندىق ستۋدەنتتەر ءبىلىم الۋ بارىسىندا ءتۇرلى مادەني شارالارعا قاتىسىپ قازاقستاننىڭ مادەنيەتىن تانىتىپ، كوك تۋىمىزدى جەلبىرەتىپ ءجۇر.

ءلاززات بازارباەۆا

تۇركيا، نيدە ۋنيۆەرسيتەتى، فيلولوگيا ماگيسترانتى

Abai.kz